អន្តរជាតិ
លោកស្រីការី ឡាំ៖ អ្នកប្រឆាំងច្បាប់សន្តិសុខជាតិ នឹងក្លាយសត្រូវរបស់ប្រជាជនហុងកុង រូបភាព៖ Bloomberg និង Reuters
× ប្រមុខដឹកនាំទីក្រុងហុងកុង លោកស្រី ការី ឡាំ នៅថ្ងៃទី១៦ ខែមិថុនា បានជំរុញអ្នកប្រឆាំងច្បាប់សន្តិសុខជាតិហុងកុងទាំងអស់ ឲ្យបញ្ឈប់សកម្មភាពរបស់ខ្លួន។ ជាមួយគ្នានេះ លោកស្រីប្រមុខហុងកុង បានបន្តថា បើនៅតែបន្តសកម្មភាពប្រឆាំងតទៅទៀត អ្នកទាំងនោះ នឹងក្លាយជាសត្រូវរបស់ប្រជាជន។
ថ្លែងនៅមុនកិច្ចប្រជុំគណៈរដ្ឋមន្ត្រីហុងកុង លោកស្រីការី ឡាំ ប្រធានប្រតិបត្តិហុងកុង បានលើកឡើងយ៉ាងដូច្នេះថា៖ «ខ្ញុំជំរុញឲ្យអ្នកប្រឆាំង ដែលនៅតែប្រើប្រាស់វិធីសាស្ត្របំផ្លាញច្បាប់សន្តិសុខជាតិហុងកុង បញ្ឈប់អំពើរបស់ខ្លួន។ បើនៅតែបន្តធ្វើសកម្មភាពបែបនេះ ពួកគេ នឹងក្លាយជាសត្រូវរបស់ប្រជាជនហុងកុង»។ ក្នុងន័យនេះ ប្រមុខហុងកុង ចង់សំដៅក្រុមបាតុករ ដែលបានធ្វើបាតុកម្មនៅក្នុងទីក្រុងហុងកុងជាថ្មី បចាប់តាំងពីផែនការច្បាប់សន្តិសុខជាតិ និងសេចក្តីស្នើច្បាប់ភ្លេងជាតិចិនត្រូវបានគេដាក់ចូលទៅក្នុងសភាពិភាក្សា។
បាតុកម្ម ប្រឆាំងនឹងច្បាប់សន្តិសុខជាតិហុងកុង បានបង្អាក់ការងារជាច្រើននៅក្នុងទីក្រុងហុងកុង ជាពិសេសផ្លូវនៅក្នុងទីក្រុងហុងកុងមួយចំនួន ត្រូវសមត្ថកិច្ចបិទ ឬត្រូវក្រុមបាតុករបិទ។ ទាក់ទិននឹងបញ្ហានេះ លោកស្រីប្រមុខហុងកុង បានលើកឡើងថា មនុស្សជាច្រើននាក់ ចង់ស្តារស្ថិរភាពឡើងវិញ និងមានសុវត្ថិភាព និងធ្វើការងារឡើងវិញ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ថ្លែងនៅក្នុងវីឌីអូមួយ ដែលបង្ហោះនៅលើបណ្តាញសង្គម Facebook លោកស្រី ការី ឡាំ បានហៅក្រុមបាតុករថា ជាភេរវករគំរាមកំហែងទីក្រុងហុងកុង ដោយមានការពាក់ព័ន្ធពីកម្លាំងបរទេស។ បញ្ហានេះ ត្រូវបានលោកស្រី ព្រមានថា សន្តិសុខ និងវិបុលភាពរបស់ទីក្រុង កំពុងស្ថិតក្រោមការគំរាម។ ការព្រមាននេះ ធ្វើឡើង បន្ទាប់ពីប្រជាជនហុងកុងជាច្រើនម៉ឺននាក់ បានចេញមកបាតុកម្ម គំរប់ខួប១ឆ្នាំ នៃបាតុកម្មនៅក្នុងទីក្រុងហុងកុង។
សូមបញ្ជាក់ថា ផែនការអនុម័តច្បាប់សន្តិសុខជាតិហុងកុង និងសេចក្តីស្នើច្បាប់ភ្លេងជាតិចិន បានបំផុសឲ្យប្រជាជនហុងកុងជាច្រើននាក់ ផ្ទុះកំហឹង និងចេញមកបាតុកម្មសារជាថ្មី ព្រោះប្រជាជនទាំងនោះ ជឿថាផែនការ និងសេចក្តីស្នើច្បាប់ទាំងពីរនេះ គឺជាការពង្រីកឥទ្ធិពលរបស់ចិន មកលើហុងកុង និងបំបិទសិទ្ធិសេរីភាពប្រជាជនក្នុងទីក្រុង៕
© រក្សាសិទ្ធិដោយ thmeythmey.com