កីឡាជាតិ
ជាតិ
កីឡាការិនីប៉េតង់៥រូប ត្រូវបានសហព័ន្ធដាក់ឲ្យប្រកួតការពារកៅអីជម្រើសជាតិ
×![]()
កីឡាការិនីប៉េតង់ជម្រើសជាតិ៥រូប ត្រូវបានសហព័ន្ធកីឡាប៊ូលនិងប៉េតង់កម្ពុជា ដាក់ឲ្យប្រកួតការពារកៅអីជម្រើសជាតិជាមួយកីឡាការិនីមកពីក្លិប-សមាគមតាមបណ្តារាជធានីខេត្តនានា។ នេះជាឱកាសល្អសម្រាប់កីឡាការិនីមកពីតាមបណ្តារាជធានីខេត្ត ដែលចង់ក្លាយជាកីឡាការិនីជម្រើសជាតិ។ 
សហព័ន្ធកីឡាប៊ូល និងប៉េតង់កម្ពុជានៅថ្ងៃទី១០ ខែមិថុនា ឆ្នាំ២០២០ បានចេញសេចក្តីប្រកាសព័ត៌មានមួយស្តីពីការរៀបចំការប្រកួតកីឡាប៉េតង់ជ្រើសរើសកីឡាការិនីជម្រើសជាតិ៥រូប ដើម្បីបង្គ្រប់ចំនួនសម្រាប់ត្រៀមប្រមូលផ្តុំហ្វឹកហាត់ក្នុងក្រុមជម្រើសជាតិនៅឆ្នាំ២០២០។ ការប្រកួតនឹងប្រព្រឹត្តទៅនៅថ្ងៃទី២៧ ខែមិថុនា ឆ្នាំ២០២០ នៅទីលានប៉េតង់ក្នុងពហុកីឡដ្ឋានជាតិ។
នេះជាការប្រកួតការពារកៅអីជម្រើសជាតិ ដ្បិតសហព័ន្ធកីឡាប៊ូល និងប៉េតង់កម្ពុជា នឹងដាក់កីឡាការិនីជម្រើសជាតិ៥រូប ដែលមានពិន្ទុទាបជាងគេក្នុងចំណោមកីឡាការិនីជម្រើសជាតិទាំង១៧រូបឲ្យចូលរួមប្រកួតប្រជែង។ នេះជាការលើកឡើងរបស់លោក ហ៊ឹម ខេមរា សេនាធិការនៃសហព័ន្ធកីឡាប៊ូលនិងប៉េតង់កម្ពុជា តែលោក មិនបញ្ចេញឈ្មោះកីឡាការិនីទាំង៥រូបនេះឡើយ។
នេះជាការឱកាស សម្រាប់កីឡាការិនីមកពីក្លិបសមាគមតាមបណ្តារាជធានី-ខេត្ត ដែលចង់ក្លាយជាកីឡាការិនីជម្រើសជាតិ និងតំណាងឲ្យកម្ពុជានៅលើឆាកអន្តរជាតិ។ កីឡាការិនី ដែលអាចចូលរួមក្នុងការប្រកួតនេះបាន ត្រូវមានកាយសម្បទានគ្រប់គ្រាន់ មានអាយុចន្លោះពី១៨-២៥ឆ្នាំ និងជាកីឡាការិនីមកពីតាមក្លិបសមាគម ដែលជាសមាជិករបស់សហព័ន្ធ។ កីឡាការិនីទាំងអស់ត្រូវប្រកួតប្រជែងគ្នាលើវិញ្ញាសា១នាក់ទល់១នាក់៕
Tag:
ប៉េតង់
© រក្សាសិទ្ធិដោយ thmeythmey.com
