ភ្នំពេញ៖ ប្រធានរាជបណ្ឌិត្យសភា លោក សុខ ទូច ស្នើឱ្យរដ្ឋាភិបាល និងអាជ្ញាធរ បញ្ឈប់ការលុបបឹងនានាទៀត ដើម្បីទុកទីតាំងនោះ កែច្នៃទៅជាតំបន់ទេសចរណ៍ សម្រាប់ទាក់ទាញភ្ញៀវទៅលេងកម្សាន្ត។ លោកថ្លែងបែបនេះ នៅក្នុងកិច្ចពិភាក្សាតុមូលក្រោមប្រធានបទ«តើកម្ពុជាត្រៀមខ្លួនអ្វីខ្លះ ដើម្បីស្ដារសេដ្ឋកិច្ចក្រោយកូវីដ-១៩បញ្ចប់» នៅថ្ងៃទី១៩ មិថុនា។
«ឈប់លុបបឹងទៅ!»។ នេះជាការលើកឡើងរបស់លោក សុខ ទូច ដែលបានបន្ថែមថា បឹងអាចផ្ដល់សេដ្ឋកិច្ចដល់កម្ពុជា តាមរយៈការរៀបចំទៅជាកន្លែងទេសចរណ៍។ បើតាមលោក សុខ ទូច ការរក្សាទុកបឹង វាក៏អាចជួយរំដោះជំនន់ទឹកភ្លៀង នៅក្នុងរាជធានីភ្នំពេញផងដែរ។
ប្រធានរាជបណ្ឌិត្យសភារូបនេះ បាននិយាយដូច្នេះថា៖«ប្រទេសកូរ៉េមានផ្ទៃដីតូចជាងខ្មែរ មានប្រជាជនដល់ទៅ៥២លាននាក់ គេអត់ទាន់មានលុបបឹងទេ។ ខ្ញុំជិះកាត់បឹងកប់ស្រូវ(បឹងតាមោក) ខ្ញុំឃើញតែចាក់ដី(លុបបឹង)។ តើយើងអាចទុកបឹងសម្រាប់កែច្នៃវិស័យទេសចរណ៍បានដែរទេ? ខ្ញុំដឹងថា ខ្ញុំនិយាយទៅវាប៉ះ(ដល់ការអភិវឌ្ឍរបស់រដ្ឋ) ប៉ុន្តែត្រូវតែទទួលការឈឺចាប់ ត្រូវតែទទួលយក បើមិនទទួលយកហើយ បន្តលុបបឹងតទៅទៀត ហើយពេលភ្លៀងឡើងលិចភ្នំពេញ។ ហេតុអ្វីបានលិច? ព្រោះវាអត់កន្លែងហូរ»។
សូមស្ដាប់សំឡេងលោក សុខ ទូច៖
លោក សុខ ទូច ដែលដឹងថា ការលើកឡើងរបស់លោកនេះ វាប៉ះពាល់ដល់ការសម្រេចរបស់រដ្ឋាភិបាលនោះ យល់ឃើញថា ការអភិវឌ្ឍជារឿងល្អមួយ ប៉ុន្តែបើការអភិវឌ្ឍដល់សង្គមនោះ ក៏ត្រូវមានការពិចារណាផងដែរ។ «ស្រុកគេ ទៅមើលថៃ គេមុនបញ្ចូលកាកសំណល់ទៅក្នុងទន្លេ គេត្រូវស្ដុកឱ្យនៅកកសិន (រហូតដល់)៣ដំណាក់កាល ទើបគេបង្ហូរចូលទន្លេ។ យើងក៏ដូចគ្នាដែរ យើងត្រូវតែកែសង្គមយើង ប្រទេសយើងទាំងអស់គ្នា។ ខ្ញុំរស់នៅមិនបានយូរ លោកក៏រស់នៅមិនបានយូរដែរ ប៉ុន្តែអ្វីដែលយូរគឺកូនរបស់យើង ពូជរបស់យើង យើងត្រូវរក្សាហើយ»។ នេះជាការបន្ថែមរបស់លោក សុខ ទូច។
កាលពីខែមេសាកន្លងមកសម្ដេចនាយករដ្ឋមន្ត្រី ហ៊ុន សែន តាមរយៈទីស្តីការគណៈរដ្ឋមន្ត្រី បានកាត់ផ្ទៃបឹងតាមោក៣៤ហិកតាបន្ថែមទៀត ដោយក្នុងចំណោម៣៤ហិកតានោះ គឺ៣០ហិកតា ត្រូវផ្តល់ទៅឲ្យអ្នកស្រី គីម ហ៊ាង តំណាងក្រុមហ៊ុន គ្លូប៊ល ហៅស៍ (ខេមបូឌា)។ នេះបើតាមលិខិតរបស់ទីស្តីការគណៈរដ្ឋមន្ត្រី ចុះនៅថ្ងៃទី២៧ ខែមេសា ឆ្នាំ២០២០ ។
