អន្តរជាតិ
អាមេរិក និងរុស្ស៊ីបើកការចរចាលើសន្ធិសញ្ញាកាត់បន្ថយនុយក្លេអ៊ែរ New START មីស៊ីលបំពាក់នុយក្លេអ៊ែររបស់រុស្ស៊ី។ រូបភាព AFP
× ប្រតិភូអាមេរិក និងរុស្ស៊ី នឹងជួបគ្នានៅថ្ងៃទី២២ ខែមិថុនា ដើម្បីបើកការចរចាលើការបន្តសន្ធិសញ្ញាកាត់បន្ថយនុយក្លេអ៊ែរថ្មី (New START) ដែលអស់សុពលភាពនៅដើមឆ្នាំ២០២១ ។ មិនមានក្ដីរំពឹងច្រើនឡើយពីការចរចានេះ ដោយអ្នកជំនាញយល់ថា ពេលវេលាកាន់ខើចណាស់ទៅហើយ ស្របពេលរដ្ឋបាលលោក ដូណាល់ ត្រាំ ក៏មានទម្លាក់ដើរចេញពីកិច្ចព្រមព្រៀងអន្តរជាតិផងនោះ។ អវត្តមានរបស់ចិន ក៏ទំនងជាមូលហេតុដែលការចរចានេះមិនបានផលដែរ។
អគ្គរដ្ឋទូតអាមេរិកទទួលបន្ទុកកិច្ចការនុយក្លេអ៊ែរ Marshall Billingslea និងអនុរដ្ឋមន្ត្រីការបរទេសរុស្ស៊ី Sergei Ryabkov នឹងដឹកនាំការប្រជុំបន្តសុពលភាពសន្ធិសញ្ញាកាត់បន្ថយអាវុធនុយក្លេអ៊ែរយុទ្ធសាស្ត្រថ្មី New START ។ សន្ធិសញ្ញានេះ ចូលជាធរមាននៅឆ្នាំ២០១០ ហើយផុតសុពលភាពនៅខែកម្ភៈ ឆ្នាំ២០២១ ខាងមុខ។
ភាគីទាំងពីរមានពេលត្រឹម៨ខែប៉ុណ្ណោះដើម្បីចរចាលើការបន្តសន្ធិសញ្ញាដ៏សំខាន់ និងសេសសល់ពីការដកខ្លួនរបស់អាមេរិកក្រោមរដ្ឋបាលប្រធានាធិបតី ដូណាល់ ត្រាំ ។ ក្នុងករណីចង់ឲ្យសន្ធិសញ្ញានេះមានប្រសិទ្ធភាពទៀតនោះ ទាំងអាមេរិក ទាំងរុស្ស៊ី ត្រូវធ្វើការងារធ្ងន់។ ប៉ុន្តែអ្វីដែលជាក្ដីបារម្ភនោះ គឺក្នុងកាលៈទេសៈដែលការបោះឆ្នោតប្រធានាធិបតីអាមេរិកខិតកាន់តែកៀក វ៉ាស៊ីនតោនអាចមិនមានការប្ដេជ្ញាចិត្តឲ្យខ្លាំងក្លាឡើយ។
លើសពីនោះ នៅពេលដែលអាមេរិក កំពុងមិនត្រូវគ្នាជាមួយចិន លោក ត្រាំ ក៏អាចមានលេសដើម្បីមិនបន្តសន្ធិសញ្ញានេះដែរ។ កន្លងទៅ លោក ត្រាំ ចង់ឲ្យចិនចូលរួមក្នុងការចរចានេះ សំដៅទប់ស្កាត់ការរុលទៅរបស់មហាអំណាចអាស៊ីមួយនេះ។ ប៉ុន្តែចិនប្រកាសដាច់អហង្ការហើយថា ខ្លួនមិនចូលរួមការចរចាត្រីភាគីជាមួយអាមេរិក និងរុស្ស៊ីដាច់ខាត។ នេះ នឹងក្លាយជាហេតុផលដ៏ល្អសម្រាប់វ៉ាស៊ីនតោនដើម្បីបង្អូសពេលឲ្យ New START អស់សុពលភាពដោយឯកឯង។
លោក Song Zhongping អ្នកជំនាញផ្នែកការពារជាតិ ប្រាប់ទីភ្នាក់ងារព័ត៌មាន AFP ថា ប៉េកាំងនឹងមិនចូលតុចរចាជាមួយមូស្គូ និងវ៉ាស៊ីនតោនឡើយ ហើយការចរចាដើម្បីកាត់បន្ថយអាវុធនេះ គ្រាន់តែជាអន្ទាក់របស់អាមេរិកប៉ុណ្ណោះ។ លោកបន្តថា ចិនដែលមានក្បាលគ្រាប់នុយក្លេអ៊ែរជាង៣២០គ្រាប់ អាចនឹងបង្កើនដល់២ពាន់គ្រាប់ ដែលជាកម្រិតសមល្មម។ បរិមាណនេះ នៅទាបជាងអាមេរិក និងរុស្ស៊ីដែលមានក្បាលគ្រាប់នុយក្លេអ៊ែរជាង៥ពាន់ និងជាង៦ពាន់បន្តបន្ទាប់។
New START ជាសន្ធិសញ្ញាមួយដែលរួចពីការដើរចោលរបស់អាមេរិក។ សន្ធិសញ្ញាយោធាជាមួយរុស្ស៊ីដែលរដ្ឋបាលលោក ត្រាំ ដើរចេញមានកិច្ចព្រមព្រៀងចំហមេឃ និងសន្ធិសញ្ញាហាមឃាត់មីស៊ីលនុយក្លេអ៊ែរចម្ងាយមធ្យម។ អ្នកវិភាគរុស្ស៊ី Fyodor Lukyanov និយាយថា មិនចាំបាច់រំពឹងពីលទ្ធផលពីការប្រជុំនៅវីយែនឡើយ ព្រោះ New START ក៏ទំនងមានវាសនាមិនខុសពីសន្ធិសញ្ញាឯទៀតឡើយ៕
Tag:
អាមេរិក
រុស្ស៊ី
New START
© រក្សាសិទ្ធិដោយ thmeythmey.com