សង្គមអន្តរជាតិ
អន្តរជាតិ
មន្ត្រីក្រសួងការបរទេសសហរដ្ឋអាមេរិកម្នាក់ចុះចេញពីដំណែងដោយសារការឆ្លើយតបរបស់ប្រធានាធិបតីត្រាំអំពីបញ្ហាជាតិសាសន៍
ក្មេងស្រីម្នាក់ឱបមនុស្សពេញវ័យ នៅពេលដែលប៉ូលិសបង្ក្រាបបាតុកម្មឈរត្រៀម នៅរដ្ឋធានីវ៉ាស៊ីនតោន នៅពេលមានការបាតុកម្មប្រឆាំងនឹងការស្លាប់របស់លោក george floyd។
×![]()
ដោយ: VOA
មន្ត្រីក្រសួងការបរទេសម្នាក់របស់សហរដ្ឋអាមេរិក បានលាចេញពីដំណែងកាលពីថ្ងៃព្រហស្បតិ៍ដោយសារតែការឆ្លើយតបរបស់ប្រធានាធិបតី ត្រាំ ដល់ភាពតានតឹងខាងជាតិសាសន៍ទូទាំងប្រទេសអំពីការសម្លាប់បុរសស្បែកខ្មៅដោយប៉ូលិស។ នេះបើតាមសេចក្តីរាយការណ៍របស់កាសែត Washington Post។
កាសែត Washington Post បានរាយការណ៍ទៀតថា លោកស្រី Mary Elizabeth Taylor ឧបការីរដ្ឋមន្ត្រីក្រសួងការបរទេសទទួលបន្ទុកកិច្ចការច្បាប់ បាននិយាយនៅក្នុងលិខិតលាចេញពីដំណែងរបស់លោកស្រីថា «ចំណាត់ការរបស់លោកប្រធានាធិបតី ត្រាំ ជាការផ្ទុយទៅនឹងតម្លៃនិងជំនឿរបស់ខ្ញុំ»។ លោកស្រីមានអាយុ៣០ឆ្នាំជាមនុស្សក្មេងបំផុតដែលបានកាន់កាប់ដំណែងនេះ ហើយលោកស្រីក៏ជាស្ត្រីស្បែកខ្មៅលើកទី១ដែលកាន់កាប់ការងារនេះដែរ។
លោកស្រី Taylor បាននិយាយនៅក្នុងលិខិតលាចេញពីដំណែងរបស់លោកស្រីដែលបានផ្ញើរជូនលោក Mike Pompeo រដ្ឋមន្ត្រីការបរទេសសហរដ្ឋអាមេរិក ដែលបានទទួលដោយកាសែត Washington Post ថា «អត្ថាធិប្បាយនិងចំណាត់ការរបស់លោកប្រធានាធិបតីជុំវិញយុត្តិធម៌ពូជសាសន៍និងពលរដ្ឋអាមេរិកាំងស្បែកខ្មៅជាការផ្ទុយទៅនឹងតម្លៃនិងជំនឿរបស់ខ្ញុំ។ ខ្ញុំ ត្រូវតែធ្វើទៅតាមមនសិការរបស់ខ្ញុំហើយលាចេញពីដំណែងជាឧបការីរដ្ឋមន្ត្រីការបរទេសទទួលបន្ទុកកិច្ចការច្បាប់នេះ»។
ការលាចេញពីដំណែងរបស់លោកស្រី Taylor កើតមានឡើងបន្ទាប់ពីការចលាចលជាច្រើនសប្តាហ៍នៅទូទាំងសហរដ្ឋអាមេរិកក្រោយពីការសម្លាប់លោក George Floyd ដោយប៉ូលិសស្បែកសនៅក្នុងទីក្រុងមីនីអាប់ប៉ូលីស។ ពួកបាតុករ បានទាមទាររកយុត្តិធម៌ឲ្យលោក Floyed និងជនស្បែកខ្មៅដែលស្លាប់ផ្សេងទៀត រួមជាមួយការធ្វើកំណែទម្រង់ដើម្បីដោះស្រាយភាពព្រៃផ្សៃរបស់ប៉ូលិស បានធ្វើឲ្យមានការតវ៉ានៅតាមផ្លូវ៕
សូមចុចទៅប្រភពដើម VOA ត្រង់នេះ
សូមចុចទៅប្រភពដើម VOA ត្រង់នេះ
© រក្សាសិទ្ធិដោយ thmeythmey.com
