អន្តរជាតិ
កងទ័ពឥណ្ឌាបីនាក់ស្លាប់ក្នុងការប៉ះទង្គិចជាមួយចិន ខណៈប៉េកាំងថា ទ័ពឥណ្ឌាឆ្លងព្រំដែនពីរដង
រូបភាព៖ Bloomberg
×![]()
ដោយ: ធៀន ភារិន្ទ
ជម្លោះប្រដាប់អាវុធរវាងចិន និងឥណ្ឌា នៅព្រំដែនប្រទេសទាំងពីរ ក្នុងថ្ងៃទី១៥ ខែមិថុនា បានបង្កឲ្យទាហានឥណ្ឌាបីនាក់ ស្លាប់បាត់បង់។ នេះបើតាមការអះអាងរបស់យោធាឥណ្ឌា នៅថ្ងៃទី១៦ ខែមិថុនា។ ការប៉ះទង្គិចគ្នានេះ ធ្វើឡើងបន្ទាប់ពីភាគីទាំងពីរ យល់ព្រមដោះស្រាយជម្លោះនៅតាមព្រំដែនដោយ «សន្តិភាព»។ 
តាមរយៈសេចក្តីថ្លែងការណ៍របស់យោធាឥណ្ឌាបន្ទាប់ពីកើតហេតុនាយប់ថ្ងៃទី១៥ ខែមិថុនា ការប៉ះទង្គិចដែលកើតឡើងក្នុងដំណាក់កាលភាគីទាំងពីរកំពុងកាត់បន្ថយភាពតានតឹងយោធាក្នុងតំបន់ Galwan Valley យោធាឥណ្ឌាបីនាក់ បានបាត់បង់ជីវិត។ បើតាមការអះអាងរបស់អ្នកនាំពាក្យ យោធាឥណ្ឌាបីនាក់ បាត់បង់ជីវិត ក្នុងនោះមានមន្ត្រីម្នាក់ និងយោធាពីរនាក់។ នេះបើតាមការផ្សាយរបស់កាសែត South China Morning Post ។
ប្រភពព័ត៌មានដដែលបន្តថា បន្ទាប់ពីការប៉ះទង្គិចនេះ មន្ត្រីយោធាជាន់ខ្ពស់របស់ប្រទេសទាំងពីរ កំពុងជួបប្រជុំជាមួយគ្នា ដើម្បីកាត់បន្ថយភាពតានតឹង។
ក្រោយការប៉ះទង្គិចនេះ អ្នកនាំពាក្យក្រសួងការបរទេសចិន លោក Zhao Lijian បានលើកឡើងថា យោធាឥណ្ឌា បានឆ្លងព្រំដែនប្រទេសទាំងពីរចំនួនពីរដង ដែលនេះ គឺជាសកម្មភាពបង្កជម្លោះ និងគំរាមកំហែងដល់ទាហានរបស់ចិន។ ដោយសារបញ្ហានេះ វាបានបង្កឲ្យមានការប្រឈមមុខដាក់គ្នា។
ការប៉ះទង្គិចគ្នានៅព្រំដែន ក៏កើតឡើងបន្ទាប់ពីឥណ្ឌា និងចិន យល់ព្រមដោះស្រាយជម្លោះ។ តាមការបញ្ជាក់របស់ក្រសួងការបរទេសឥណ្ឌា នាថ្ងៃទី៧ ខែមិថុនា ឥណ្ឌា និងចិន យល់ព្រមដោះស្រាយជម្លោះនៅតាមព្រំដែនដោយ «សន្តិវិធី» បន្ទាប់ពីមេបញ្ជាការយោធា ប្រទេសទាំងពីរបានជួបចរចាគ្នាស្វែងរកដំណោះស្រាយនៅតំបន់ជួរភ្នំហិមាល័យ។
សូមបញ្ជាក់ថា ចិន និងឥណ្ឌា គឺជាប្រទេសដែលមានព្រំដែនជាប់គ្នារហូតដល់ ៣៤៨៨គីឡូម៉ែត្រ។ ជម្លោះព្រំដែនរវាងប្រទេសទាំងពីរ គឺមានជាយូរមកហើយ។ បញ្ហានេះ ឥណ្ឌា និងចិន បានដាក់យោធាជាច្រើនកន្លែង នៅតាមបណ្តោយព្រំដែនប្រទេសទាំងពីរ៕
Tag:
ចិន
ឥណ្ឌា
© រក្សាសិទ្ធិដោយ thmeythmey.com
