ពីនេះ ពីនោះ
សុខភាព
ដឹងទេ? ក្រៅពីបេះដូង សម្ពាធឈាមឡើងខ្ពស់ក៏អាចបង្កគ្រោះថ្នាក់ដល់ផ្នែកទាំងនេះនៃរាងកាយ
×![]()
ដោយ: សារព័ត៌មានថ្មីៗ
ភាគច្រើននៃពួកយើងសុទ្ធតែដឹងថាសម្ពាធឈាមឡើងខ្ពស់អាចជះឥទ្ធិពលគួរឱ្យបារម្ភចំពោះសុខភាពបេះដូង។ ទោះជាយ៉ាងណាបញ្ហាសម្ពាធឈាមនេះក៏នៅអាចបង្កគ្រោះថ្នាក់ដល់ផ្នែកផ្សេងទៀតនៃរាងកាយផងដែរ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីផ្នែកផ្សេងទៀតនៃរាងកាយដែលអាចទទួលផលប៉ះពាល់នៅពេលសម្ពាធឈាមឡើងខ្ពស់ ៖
១. សសៃឈាម
សម្ពាធឈាមឡើងខ្ពស់មិនអាចគ្រប់គ្រងបានអាចបង្កការខូចខាតលើសសៃឈាមដោយបណ្ដាលឱ្យផ្នែកខ្លះនៃសសៃឈាមប្រែជាចុះខ្សោយ។ អ្វីដែលគួរឱ្យបារម្ភថែមទៀតនោះ គឺសម្ពាធឈាមឡើងខ្ពស់គួបផ្សំនឹងភាពខ្សោយនៃសសៃឈាមនោះហានិភ័យនៃជំងឺប៉ោងសសៃឈាមប្រាកដជាអាចកើតមាន។
២. ខួរក្បាល
មានបញ្ហាគួរឱ្យព្រួយបារម្ភច្រើនណាស់ដែលអាចកើតមានចំពោះខួរក្បាលនៅពេលសម្ពាធឈាមឡើងខ្ពស់។ មួយក្នុងចំណោមនោះ គឺបញ្ហាដាច់សសៃឈាមខួរក្បាល។ សម្ពាធឈាមឡើងខ្ពស់មិនអាចគ្រប់គ្រងបានក៏អាចបង្កើនហានិភ័យនៃជំងឺ dementia ដែលជាជំងឺខួរក្បាលមួយបណ្ដាលឱ្យមានបញ្ហាពាក់ព័ន្ធជាមួយការចងចាំ ការគិត ការនិយាយ និងសូម្បីតែធ្វើចលនា។ ជំងឺរង្វេង Alzheimer’s ក៏ជាជំងឺខួរក្បាលមួយដែលអាចកើតមានដោយសារសម្ពាធឈាមឡើងខ្ពស់ផងដែរ។
៣. តម្រងនោម
ដើម្បីអាចដំណើរការមុខងារប្រកបដោយប្រសិទ្ធភាពខ្ពស់ តម្រងនោមចាំបាច់ត្រូវមានសសៃឈាមតូចឆ្មារជាច្រើនក្នុងនោះ។ ប៉ុន្តែដូចបានបង្ហាញក្នុងចំណុចសសៃឈាមខាងលើ សម្ពាធឈាមឡើងខ្ពស់អាចបង្កជំងឺប៉ោងសសៃឈាម។ ជំងឺប៉ោងសសៃឈាមនេះក៏អាចកើតមានក្នុងសសៃឈាមមួយដែលឆ្ពោះទៅតម្រងនោមផងដែរ។
៤. ភ្នែក
ជាទូទៅចំពោះអ្នកដែលមានបញ្ហាសម្ពាធឈាមឡើងខ្ពស់យូរឆ្នាំ គឺប្រាកដជាអាចប្រឈមមុខនឹងការបាត់បង់ការមើលឃើញ។ នេះក៏ព្រោះតែសម្ពាធឈាមឡើងខ្ពស់អាចបង្កការបំផ្លាញ់ដល់សសៃឈាមដែលផ្គត់ផ្គង់ឈាមអុកស៊ីសែនគ្រប់គ្រាន់ទៅរ៉េទីនភ្នែក។ ជាលទ្ធផលហានិភ័យនៃជំងឺរលាកសសៃបាតភ្នែកអាចនឹងកើនឡើងប្រសិនបើអ្នកមានជំងឺទឹកនោមផ្អែមនិងសម្ពាធឈាមឡើងខ្ពស់។ ករណីខ្លះសម្ពាធឈាមឡើងខ្ពស់មិនអាចគ្រប់គ្រងបានក៏បង្កើនហានិភ័យនៃបញ្ហាហូរឈាមក្នុងភ្នែក ឬបាត់បង់ការមើលឃើញតែម្ដង។
សម្គាល់៖ ផ្អែកតាមផលប៉ះពាល់គ្រោះថ្នាក់ខាងលើ សម្ពាធឈាមឡើងខ្ពស់ជាបញ្ហាគួរឱ្យព្រួយបារម្ភបំផុតមួយដែលអ្នកមិនគួរធ្វេសប្រហែសមើលរំលងឡើយ។ ចូរប្រាកដថាអ្នកបានអនុវត្តតាមការណែនាំរបស់វេជ្ជបណ្ឌិតជំនាញ ប្រសិនបើអ្នកមានបញ្ហាសុខភាពនេះ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
