ជាតិ
សង្គមជាតិ
ក្រៅពីតំបន់ឆ្នេរ ខេត្តព្រះសីហនុ មានកោះសក្ដានុពលទេសចរណ៍ចំនួន៣២
×
ដោយ៖ ខន ណារី
ភ្នំពេញ៖ ខេត្តព្រះសីហនុ មានឆ្នេរសមុទ្រដែលមានខ្សាច់សក្បុស និងត្រូវបានភ្ញៀវទេសចរស្គាល់ ជាយូរយ៉ាងមកហើយ។ ក្រៅពីតំបន់ឆ្នេរ ខេត្តនេះ ក៏មានកោះតូច-ធំ ដែលពោរពេញដោយសក្តានុពលទេសចរណ៍ចំនួន៣២ និងមានផ្ទៃក្រឡាជាង១៦២ គីឡូម៉ែត្រ មានឆ្នេរសមុទ្រប្រវែង ១៧៥,៨ គីឡូម៉ែត្រ។ នេះបើតាមលោក គួច ចំរើន អភិបាលខេត្តព្រះសីហនុ ដែលបានថ្លែងនៅក្នុងសន្និសីទសារព័ត៌មានពីវឌ្ឍនភាព និងទិសដៅការងាបន្តរបស់ខេត្តភាគនិរតីមួយនេះកាលពីថ្ងៃទី៩ ខែមិថុនា។
បណ្តាតំបន់ទេសចរណ៍តាមឆ្នេរ និងកោះដែលមានអំណោយផលពីធម្មជាតិទាំងនោះរួមមាន ឆ្នេរអូរឈើទាល ឆ្នេរឯករាជ្យ ឆ្នេរសុខាកោះរ៉ុង កោះរ៉ុងសន្លឹម កោះសង្សារ និងកោះពស់ជាដើម។
ដ្បិតមានសក្ដានុពលពីធម្មជាតិ ការអភិវឌ្ឍហេដ្ឋារចនាសម្ព័ន្ធ ផ្លូវល្បឿនលឿនពីភ្នំពេញ-ក្រុងព្រះសីហនុ និងការស្ថាបនាផ្លូវចំនួន៣២ខ្សែក្នុងខេត្តនេះ ក៏រួមចំណែកយ៉ាងធំធេង ក្នុងការទាក់ទាញទេសចរ និងវិនិយោគិនបន្ថែមទៀតដែរ។ នេះបើតាមការបញ្ជាក់របស់លោក គួច ចំរើន ដោយលោកបានបន្តទៀតថា យ៉ាងណាក៏ដោយ នៅតំបន់កោះមួយចំនួន នៅមិនទាន់មានការផ្គត់ផ្គង់ទឹកស្អាត និងអគ្គិសនីគ្រប់គ្រាន់នៅឡើយទេ ដោយសារតែវាមានចម្ងាយឆ្ងាយពីទីប្រជុំជន ដែលតម្រូវឲ្យការវិនិយោគខ្ពស់៕
© រក្សាសិទ្ធិដោយ thmeythmey.com