លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា បានបង្ហាញការគាំទ្រចំពោះគម្រោងបង្កើតក្លិបបាល់ទាត់ពិសេសសម្រាប់ត្រៀមការប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ លោកយល់ថា បាល់ទាត់ជាប្រភេទកីឡាមួយ ដែលអាចទាក់ទាញប្រជាប្រិយខ្លាំងជាងគេក្នុងព្រឹត្តិការណ៍កីឡាស៊ីហ្គេមទាំងមូល បើកីឡានេះឈ្នះមេដាយមាស។
អគ្គលេខាធិការនៃគណៈកម្មាធិការជាតិអូឡាំពិកកម្ពុជាលោក វ៉ាត់ ចំរើន បានមានប្រសាសន៍ថា បើកីឡាបាល់ទាត់ឈ្នះមេដាយមាសប្រៀបដូចឈ្នះអ្វីៗទាំងអស់ក្នុងព្រឹត្តិការណ៍កីឡាស៊ីហ្គេម។ ការលើកឡើងបែបនេះដ្បិតលោកយល់ថា បាល់ទាត់ជាប្រភេទកីឡាប្រជាប្រិយភាព ដែលទាក់ទាញការចាប់អារម្មណ៍ខ្លាំងជាងគេពីទស្សនិកជន ឬអ្នកគាំទ្រ។
«បាល់ទាត់ជាប្រភេទកីឡាមួយ ដែលអូសទាញប្រជាប្រិយភាព និងអូសទាញ៥០ភាគរយនៃបច្ចេកទេសទាំងមូលក្នុងស៊ីហ្គេម បានន័យថាបើបាល់ទាត់ឈ្នះ អ្វីៗក៏ឈ្នះដែរ»។ លោក វ៉ាត់ ចំរើន ថ្លែងបែបនេះក្នុងបទសម្ភាសជាមួយអ្នកសារព័ត៌មានក្រោយសន្និបាតបូកសរុបការងារប្រចាំឆ្នាំ២០១៩ របស់សហព័ន្ធកីឡាបាល់ទាត់កម្ពុជា កាលពីថ្ងៃទី៨ ខែមិថុនា ឆ្នាំ២០២០។
អគ្គលេខាធិការ NOCC រូបនេះបានបន្ថែមថា ភាពជោគជ័យរបស់កីឡាបាល់ទាត់នឹងរួមចំណែកធ្វើឲ្យព្រឹត្តិការណ៍កីឡាស៊ីហ្គេមកាន់តែមានតម្លៃសម្រាប់ប្រទេសជាម្ចាស់ផ្ទះ។ ជាក់ស្តែងវៀតណាម ទទួលបានការគាំទ្រ និងចាប់អារម្មណ៍យ៉ាងខ្លាំងពីមជ្ឈដ្ឋានអន្តរជាតិពេលពួកគេធ្វើជាម្ចាស់ផ្ទះការប្រកួតកីឡាស៊ីហ្គេមឆ្នាំ២០០៣។ ការទទួលបានការចាប់អារម្មណ៍របស់វៀតណាមបន្ទាប់ពីក្រុមបាល់ទាត់បុរសនៃប្រទេសនេះ ដណ្តើមបានមេដាយប្រាក់ និងក្រុមបាល់ទាត់នារីដណ្តើមបានមេដាយមាស។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិរៀបចំការប្រកួតកីឡាស៊ីហ្គេមផងនោះ បានបង្ហាញការគាំទ្រយ៉ាងខ្លាំងចំពោះគម្រោងបង្កើតក្លិបបាល់ទាត់ស្នូល សម្រាប់ត្រៀមប្រកួតកីឡាស៊ីហ្គេមឆ្នាំ២០២៣ របស់សហព័ន្ធកីឡាបាល់ទាត់កម្ពុជា។ តាមរយៈគម្រោងនេះ លោក រំពឹងថា កីឡាបាល់ទាត់នឹងទទួលបានជោគជ័យពេលកម្ពុជាធ្វើជាម្ចាស់ផ្ទះកីឡាស៊ីហ្គេម។
លោក សៅ សុខា ប្រធានសហព័ន្ធកីឡាបាល់ទាត់កម្ពុជាបានប្រកាសក្នុងសន្និបាតបូកសរុបការងារក្នុងឆ្នាំ២០១៩ និងដាក់ផែនការអនុវត្តក្នុងឆ្នាំ២០២០ថា សហព័ន្ធគ្រោងនឹងបង្កើតក្លិបបាល់ទាត់ពិសេសមួយដើម្បីបណ្តុះបណ្តាលក្រុមកីឡាករជម្រើសជាតិ សម្រាប់ត្រៀមការប្រកួតកីឡាស៊ីហ្គេមឆ្នាំ២០២៣។ លោកបានបញ្ជក់ថា កីឡាករក្នុងក្លិប ដែលគ្រោងបង្កើតនេះ គឺចម្រាញ់ចេញពីតាមក្លិប ដែលជាសមាជិករបស់សហព័ន្ធ។
«សហព័ន្ធកីឡាបាល់ទាត់កម្ពុជាមានគម្រោង និងផែនការមួយ គឺការត្រៀមរៀបចំក្រុមជម្រើសជាតិកម្ពុជាតាំងពីពេលឥឡូវទៅសម្រាប់លេងនៅឆ្នាំ២០២៣(ស៊ីហ្គេមលើកទី៣២) គឺការបង្កើតក្លិបបាល់ទាត់ស្នូលមួយ»។ នេះជាការបញ្ជាក់របស់លោក សៅ សុខា ដែលបានបន្ថែមថា ក្រោយក្លិបនេះត្រូវបានបង្កើតឡើង នឹងដាក់ឲ្យលេងក្នុងពានរង្វាន់លីគកំពូលជំនួសក្រុមយុវជនអាយុក្រោម១៨ឆ្នាំបាទី។ តែយ៉ាងណា នេះគ្រាន់តែជាការគ្រោងទុកប៉ុណ្ណោះ ហើយការបង្កើតក្លិបជាក់ស្តែងអាចដំណើរការទៅបាន គឺអាស្រ័យលើការឯកភាពពីក្លិបនីមួយៗ។
យ៉ាងណាក្តី លោក វ៉ាត់ ចំរើន ចាត់ទុកគម្រោងរបស់សហព័ន្ធកីឡាបាល់ទាត់កម្ពុជា គឺជាគំរូមួយដ៏ល្អសម្រាប់សហព័ន្ធផ្សេងៗក្នុងការអភិវឌ្ឍធនធាន ដើម្បីឈានទៅសម្រេចភាពជោគជ័យក្នុងព្រឹត្តិការណ៍កីឡាស៊ីហ្គេម៕