ជាតិ
អាជីវករ ស្ម័គ្រចិត្តរុះរើតូប ដើម្បីភាពស្រស់ស្អាតនៅមុខអង្គរវត្ត
× សៀមរាប៖ ក្រុមអាជីវករកាន់តែច្រើន បានស្ម័គ្រចិត្តរុះរើសំណង់តូបលក់ដូរនៅបរិវេណមុខប្រាសាទអង្គរវត្ត ដើម្បីទុកលទ្ធភាពឱ្យអាជ្ញាធររៀបចំកែលម្អទីនេះឱ្យកាន់មានរបៀបរៀបរយឡើងវិញ ដែលទីតាំងនេះកន្លងមកមានភាពរញ៉េរញ៉ៃ ដោយសារតូបលក់ដូរមិនមានរបៀប។ ក្រុមអាជីវករដែលស្ម័គ្រចិត្តរុះរើ បានបង្ហាញអារម្មណ៍រីករាយជាមួយនឹងទិដ្ឋភាពថ្មីនៅមុខប្រាសាទអង្គរវត្ត។
សំណង់តូបលក់ដូរប្រមាណជិត១០ហើយ ដែលត្រូវបានម្ចាស់ព្រមព្រៀងរុះរើ ស្របពេលដែលអាជ្ញាធរកំពុងប្រតិបត្តិការកែលម្អបរិវេណមុខប្រាសាទអង្គរវត្ត។ ទីតាំងទាំងនោះ កំពុងរៀបចំសួនច្បារ ការដាំដើមឈើ ពិសេសទីលានបដិសណ្ឋារកិច្ច ដែលប្រមូលផ្តុំដោយអគារជាង២០នៅក្នុងនោះ។ ក្រុមអ្នកលក់ដូរដែលស្ម័គ្រចិត្តរុះរើ នឹងទទួលបានតូបលក់ដូរ នៅពេលដែលសំណង់ទីលានបដិសណ្ឋារកិច្ចថ្មីរួចរាល់នាពេលឆាប់ៗខាងមុខនេះ។
លោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា និងទទួលបន្ទុកកិច្ចការខាងលើនិយាយថា បើគ្មានអ្វីប្រែប្រួលទេនោះ សំណង់ទីលានបដិសណ្ឋារកិច្ចមុខប្រាសាទអង្គរវត្ត គ្រោងនឹងបើកឱ្យអាជីវករលក់ដូរនៅចុងខែ សីហានេះ។ លោកបន្ថែមថា មកដល់បច្ចុប្បន្ននេះកិច្ចការអភិវឌ្ឍនៅមុខអង្គរកំពុងមមាញឹក និងមានអាជីវករកាន់តែច្រើនស្ម័គ្រចិត្តរុះរើ ដោយទុកកន្លែងឱ្យអាជ្ញាធរបំពេញការងារដើម្បីរៀបចំទីធ្លារមុខអង្គរឱ្យមានទិដ្ឋភាពពណ៌បៃតង ស័ក្ដិសមជាបេតិកភណ្ឌរបស់មនុស្សជាតិ។
នៅព្រឹកថ្ងៃទី១០ មិថុនា ម្ចាស់អាជីវករចំនួន២ទៀតដែលមានទីតាំងមុខស្ពានអណ្ដែតទឹក និងជិតបង្គន់អនាម័យ បានស្ម័គ្រចិត្តប្រគល់ទីតាំងឱ្យពង្រីកការអភិវឌ្ឍ។ លោក យិត ចាន់ដារដ្ឋ បានចាត់ទុកសកម្មភាពនេះថាជាគំរូ និងការយល់ពីតម្លៃបេតិកភណ្ឌ។ អគ្គនាយករងអាជ្ញាធរជាតិអប្សរា លើកទឹកចិត្តដល់អាជីវករដទៃទៀតសហការចូលរួមកិច្ចការទាំងនោះ ដើម្បីឱ្យអាជ្ញាធរសម្រេចតាមផែនការដែលគ្រោងទុក។ តាមការបញ្ជាក់ពីលោក យិត ចាន់ដារដ្ឋ សំណង់អាគារ តូបលក់ដូរតូចធំនៅបរិវេណមុខអង្គរវត្ត និងជិតត្រពាំងសេសសរុបមានជាង១០០តូប។
អាជីវករលក់វត្ថុអនុស្សាវរីយ៍ អ្នកស្រី ម៉ោញ រតនា ដែលព្រមរុះរើសំណង់បាននិយាយថា អ្នកស្រីលក់ដូរនៅមុខអង្គរវត្តជិត២០ឆ្នាំមកហើយ។ ការព្រមរុះរើនេះដោយសារអ្នកស្រីចង់ឃើញការអភិវឌ្ឍកាន់តែប្រសើរ និងចង់ឱ្យមុខអង្គរមានទិដ្ឋភាពពណ៌បៃតង ទាក់ទាញភ្ញៀវទេសចរកាន់តែច្រើនឡើង។ អ្នកស្រីបានបង្ហាញអារម្មណ៍រីករាយទៅនឹងការរៀបចំសួនច្បារ និងការដាំដើមឈើធំៗឡើងវិញ ដែលខុសពីមុនមានរថយន្តចូលចតគ្មានសណ្ដាប់ធ្នាប់ ដីហ៊ុយ និងការលក់ដូរគ្មានរបៀបរៀបរយ។ល។
ចំណែកលោក ងាត់ ផល្លីន ម្ចាស់ភោជនីយដ្ឋានមុខស្ពានអណ្ដែតទឹកយល់ថា ការអភិវឌ្ឍតែងមានការប៉ះពាល់បន្ដិចបន្ដួច ហើយលោកយល់ព្រមរើសំណង់ដែលធ្លាប់លក់ច្រើនឆ្នាំមកហើយនេះ ដោយសារចង់ឃើញបរិវេណមុខអង្គរវត្តប្រែមុខមាត់ថ្មី។ លោកបន្ថែមថា៖« ក្នុងនាមខ្ញុំជាអាជីវករ ខ្ញុំស្ម័គ្រចិត្តរុះរើប្រគល់កន្លែងឱ្យអប្សរាយកទៅអភិវឌ្ឍន៍ធ្វើសួន អង្គរវត្តជាបេតិកភណ្ឌរបស់ពិភពលោក យើងត្រូវការមុខមាត់ដើម្បីបង្ហាញពិភពលោកពីអ្វីដែលយើងមាន ការលះបង់ខ្ញុំក៏សោកស្ដាយដែរ តែបើគិតពីប្រយោជន៍ផ្ទាល់ខ្លួន វាមិនកើតទេ ដើម្បីប្រយោជន៍ជាតិ យើងត្រូវលះបង់»៕
Tag:
អង្គរវត្ត
បេតិកភណ្ឌ
© រក្សាសិទ្ធិដោយ thmeythmey.com