COVID-19
អន្តរជាតិ
ប្រទេសចំនួន៧ ប្រជែងកៅអីសមាជិកមិនអចិន្ត្រៃយ៍ក្រុមប្រឹក្សាសន្តិសុខ ក្រុមប្រឹក្សាសន្តិសុខនៃអង្គការសហប្រជាជាតិ។ រូបភាព៖ AFP
× មហាសន្និបាតអង្គការសហប្រជាជាតិ (UNGA) នៅថ្ងៃទី១៧ ខែមិថុនា នឹងបោះឆ្នោតជ្រើសរើសសមាជិកមិនអចិន្ត្រៃយ៍នៃក្រុមប្រឹក្សាសន្តិសុខរបស់អង្គការសហប្រជាជាតិ (UNSC) ចំនួន ៥កៅអី។ ប្រទេសចំនួន៧ នឹងប្រជែងគ្នាសម្រាប់កៅអីតំណាងទ្វីបអាស៊ី អាហ្វ្រិក អឺរ៉ុប និងអាមេរិកឡាទីន។
ប្រសិនគ្មានការប្រែប្រួលទេ ប្រទេសចំនួន ៧ នឹងប្រកួតប្រជែងគ្នា ដណ្តើមយកកៅអីចំនួន៥ នៅក្នុងក្រុមប្រឹក្សាសន្តិសុខ សម្រាប់ឆ្នាំ២០២១ និង២០២២។ ការប្រកួតប្រជែងសមាជិកមិនអចិន្ត្រៃយ៍នេះ នឹងប្រជែងគ្នាទៅតាមតំបន់ ខណៈប្រទេសខ្លះ បានកក់កៅអីអង្គុយរួចហើយ។
កេនយ៉ា និងជីប៊ូទី នឹងត្រូវប្រជែងគ្នា ដណ្តើមយក១កៅអី តំណាងឲ្យទ្វីបអាហ្វ្រិក។ ចំណែកក្រុមប្រទេសលោកខាងលិចមានកាណាដា អៀរឡង់ ន័រវែស នឹងត្រូវប្រជែងគ្នាយក ២កៅអី។ ចំណែកឥណ្ឌា នឹងទទួលបានកៅអីតំណាងឲ្យអាស៊ី-ប៉ាស៊ីហ្វិកដោយស្វ័យប្រវត្តិ។ ចំណែកម៉ិកស៊ិក ដែលតំណាងឲ្យតំបន់អាមេរិកឡាទីន និងតំបន់ការ៉ាអ៊ីបក៏បានកក់កៅអីដូចឥណ្ឌាដែរព្រោះគ្មានគូប្រជែង។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ប្រទេសនីមួយៗ ប្រើការទូតខុសៗគ្នា ដើម្បីទទួលបានកៅអីអង្គុយនៅក្នុងក្រុមប្រឹក្សាសន្តិសុខ។ កេនយ៉ា ប្រកាសពីការគាំទ្រសហភាពអាហ្វ្រិក ការស្វែងរកសន្តិភាពនៅក្នុងតំបន់កុយរមាស វិភាគទានសម្រាប់កងរក្សាសន្តិភាពអង្គការសហប្រជាជាតិ ក៏ដូចជាការទទួលយកជនភៀសខ្លួនសូម៉ាលី និងស៊ូដង់ខាងត្បូងជាដើម។ ចំណែក ជីប៊ូទីបានលើកឡើងថា កេនយ៉ាធ្លាប់អង្គុយកៅអីប្តូរវេនរួចហើយដូចនេះខ្លួនគួរតែទទួលបានឱកាសម្ដង។ ជីប៊ូទី ក៏បានលើកឡើងពីតួនាទីរបស់ខ្លួនការស្វែងរកសន្តិភាពនៅក្នុងតំបន់ផងដែរ។
ទាក់ទិននឹងការបញ្ចុះបញ្ចូលឲ្យប្រទេសសមាជិកអង្គការសហប្រជាជាតិ គាំទ្រខ្លួននេះ លោក Richard Gowan អ្នកជំនាញខាងផ្នែកអង្គការអន្តរជាតិ នៅអង្គការក្រៅរដ្ឋាភិបាល International Crisis Group បានលើកឡើងថា យុទ្ធនាការបញ្ចុះបញ្ចូលស្វែងរកការគាំទ្រពីប្រទេសផ្សេងៗ ពីសំណាក់អគ្គរដ្ឋទូតរបស់ប្រទេសនីមួយៗ គ្រាន់តែជាការកុហក ដើម្បីទទួលបានសម្លេងគាំទ្រតែប៉ុណ្ណោះ។
ដោយសារបញ្ហា COVID-19 មិនទាន់បញ្ចប់ អ្នកតំណាងមកពីប្រទេសនីមួយៗ មិនតម្រូវឲ្យបោះឆ្នោតតាមប្រព័ន្ធអេឡិចត្រូនិចឡើយ ព្រោះខ្លាចមានការបន្លំ។ ហេតុនេះ អង្គការសហប្រជាជាតិ បានរៀបចំឲ្យមានការបោះឆ្នោតដោយផ្ទាល់ និងសម្ងាត់ ទៅតាមពេលវេលាកំណត់ នៅក្នុងសាលនៃមហាសន្និបាតអង្គការសហប្រជាជាតិ។
ក្រុមប្រឹក្សាសន្តិសុខមានសមាជិក១៥ប្រទេស។ សមាជិក១០ប្រទេស ត្រូវបានផ្លាស់ប្ដូររៀងរាល់ពីរឆ្នាំម្ដង។ ចិន អាមេរិក រុស្ស៊ី អង់គ្លេស និងបារាំង ជាសមាជិកអចិន្ត្រៃយ៍ មានអំណាចវ៉េតូ។
ទន្ទឹមនឹងនេះ មហាសន្និបាតអង្គការសហប្រជាជាតិ ក៏ត្រូវរៀបចំការឆ្នោតជ្រើសរើសប្រធានរបស់ខ្លួនដែរ។ សូមបញ្ជាក់ថា សមាជិកអង្គការសហប្រជាជាតិមានចំនួន ១៩៣ប្រទេស៕
© រក្សាសិទ្ធិដោយ thmeythmey.com