ផ្ទៃបឹងតាមោក ត្រូវបានកាត់ចំនួន៣លើកហើយ ដែលសរុប មាន១២៩ហិកតា ក្នុងចំណោមផ្ទៃបឹងទាំងមូលជាង៣,២ពាន់ហិកតា។
គួរបញ្ជាក់ថា បឹងទាំង២៦នៅរាជធានីភ្នំពេញ រងការចាក់ដីលុបទាំងអស់ ដោយក្នុងនោះ បឹង១៦ ត្រូវបានលុបទាំងស្រុង និងបឹង១០ទៀត ត្រូវបានលុបនៅផ្នែកខ្លះ។ ការលុបបឹងនេះ ធ្វើឲ្យផលប៉ះពាល់ជីវចម្រុះ និងបរិស្ថាន ហើយបង្កឲ្យមានទឹកជំនន់។ លើសពីនេះ ពលរដ្ឋរាប់ពាន់គ្រួសារ ប្រឈមនឹងការគំរាមកំហែង រួមទាំងបាត់បង់លំនៅដ្ឋាន។ នេះបើតាមសមាគមធាងត្នោត ដែលបានចេញរបាយការណ៍ស្ដីពី «បឹងចុងក្រោយក្នុងរាជធានីភ្នំពេញ» កាលពីថ្ងៃទី២៤ ខែធ្នូ ឆ្នាំ២០១៩។
របាយការណ៍សរសេរថា ម្ចាស់គម្រោងអភិវឌ្ឍន៍ទីក្រុងរណប និងបុរីជាច្រើន បានចាក់ដីខ្សាច់លុបបឹងនិងតំបន់ដីសើមក្នុងរាជធានភ្នំពេញចាប់តាំងពីឆ្នាំ២០០៣មក។ បើតាមរបាយការណ៍ដដែល បឹង៦០ភាគរយ និងតំបន់ដីសើម៤០ភាគរយ ត្រូវបានចាក់លុប។
ផ្អែកលើរបាយការណ៍របស់សមាគមធាងត្នោត បឹងទាំង១៦ ដែលត្រូវបានលុបទាំងស្រុង គឺ បឹងត្របែក១ នៅខណ្ឌចំការមន, បឹងតាម៉ាត នៅខណ្ឌដង្កោ, បឹងស្ទោរ នៅខណ្ឌច្បារអំពៅ, បឹងឈូក នៅខណ្ឌច្បារអំពៅ, បឹងសាឡាង នៅខណ្ឌទួលគោល, ប្រឡាយលូ៥ នៅខណ្ឌមានជ័យ, ត្រពាំងឈូក នៅខណ្ឌសែនសុខ, បឹងទួលពពែ នៅខណ្ឌដង្កោ, បឹងរាជសីហ៍ នៅខណ្ឌសែនសុខ, បឹងចិញ្ចឹមក្រពើ នៅខណ្ឌសែនសុខ, បឹងឈូក នៅខណ្ឌឫស្សីកែវ, បឹងពោងពាយ នៅខណ្ឌសែនសុខ, បឹងអូរអង្កាម នៅខណ្ឌឫស្សីកែវ, បឹងកក់ នៅខណ្ឌទួលគោល, បឹងសាឡាង នៅខណ្ឌឫស្សីកែវ និង បឹងទទឹងថ្ងៃ នៅខណ្ឌជ្រោយចង្វារ។
ចំណែក បឹងទាំង១០ទៀត ដែលបានចាក់ដីលុបផ្នែកខ្លះ គឺ បឹងត្របែក២ នៅខណ្ឌចំការមន, បឹងទំពុន១ និងបឹងទំពុន២ នៅខណ្ឌមានជ័យ, បឹងជើងឯក នៅខណ្ឌដង្កោនិងខណ្ឌមានជ័យ, បឹងតាមោក ឬបឹងកប់ស្រូវ នៅខណ្ឌព្រែកព្នៅ, បឹងខាំពង នៅខណ្ឌជ្រោយចង្វារ, បឹងប៉ាយ៉ាប នៅខណ្ឌឫស្សីកែវនិងខណ្ឌសែនសុខ, បឹងឈូក នៅខណ្ឌឫស្សីកែវ, បឹងក្បាលដំរី នៅខណ្ឌសែនសុខ និងបឹងសំរោង នៅព្រែកព្នៅ៕