កីឡាជាតិ
ជាតិ
លោក វ៉ាត់ ចំរើន៖ ពិធីបើក-បិទព្រឹត្តិការណ៍ស៊ីហ្គេម ជាឱកាសបង្ហាញសក្តានុពលកម្ពុជា
× លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា(NOCC)បានមានប្រសាសន៌ថា ពិធីបើក-បិទព្រឹត្តិការណ៍ស៊ីហ្គេមឆ្នាំ២០២៣ ជាឱកាសបង្ហាញសក្តានុពលកម្ពុជា។ ចិន នឹងជួយកម្ពុជាក្នុងការរៀបចំពិធីបើក-បិទជាប្រវត្តិសាស្ត្រនេះ។
ពិធីបើកបិទព្រឹត្តិការណ៍កីឡាស៊ីហ្គេមឆ្នាំ២០២៣ មិនមែនគ្រាន់តែដើម្បីបញ្ជាក់ពីការចាប់ផ្តើម និងបញ្ចប់នៃព្រឹត្តិការណ៍នោះទេ តែវាជាឱកាសដើម្បីបង្ហាញពីសក្តានុពលលើវិស័យនានារបស់កម្ពុជាទៅកាន់ពិភពលោក។ ដ្បិតព្រឹត្តិការណ៍នេះ មិនមែនមានតែប្រជាជនកម្ពុជា និងបណ្តាប្រទេសក្នុងតំបន់អាស៊ានទស្សនានោះទេ សូម្បីប្រជាជនតាមបណ្តាប្រទេសជាច្រើនលើពិភពលោកក៏ទស្សនាពិធីនេះដែរ។ នេះបើតាមការលើកឡើងរបស់លោក វ៉ាត់ ចំរើន អគ្គលេខាធិការនៃ CAMSOC។
ទិដ្ឋភាពពេលបើកការប្រកួតកីឡាជាតិលើកទី២
ក្នុងបទសម្ភាសជាមួយអ្នកសារព័ត៌មានក្រោយកិច្ចប្រជុំប្រចាំសប្តាហ៍របស់ CAMSOC លោក វ៉ាត់ ចំរើន បានបញ្ជាក់យ៉ាងដូច្នេះថា៖«យើងផ្តោតសំខាន់លើការរៀបចំគ្រោងឆ្អឹង ឬផែនការនៃពិធីបើកបិទ(ស៊ីហ្គេម)ដែលជាពិធីដ៏មានសារសំខាន់ និងជាពិធីដើម្បីបង្ហាញសក្តានុពលជាតិ វប្បធម៌ជាតិ សេដ្ឋកិច្ចជាតិ និងទេសចរណ៍ជាដើម។ ពិធីបើកបិទនេះ ក៏ជាកំណត់ត្រាប្រវត្តិសាស្ត្ររបស់កម្ពុជាផងដែរ»។
ទន្ទឹមនឹងអះអាងពីការរៀបចំរួចរាល់នៃគ្រោង និងផែនការក្នុងការរៀបចំពិធីបើក និងពិធីបិទ លោក វ៉ាត់ ចំរើន ជំរុញគណៈកម្មការជំនាញទទួលបន្ទុកលើបញ្ហានេះ ឲ្យរៀបចំផែនការលម្អិតតាមកម្មវិធីនីមួយៗឲ្យបានរួចរាល់ ដោយអនុវត្តចាប់ពីពេលនេះតទៅ។ ការជំរុញនេះ ដោយសារលោកចង់ឲ្យគម្រោង និងផែនការទាំងនោះចាប់បានបញ្ជូននៅកាន់រាជរដ្ឋាភិបាល ដើម្បីអនុម័ត។
«យើងកំពុងរៀបចំផែនការគ្រោងមួយ ដែលជាដំណើរវិវត្តពីមួយជំហានទៅមួយជំហានពាក់ព័ន្ធនឹងការរត់ភ្លើងគុប តើយើងត្រូវទទួលភ្លើងគុប ឬភ្លើងអាទិទេពយ៉ាងដូចម្តេច? ហើយ ថាតើពិធីបើកបិទត្រូវមានទស្សនីយភាពអ្វីខ្លះ ដើម្បីបង្ហាញសក្តានុពលសេដ្ឋកិច្ច និងជាតិទាំងមូល។ មួយវិញទៀត យើងត្រូវរៀបចំយ៉ាងណា ដើម្បីឲ្យពិធីបើកបិទមានការចាប់អារម្មណ៍»។ នេះជាការលើកឡើងរបស់លោក វ៉ាត់ ចំរើន ដែលបានបន្ថែមថា ចិននឹងជួយផ្នែកបច្ចេកទេសសំឡេង និងបច្ចេកវិទ្យាមួយចំនួនក្នុងការរៀបចំពិធីបើកបិទព្រឹត្តិការណ៍កីឡាស៊ីហ្គេមនៅឆ្នាំ២០២៣៕
Tag:
វ៉ាត់ ចំរើន
SEA Games 2023
© រក្សាសិទ្ធិដោយ thmeythmey.com