វៀតណាម គ្រោងបើកជើងហោះហើរជាមួយកម្ពុជាវិញ នៅខែក្រោយ

ជាតិ

សង្គមជាតិ

វៀតណាម គ្រោងបើកជើងហោះហើរជាមួយកម្ពុជាវិញ នៅខែក្រោយ

12, Jun 2020 , 8:59 am

រូបភាព

រូបពី Zingnews

ដោយ: សារព័ត៌មានថ្មីៗ

ក្រុមហ៊ុនអាកាសចរណ៍វៀតណាម (Vietnam Airlines) ប្រកាសថា មានគម្រោងបើកជើងហោះហើរជាមួយកម្ពុជានិងឡាវឡើងវិញ ចាប់ពីថ្ងៃទី២ ខែកក្កដា ឆ្នាំ២០២០ទៅ។ នេះបើតាមព័ត៌មាន ដែលបង្ហោះលើទំព័រហ្វេសប៊ុករបស់ស្ថានទូតវៀតណាមប្រចាំកម្ពុជា ដែលស្រង់យកពីការចុះផ្សាយរបស់សារព័ត៌មានវៀតណាមឈ្មោះ Xingnews នៅថ្ងៃទី១១ ខែមិថុនា។

ស្ថានទូតវៀតណាម បកប្រែពីភាសាវៀតណាម ដែលផ្សាយដោយ Zingnews មកជាភាសាខ្មែរថា ចាប់ពីថ្ងៃទី២ ខែកក្កដាទៅ គឺអាចមាន៧ជើងហោះហើរ ក្នុង១ថ្ងៃ គឺជើងហោះហើររវាងទីក្រុងហាណូយ ប្រទេសវៀតណាម និងទីក្រុងវៀនច័ន្ទ ប្រទេសឡាវ ជើងហោះហើររវាងទីក្រុងវៀងច័ន្ទ និងរាជធានីភ្នំពេញ និង ជើងហោះហើររវាងរាជធានីភ្នំពេញ និងទីក្រុងហូជីមិញ។

តំណាងក្រុមហ៊ុន Vietnam Airlines លើកឡើងថា កាលបរិច្ឆេទនៃគម្រោងហោះហើរនេះ គឺជាផែនការរបស់ក្រុមហ៊ុន។ តំណាងរូបនោះ បន្តថា ក្រុមហ៊ុន Vietnam Airlines កំពុងពិភាក្សាលម្អិតជាមួយលេខាធិការដ្ឋានអាកាសចរស៊ីវិលវៀតណាម បណ្តាក្រសួងគមនាគមនិងដឹកជញ្ជូន ក្រសួងការបរទេស និងក្រសួងសុខាភិបាលវៀតណាម ដើម្បីរកវិធានការបើកជើងហោះហើរឡើងវិញ តាមការគ្រោងទុក។

តំណាង Vietnam Airlines បញ្ជាក់ថា ក្រុមហ៊ុន នឹងចេញសេចក្តីជូនដំណឹងជាផ្លូវការពីការបើកជើងហោះហើរនេះ ក្រោយមានឯកភាពចុងក្រោយជាមួយនឹងបណ្តាភាគីពាកព័ន្ធ។

លោក ជា អូន អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលកម្ពុជា ប្រាប់សារព័ត៌មានថ្មីៗ តាមទូរស័ព្ទ នៅរសៀលថ្ងៃទី១១ ខែមិថុនា ថា មិនមែនតែក្រុមហ៊ុនវៀតណាមទេ ក្រុមហ៊ុនបរទេសផ្សេងទៀត ក៏ចង់បើកជើងហោះហើរឡើងវិញជាមួយកម្ពុជាដែរ។

អ្នកនាំពាក្យរូបនេះ ថ្លែងថា បើក្រុមហ៊ុនហោះជើងវៀតណាម សម្រេចបើកដំណើរការឡើងវិញ ភាគីកម្ពុជា ប្រហែលមិនបដិសេធទេ តែរាល់ភ្ញៀវ ដែលមកដល់ ត្រូវឆ្លងកាត់ពិនិត្យសុខភាព តាមការណែនាំរបស់ក្រសួងសុខាភិបាល។ លោក មានប្រសាសន៍ថា៖«យើង អត់ដែលហាមឃាត់ណា»។

លោក បន្ថែមថា ស្ថានភាពជំងឺកូវីដ-១៩ នៅវៀតណាមនិងនៅឡាវ មិនសូវធ្ងន់ធ្ងរឡើយ។ លើសពីនេះ លោក មើលឃើញថា ប្រទេសទាំង២នេះ ទប់ស្កាត់ជំងឺកូវីដ-១៩ បានល្អ។

លោក អះអាងទៀតថា បច្ចុប្បន្ន ភ្ញៀវដែលធ្វើដំណើរតាមជើងហោះហើរមកកម្ពុជា មានចំនួនច្រើនជាងមុនបន្តិច។ លោក បញ្ជាក់ថា៖«ឥឡូវ មិនសូវស្ងាត់ទេ»។

សូមរម្លឹកថា កាលអំឡុងខែមីនា ឆ្នាំ២0២0 កម្ពុជា សម្រេចបិទច្រកទាំង៣ជាមួយវៀតណាម គឺទាំងផ្លូវគោក ផ្លូវទឹក និង ផ្លូវអាកាស ដោយមិនឲ្យពលរដ្ឋនៃប្រទេសទាំង២ ធ្វើដំណើរចេញចូល ដើម្បីបង្ការការរាលដាលជំងឺកូវីដ-១៩។ ជាមួយថៃ កម្ពុជា បិទតែព្រំដែកផ្លូវគោកប៉ុណ្ណោះ។ យ៉ាងណា ប្រទេសទាំង៣ នៅអាចដឹកជញ្ជូនទំនិញចេញចូលជាធម្មតា ក្រោមការពិនិត្យគ្នាទៅវិញទៅមកយ៉ាងហ្មត់ចត់។

មកដល់ថ្ងៃទី១១ ខែមិថុនា ឆ្នាំ២0២0 កម្ពុជា មានអ្នកឆ្លងជំងឺកូវីដ-១៩ ១២៦នាក់ ជាសះស្បើយ១២៥នាក់ ឡាវ មានអ្នកឆ្លង១៩នាក់ ជាសះស្បើយទាំង១៩នាក់ វៀតណាម មានអ្នកឆ្លង ៣៣២នាក់ ជាសះស្បើយ៣២0នាក់ ហើយ ថៃ មានអ្នកឆ្លងជាង៣ពាន់នាក់ ជាសះស្បើយជិត៣ពាន់នាក់ ស្លាប់៥៨នាក់។ កម្ពុជា ឡាវ និង វៀតណាម គ្មានអ្នកស្លាប់ដោយសារជំងឺកូវីដ-១៩នោះទេ៕