COVID-19
ជាតិ
កម្ពុជា បកស្រាយថា យុវជនវៀតណាម ដែលឆ្លងកូវីដនោះ មិនធ្លាប់នៅកម្ពុជាទេ
លោក ម៉ម ប៊ុនហេង រដ្ឋមន្រ្តីក្រសួងសុខាភិបាល (រូបពី AFP)
×![]()
ដោយ: សារព័ត៌មានថ្មីៗ
បន្ទាប់ពីអ្នកនាំពាក្យ ចេញមកបដិសេធម្តងជាពីរដងជាមួយប្រព័ន្ធផ្សព្វផ្សាយក្នុងស្រុករួចមក ក្រសួងសុខាភិបាលកម្ពុជា ក៏ចេញសេចក្តីថ្លែងការណ៍ជាផ្លូវការ ដើម្បីបដិសេធនឹងសារព័ត៌មានរបស់វៀតណាមឈ្មោះ Luatvetnam ដែលចុះផ្សាយកាលពីប៉ុន្មានថ្ងៃមុនថា យុវជនជនជាតិវៀតណាមវ័យ១៨ឆ្នាំម្នាក់ បានឆ្លងជំងឺកូវីដ-១៩ ក្រោយចេញពីកម្ពុជា តាមច្រក Thuong Phuon ទៅដល់វៀតណាមវិញ។ 
សេចក្តីថ្លែងការណ៍ ដែលចេញដោយលោក ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជា នៅថ្ងៃទី១១ ខែមិថុនា ឆ្នាំ២០២០ បកស្រាយបែបនេះថា៖«ក្រុមការងាររបស់ក្រសួងសុខាភិបាលកម្ពុជា និងមន្ទីរសុខាភិបាលរាជធានី-ខេត្តទាំងអស់ ជាពិសេសខេត្តព្រៃវែង បានស្រាវជ្រាវដោយយកចិត្តទុកដាក់បំផុត ក៏ប៉ុន្តែមិនមានបុគ្គលជនជាតិវៀតណាមខាងលើនេះ នៅកម្ពុជា ឬចេញតាមច្រកដូចបានលើកឡើងក្នុងសារព័ត៌មានខាងលើនេះ ចេញទៅវៀតណាមនោះដែរ»។
មុនចេញសេចក្តីថ្លែងការណ៍ អ្នកស្រី ឱ វណ្ឌឌីន អ្នកនាំពាក្យក្រសួងសុខាភិបាលកម្ពុជា ធ្លាប់បំភ្លឺទៅកាន់អ្នកកាសែតដូច្នេះថា៖«នេះមិនមែនជាលើកទីមួយទេ ច្រើនលើកហើយ ដែលវៀតណាមធ្វើបែបនេះ។ នេះជាជនជាតិវៀតណាម ដែលរស់នៅលើទឹកដីវៀតណាម មានផ្ទះសម្បែងនៅវៀតណាម ហើយយើងស្រាវជ្រាវមិនមានបុគ្គលនេះ នៅក្នុងព្រះរាជាណាចក្រកម្ពុជាទេ»។
មិនមែនតែសារព័ត៌មាន Luatvetnam ទេ សារព័ត៌មានផ្សេងទៀតរបស់វៀតណាម ដូចជា VN Express ជាដើម ក៏ចុះផ្សាយដែរ កាលពីថ្ងៃទី៨ ខែមិថុនា ឆ្នាំ២០២០។ បើតាម VN Express ពេលទៅដល់វៀតណាមវិញ យុវជននោះ ត្រូវបានដាក់ឲ្យនៅដាច់ឡែករយៈពេល១៤ថ្ងៃ និងឆ្លងកាត់ការធ្វើតេស្តរកជំងឺកូវីដ-១៩។
VN Express សរសេរថា ពេលធ្វើតេស្តលើកដំបូង យុវជននោះ មិនមានជំងឺកូវីដ-១៩ឡើយ ប៉ុន្តែពេលធ្វើតេស្តលើកពីរ ក៏រកឃើញជំងឺកូវីដ-១៩។ សារព័ត៌មាននេះ បានចុះផ្សាយតាមសេចក្តីជូនដំណឹងរបស់ក្រសួងសុខាភិបាលវៀតណាម។
កាលពីពាក់កណ្តាលខែឧសភា ឆ្នាំ២០២០ សារព័ត៌មានវៀតណាមមួយឈ្មោះ Viet Nam News ធ្លាប់ផ្សាយថា បុរសជនជាតិវៀតណាមម្នាក់ បានឆ្លងជំងឺកូវីដ-១៩ ពេលចេញពីកម្ពុជា តែកាលនោះ កម្ពុជា បានបដិសេធដូចពេលនេះដែរ។
