ជាតិ
រដ្ឋមន្ត្រីសាធារណការបើកចំហរចំពោះកិច្ចសហការជាមួយស្ថាប័នហិរញ្ញវត្ថុលើការទូទាត់ថ្លៃសេវាសាធារណៈ
×![]()
ដោយ៖ ខន ណារី
ផ្តល់ជម្រើសច្រើនសម្រាប់ប្រជាពលរដ្ឋ ចំណេញពេលវេលា និងកាត់បន្ថយការចំណាយក្រៅផ្លូវការ។ ទាំងនេះជាហេតុផលចម្បងដែលលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនប្រកាសបើកចំហរចំពោះកិច្ចសហការជាមួយស្ថាប័នហិរញ្ញវត្ថុនានាលើការទូទាត់ថ្លៃសេវាសាធារណៈ។
នាជំនួបជាមួយតំណាងធនាគារ ជេ ត្រាល់ រ៉ូយ៉ាល់ កាលពីថ្ងៃទី៥ ខែមថិុនា លោក ស៊ុន ចាន់ថុល បានអះអាងពីដំណើរការដ៏រលូនលើប្រតិបត្តិការទូទាត់ថ្លៃសេវាកម្មសាធារណៈ ក្រោមកិច្ចសហការរវាងក្រសួងសាធារណការ និងដឹកជញ្ជូន ជាមួយភ្នាក់ងារហិរញ្ញវត្ថុ និង ធនាគារជាដៃគូ ដែលអាចបង្កាភាពងាយស្រួល និងចំណេញពេលវេលា។
លោករដ្ឋមន្ត្រី បានស្វាគមន៍ចំពោះបំណងចូលរួមបង្កើតកិច្ចសហការរវាងធនាគារ ជេ ត្រាស់ រ៉ូយ៉ាល់ និងអគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន ក្នុងការផ្ដល់ជម្រើសទូទាត់សេវាសាធារណៈជូនប្រជាពលរដ្ឋកម្ពុជា ដើម្បីរួមចំណែកជំរុញសេវាសាធារណៈឲ្យបានឆាប់រហ័ស តម្លាភាព និងប្រសិទ្ធភាពខ្ពស់។
លោក ស៊ុន ចាន់ថុល បានអះអាងថា ក្រសួងសាធារណការ និងដឹកជញ្ជូន បើកចំហក្នុងការសហការជាមួយស្ថាប័នហិរញ្ញវត្ថុនានា ក្នុងប្រទេសកម្ពុជាដើម្បីផ្ដល់ជម្រើសឲ្យកាន់តែច្រើនថែមទៀតជូនប្រជាពលរដ្ឋ ក្នុងការទូទាត់ថ្លៃសេវាសាធារណៈ ចំណេញពេលវេលា និងដើម្បីកាត់បន្ថយការចំណាយក្រៅផ្លូវការនានាផងដែរ។ លោកក៏បានស្នើទៅភាគីធនាគារសិក្សាអំពីនីតិវិធី និងបច្ចេកទេសជាមួយនាយកដ្ឋានព័ត៌មានវិទ្យា និងទំនាក់ទំនងសាធារណៈ របស់ក្រសួងសាធារណការ និងដឹកជញ្ជូន ក្នុងការតភ្ជាប់រវាងប្រព័ន្ធទាំងពីរ៕
Tag:
សេវាសាធារណ
© រក្សាសិទ្ធិដោយ thmeythmey.com
