ពុលស្រា តាំង គួយ៖ អ្នកស្លាប់កើនឡើង៧នាក់ ហើយអ្នកសម្រាកនៅមន្ទីរពេទ្យ កើនដល់៣៤នាក់

ជាតិ

ពុលស្រា តាំង គួយ៖ អ្នកស្លាប់កើនឡើង៧នាក់ ហើយអ្នកសម្រាកនៅមន្ទីរពេទ្យ កើនដល់៣៤នាក់

12, Jun 2020 , 4:35 pm

រូបភាព

លោក អ៊ុំ រាត្រី អភិបាលខេត្តបន្ទាយមានជ័យ ដឹកនាំកិច្ចប្រជុំនាពេលកន្លងមក (រូបពីទំព័រហ្វេសប៊ុករបស់លោក អ៊ុំ រាត្រី)

ដោយ: ឡាយ សុភាវតី

ភ្នំពេញ៖ អ្នកពិសាស្រាថ្នាំប៉ូវកម្លាំងឈ្មោះ តាំង គួយ បានពុលជាបន្តបន្ទាប់ បណ្ដាលឲ្យអ្នកស្លាប់កើនដល់៧នាក់ និង អ្នកកំពុងសម្រាកព្យាបាលនៅមន្ទីរពេទ្យ កើនដល់៣៤នាក់ នៅថ្ងៃទី១២ ខែមិថុនា ឆ្នាំ២០២០នេះ។

លោក ចាន់ សុវាត ប្រធានមន្ទីរសុខាភិបាលខេត្តបន្ទាយមានជ័យ ប្រាប់សារព័ត៌មានថ្មីៗ តាមទូរស័ព្ទនៅរសៀលថ្ងៃនេះថា៖«អ្នកសម្រាកនៅមន្ទីរពេទ្យទាំងអស់មាន៣៤នាក់ ហើយក្នុងចំណោម៣៤នាក់នេះ មាន៣នាក់ ត្រូវបញ្ជូនទៅសង្គ្រោះបន្ទាន់នៅសៀមរាប ប៉ុន្តែមកដល់ពេលនេះ មានស្ថានភាពល្អប្រសើរហើយ»។

អភិបាលខេត្តបន្ទាយមានជ័យ លោក អ៊ុំ រាត្រី អះអាងថា លោក បានបញ្ជាឲ្យកម្លាំងសមត្ថកិច្ចចុះប្រមូលស្រាថ្នាំ តាំង គួយ និងចាត់វិធានការផ្សព្វផ្សាយព័ត៌មានពីស្រាមានជាតិពុលនេះ ឲ្យពលរដ្ឋបានដឹងផងដែរ។

លោក អ៊ុំ រាត្រី ដែលផ្តល់បទសម្ភាសដល់សារព័ត៌មានថ្មីៗ តាមទូរស័ព្ទដែរនោះ មានប្រសាសន៍ថា៖«ទីតាំងធំ ដែលចែកចាយស្រា តាំង គួយ គឺនៅភ្នំពេញ។ សមត្ថកិច្ច នឹងបន្តតាមដានលើរឿងនេះ»។

ករណីពុលស្រានេះ បានកើតឡើងតាំងថ្ងៃទី៧ ខែមិថុនាមក នៅស្រុកម៉ាឡៃ ស្រុកមង្គលបូរី និង ក្រុងប៉ោយប៉ែត ខេត្តបន្ទាយមានជ័យ។ នៅថ្ងៃម្សិលមិញ (១១មិថុនា) អាជ្ញាធរ ផ្តល់ព័ត៌មានថា មានពលរដ្ឋ៤នាក់ស្លាប់ និង២៧នាក់ ត្រូវបញ្ជូនទៅមន្ទីរពេទ្យ។

ក្រោយមានករណីនេះ លោក អ៊ុំ រាត្រី ក៏ប្រញាប់ចេញជូនដំណឹង ដោយប្រាប់ឲ្យអាជីវករទាំងអស់ក្នុងខេត្តបន្ទាយមានជ័យ ផ្អាកលក់ស្រាថ្នាំ តាំង គួយ។ លោក លើកឡើង ក្នុងសេចក្តីជូនដំណឹងថា មន្ទីរជំនាញ កំពុងយកវត្ថុតាងទៅធ្វើតេស្តរកសារធាតុផ្សំ។

មកដល់ថ្ងៃទី១២ ថិមុនានេះ មន្ត្រីពាក់ព័ន្ធ ដើរប្រមូលស្រាថ្នាំ តាំង គួយ បានជាង១,៣ម៉ឺនដប នៅតាមទីតាំងនានា ក្នុងខេត្តបន្ទាយមានជ័យ។ នេះបើតាមការចុះផ្សាយរបស់អគ្គស្នងការដ្ឋាននគរបាលជាតិ៕

អត្ថបទទាក់ទង

មន្រ្តីដកហូតស្រាថ្នាំ តាំង គួយ ជាង១,៣ម៉ឺនដប ក្រោយមានករណីពុលស្លាប់ នៅបន្ទាយមានជ័យ

ស្លាប់៤នាក់ និងសម្រាកព្យាបាល២៧នាក់ នៅបន្ទាយមានជ័យ ដោយសារផឹកស្រាថ្នាំ តាំង គួយ