សេចក្តីថ្លែងការណ៍របស់ក្រសួងសុខាភិបាលកម្ពុជា បំភ្លឺថា មកដល់ពេលនេះ មិនមានរបាយការណ៍ផ្លូវការណាមួយស្តីពីករណីយុវជនវៀតណាមវ័យ១៨ឆ្នាំនោះ ត្រូវបានផ្តល់ដោយអាជ្ញាធរសុខាភិបាលវៀតណាម តាមប្រព័ន្ធរាយការណ៍ឲ្យគ្នាទៅវិញទៅមក (EOC) ក្នុងបណ្តាប្រទេសអាស៊ាននោះទេ។
EOC (Emergency Operations Centre) ជាប្រព័ន្ធឬបណ្តាញមួយ ដែលប្រទេសក្នុងតំបន់អាស៊ានប្រើប្រាស់ ដើម្បីផ្តល់ព័ត៌មានឬរាយការណ៍ឲ្យគ្នាទៅវិញទៅមកអំពីជំងឺឆ្លងថ្មីៗ ជាពិសេសជំងឺកូវីដ-១៩ ដែលទើបនឹងផ្ទុះចេញពីប្រទេសចិន កាលពីចុងឆ្នាំ២០១៩ ហើយឈានដល់ពាក់កណ្តាលឆ្នាំ២០២០នេះ វា បានឆ្លងទៅមនុស្សជាង៧,៤លាននាក់ហើយ នៅលើពិភពលោក។
ក្រសួងសុខាភិបាលកម្ពុជា អះអាងទៀតថា ការចុះផ្សាយរបស់វៀតណាម បង្ហាញថា យុវជនវៀតណាមរូបនោះ រស់នៅក្នុងឃុំថុងហ្វុក ស្រុកហ្វៀនហុងងឺ ខេត្តដុងថាប់ ប្រទេសវៀតណាម ដូច្នេះមិនមែនរស់នៅក្នុងប្រទេសកម្ពុជាឡើយ ហើយការឆ្លងនោះ គឺឆ្លងនៅប្រទេសវៀតណាមតែម្តង។
ក្រសួងសុខាភិបាលកម្ពុជា បន្តថា គ្រប់ព័ត៌មានដែលក្រសួងបានឃើញ ក្រុមការងាររបស់ក្រសួង តែងស្រាវជ្រាវ ដោយរុករកយ៉ាងហ្មត់ចត់។
តាមរយៈសេចក្តីថ្លែងការណ៍របស់ខ្លួនដដែល ក្រសួងសុខាភិបាលកម្ពុជា អំពាវនាវឲ្យភាគីវៀតណាម គោរពតាមបទដ្ឋានបច្ចេកទេសនិងគោលការណ៍និយ័តកម្មអន្តរជាតិលើករណីជំងឺឆ្លង មុននឹងធ្វើសេចក្តីសន្និដ្ឋានឬចុះផ្សាយ ដែលប៉ះពាល់ធ្ងន់ធ្ងរដល់ការប្រឹងប្រែងរបស់កម្ពុជា ក្នុងដំណាក់កាលប្រយុទ្ធប្រឆាំងនឹងជំងឺកូវីដ-១៩ ដើម្បីប្រយោជន៍ដល់ប្រជាជននៃប្រទេសទាំងពីរ។ យ៉ាងណា ក្រសួងសុខាភិបាលកម្ពុជា ប្រកាសថា នៅតែប្រកាន់ជំហរសហប្រតិបត្តិការល្អជាមួយវៀតណាម ដើម្បីទប់ស្កាត់នឹងជំងឺកូវីដ-១៩។
ដើម្បីបង្ការការរាលដាលជំងឺកូវីដ-១៩ កម្ពុជា-វៀតណាម បានសម្រេចរួមគ្នាបិទច្រកចេញចូលទាំងបី គឺផ្លូវគោក ផ្លូវទឹក និង ផ្លូវអាកាស មិនឲ្យប្រជាជនធ្វើដំណើរចេញចូលប្រទេសទាំងពីរឡើយ លើកលែងតែការនាំចូលទំនិញ។
មកដល់ថ្ងៃទី១១ ខែមិថុនា ឆ្នាំ២០២០ កម្ពុជា រកឃើញអ្នកឆ្លងជំងឺកូវីដ-១៩ ១២៦នាក់ ជាសះស្បើយ១២៥នាក់ ហើយវៀតណាម មានអ្នកឆ្លង៣៣២នាក់ ជាសះស្បើយ៣២០នាក់។ កម្ពុជានិងវៀតណាម មិនមានអ្នកស្លាប់ដោយសារជំងឺកូវីដ-១៩ឡើយ៕
Tag:
កម្ពុជា-វៀតណាម
COVID-19
© រក្សាសិទ្ធិដោយ thmeythmey.com
