សង្គមអន្តរជាតិ
អន្តរជាតិ
មន្ត្រីប៉េកាំង៖ ច្បាប់សន្តិសុខជាតិ នឹងអនុញ្ញាតឲ្យចិនលូកដៃចូលកិច្ចការហុងកុងលើករណីសន្តិសុខជាតិខ្លះ រូបភាព៖ AFP
× មន្ត្រីជាន់ខ្ពស់ចិន នៅថ្ងៃទី១៥ ខែមិថុនា បានបញ្ជាក់ថា ច្បាប់សន្តិសុខជាតិហុងកុង នឹងផ្តល់យុត្តាធិការដល់រដ្ឋាភិបាលទីក្រុងប៉េកាំង ដើម្បីអន្តរាគមន៍ចូលទៅក្នុងទីក្រុងហុងកុងក្នុងសំណុំរឿងមួយចំនួនដែលនាំឲ្យប៉ះពាល់ដល់សន្តិសុខជាតិ។ ការលើកឡើងបែបនេះ ធ្វើឡើងក្នុងអំឡុងពេលគណៈអចិន្ត្រៃយ៍នៃសភាប្រជាជនចិន កំពុងតាក់តែងសេចក្តីស្នើច្បាប់សន្តិសុខជាតិហុងកុង។
សភាប្រជាជនចិន បានអនុម័តផែនការច្បាប់សន្តិសុខជាតិហុងកុង តាំងពីខែឧសភាកន្លងមកម្លេះ។ ពេលនេះ គណៈអចិន្ត្រៃយ៍នៃសភាប្រជាជនចិន កំពុងទទួលបន្ទុកតាក់តែង សេចក្តីស្នើច្បាប់សន្តិសុខជាតិហុងកុង។ ច្បាប់នេះ នឹងត្រូវគេអនុម័តដោយមិនឆ្លងកាត់សភាហុងកុងឡើយ។ ប្រសិនបើច្បាប់នេះ ចូលជាធរមានមែន វានឹងហាមឃាត់ អំពើក្បត់ជាតិ ការធ្វើអបគមន៍ ការបះបោរ និងវិទ្ធង្សនាប្រឆាំងនឹងរដ្ឋាភិបាលចិនជាដើម។
ទាក់ទិននឹងបញ្ហានេះ លោក Deng Zhonghua អនុប្រធានការិយាល័យកិច្ចការទីក្រុងម៉ាកាវ និងហុងកុង បានលើកឡើងថា ការអនុវត្តច្បាប់សន្តិសុខជាតិហុងកុង គឺជាំសម្រាប់អាជ្ញាធរ និងប៉ូលិសហុងកុង។ ជាមួយគ្នានេះ លោក Deng បានបន្តថា យ៉ាងណាក៏ដោយ អាជ្ញាធរហុងកុង មិនមែនទទួលបន្ទុកតែម្នាក់ឯងទេ ដោយរដ្ឋាភិបាលកណ្តាល ក៏មានដែនយុត្តាធិការក្នុងការអន្តរាគមន៍លើករណីកម្រមួយចំនួនដែលគំរាមសន្តិសុខជាតិចិនដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ទន្ទឹមនឹងនេះ លោកអនុប្រធានការិយាល័យកិច្ចការទីក្រុងម៉ាកាវ និងហុងកុង ក៏បានលើកឡើងទៀតថា អន្តរាគមន៍របស់ចិន អាចកើតមានបានទាល់តែ ច្បាប់សន្តិសុខជាតិហុងកុងចូលជាធរមានសិន។ ការលើកឡើងរបស់មន្ត្រីជាន់ខ្ពស់ចិនរូបនេះ ធ្វើឡើងតែ៣ថ្ងៃប៉ុណ្ណោះ មុនកិច្ចប្រជុំគណៈអចិន្ត្រៃយ៍នៃសភាប្រជាជនចិនដែលត្រូវអនុម័តច្បាប់នេះ។
សេចក្តីស្នើច្បាប់សន្តិសុខជាតិហុងកុងនេះ ត្រូវគេរំពឹងថានឹងអនុម័តឆាប់ៗខាងមុខនេះ ខណៈក្រុមរិះគន់បារម្ភថា នឹងបង្កើនឥទ្ធិពលរបស់ចិនលើទីក្រុងហុងកុង ស្របពេលដែនដីស្វយ័តមួយនេះកំពុងតែប្រឈមមុខបាតុកម្មសារជាថ្មី។
សូមបញ្ជាក់ថា ទីក្រុងប៉េកាំង តែងតែបញ្ជាក់ម្តងហើយម្តងទៀតថា ច្បាប់សន្តិសុខជាតិហុងកុង នឹងមិនធ្វើឲ្យប៉ះពាល់ដល់គោលការណ៍ «ប្រទេសមួយ ប្រព័ន្ធពីរ» ឡើយ ហើយថែមទាំងមិនប៉ះពាល់ដល់សិទ្ធិរបស់ប្រជាជននៅក្នុងទីក្រុងថែមទៀត។ ផ្ទុយពីរដ្ឋាភិបាលទីក្រុងប៉េកាំង ប្រជាជនហុងកុងមួយភាគធំ ជឿថា ច្បាប់សន្តិសុខជាតិហុងកុង គឺជាការពង្រឹងអំណាចរបស់ចិនបន្ថែមទៀត ក៏ដូចជារឹតត្បិតសិទ្ធិសេរីភាពប្រជាជននៅក្នុងទីក្រុង៕
© រក្សាសិទ្ធិដោយ thmeythmey.com