COVID-19
អន្តរជាតិ
ឡាវ ប្រកាសពីជ័យជម្នះលើ COVID-19 បន្ទាប់ពីអស់អ្នកជំងឺ និងគ្មានករណីឆ្លង៥៩ថ្ងៃ លោកនាយករដ្ឋមន្រ្តីឡាវ ថុងលួន ស៊ីសូលីត ប្រកាសពីភាពជោគជ័យលើ COVID-19។ រូបភាព៖ Laotian Times
× ឡាវ បានទទួលជ័យជម្នះលើCOVID-19 យ៉ាងធំធេង បន្ទាប់ពីព្យាបាលអ្នកជំងឺCOVID-19 ឲ្យអស់ពីមន្ទីរពេទ្យ និងមិនមែនករណីឆ្លងថ្មីរយៈពេល ៥៩ថ្ងៃ។ លោកនាយករដ្ឋមន្ត្រីឡាវ ថងលួន ស៊ីសូលីត ប្រកាសបែបនេះ នៅថ្ងៃទី១០ ខែមិថុនា។ ខណៈឡាវ មិនបានរាយការណ៍ពីករណីឆ្លង COVID-19 ថ្មីនៅក្នុងប្រទេសក៏ពិតមែន លោកនាយករដ្ឋមន្ត្រីបានអំពាវនាវឲ្យប្រជាជនប្រុងប្រយ័ត្នជានិច្ច ព្រោះជំងឺឆ្លងសកលមួយនេះ កំពុងអុកឡុកប្រទេសដទៃ។
នាថ្ងៃ៩ ខែមិថុនា ឡាវបានរាយការណ៍ថា ខ្លួនអស់អ្នកជំងឺ COVID-19 ហើយ បន្ទាប់អ្នកជំងឺចុងក្រោយគេត្រូវបានអនុញ្ញាតឲ្យចាកចេញពីមន្ទីរពេទ្យ។ បន្ថែមពីលើនេះ ឡាវមិនមានករណីឆ្លងCOVID-19 ថ្មីឡើយ បើគិតចាប់តាំងពីថ្ងៃទី១២ ខែមេសា។
ទាក់ទិននឹងលទ្ធផលដ៏វិជ្ជមានមួយនេះ នាយករដ្ឋមន្ត្រីឡាវ លោក ថងលួន ស៊ីសូលីត នាសន្និសីទកាសែតមួយ ប្រកាសថា ឡាវបានទទួលជ័យជម្នះយ៉ាងសំខាន់បំផុត នៅក្នុងយុទ្ធនាការប្រឆាំងសត្រូវដ៏ខ្លាំងមួយ។ ក្នុងន័យនេះ លោកនាយករដ្ឋមន្ត្រីឡាវ បានហៅ COVID-19 ថា គឺជាសត្រូវដ៏អាក្រក់ ព្រោះវាបានរាតត្បាតទៅប្រទេស និងតំបន់ជាច្រើន និងបានសម្លាប់មនុស្សជាច្រើនម៉ឺននាក់។ នេះបើតាមការចុះផ្សាយរបស់សារព័ត៌មាន Laotian Times។
តាមរយៈជ័យជម្នះលើ COVID-19 លោកនាយករដ្ឋមន្ត្រីវ័យ ៧៤ឆ្នាំរូបនេះ បានសរសើរគ្រប់ភាគីពាក់ព័ន្ធទាំងអស់ ដូចជាប្រជាជន គណៈកម្មាធិការកិច្ចការជាតិទទួលបន្ទុកការទប់ស្កាត់ និងបង្ការ COVID-19 និងភាគីផ្សេងទៀត ដែលរួមសហការគ្នា និងចេញសេចក្តីណែនាំទាំងឡាយ។ មិនត្រឹមតែភាគីពាក់ព័ន្ធឡើយ វិធានការរក្សាគម្លាតសុវត្ថិភាព ការបិទព្រំដែន និងបិទប្រទេស ក៏ជាវិធានការដ៏សំខាន់មួយផងដែរ នៅក្នុងការទប់ស្កាត់ COVID-19។
ក្រៅពីការលើកឡើងពីជ័យជម្នះលើCOVID-19 លោក ថងលួន ក៏បានអំពាវនាវឲ្យប្រជាជនទាំងអស់ ត្រូវតែរក្សាអនាម័យ និងវិធានការផ្សេងៗ ដែលបានដាក់ចេញដោយរដ្ឋាភិបាល ដើម្បីទប់ស្កាត់ការរាតត្បាតនៃ COVID-19 បន្តទៀត ព្រោះជំងឺឆ្លងសកលមួយនេះ នៅតែបន្តអុកឡុកពិភពលោកដដែល ហើយរលកទី២ នៃកូរ៉ូណាវីរុស ក៏ចាប់ផ្តើមដែរ។
បើទោះបីជាឡាវគ្មាន COVID-19 ទៀតក៏ដោយ ប៉ុន្តែរដ្ឋាភិបាល នៅតែបន្តប្រុងប្រយ័ត្នជានិច្ចជាមួយ COVID-19 ជាពិសេសរដ្ឋាភិបាល នឹងដាក់ចេញចំណាត់ការថ្មីៗបន្ថែមទៀត ដើម្បីកាត់បន្ថយផលប៉ះពាល់ទៅលើប្រជាជន។
សូមបញ្ជាក់ថា ឡាវ បិទប្រទេសតាំងពីថ្ងៃទី៣០ ខែមីនាមកម្លេះ បន្ទាប់ពីរកឃើញ COVID-19 ប៉ុន្មានករណីនៅក្នុងប្រទេស ដោយមានភ្ជាប់ជាមួយវិធានការហាមឃាត់មួយចំនួនទៀត ដើម្បីទប់ស្កាត់ការរាតត្បាតនៃ COVID-19។ រយៈពេលចុងក្រោយនេះ ឡាវបានបន្ធូរបន្ថយការរឹតត្បិតមួយចំនួនហើយ ដូចជាបើកផ្សាររាត្រី ភោជនីយដ្ឋាន ព្រឹត្តិការណ៍កីឡាជាដើម៕
© រក្សាសិទ្ធិដោយ thmeythmey.com