COVID-19
អន្តរជាតិ
COVID-19៖ ការឆ្លងនៅអាស៊ីអាគ្នេយ៍មានជាង ១៣ម៉ឺននាក់ ខណៈឥណ្ឌូណេស៊ីឈរលេខ១
រូបភាព៖ Anadolu Agency
×![]()
ដោយ: ធៀន ភារិន្ទ
តំបន់អាស៊ីអាគ្នេយ៍ ដែលមានប្រទេសសរុបចំនួន ១១ប្រទេស ត្រូវបានគេរាយការណ៍ថា មានករណីឆ្លង COVID-19សរុបជាង ១៣ម៉ឺនករណី។ ឥណ្ឌូណេស៊ី មានករណី COVID-19 ច្រើនជាងគេនៅក្នុងតំបន់ ខណៈប្រទេសទីពីរ គឺសិង្ហបុរី និងទី៣ គឺហ្វីលីពីន។ នេះបើតាមវេបសាយ Worldometer គិតត្រឹមរសៀលថ្ងៃទី២២ ខែមិថុនា។ 
តំបន់អាស៊ីអាគ្នេយ៍ ដែលមានប្រទេសចំនួន១១ មានករណីCOVID-19 សរុប១៣១០៣១ករណី ខណៈអ្នកស្លាប់មានជិត ៤ពាន់នាក់។ ក្នុងចំណោមប្រទេសក្នុងតំបន់ទាំងអស់ មានប្រទេសតែ ៣ប៉ុណ្ណោះ ដែលមានករណីឆ្លង លើស ១ម៉ឺនករណី មានឥណ្ឌូណេស៊ី សិង្ហបុរី និងហ្វីលីពីន។
ជាប្រទេសឈរនៅលំដាប់ទី១ នៃតារាងប្រទេសមាន COVID-19 ច្រើនជាងគេនៅក្នុងតំបន់អាស៊ីអាគ្នេយ៍ ឥណ្ឌូណេស៊ី មានករណីឆ្លងរហូតដល់ទៅ ៤៥៨៩១ករណីឯណោះ អ្នកស្លាប់មានចំនួន ២៤៦៥នាក់។ តួលេខអ្នកស្លាប់នេះ ក៏ច្រើនជាងគេនៅក្នុងតំបន់ផងដែរ។ អ្នកជាសះស្បើយនៅឥណ្ឌូណេស៊ីមានចំនួន ១៨៤៩៤នាក់។
ចំណែកសិង្ហបុរី ឈរនៅលំដាប់ទី២ មានករណីឆ្លងចំនួន ៤២៧៨៥ករណី អ្នកស្លាប់ ២៦នាក់។ ចំណែកអ្នកជាសះស្បើយមានចំនួន ៣៤៩៤២នាក់។ បើក្រឡេកមកមើលប្រទេសដែនកោះហ្វីលីពីនវិញ ឈរនៅលំដាប់ទី៣ មានករណីឆ្លងCOVID-19 សរុបចំនួន ៣០០៥២ករណី អ្នកស្លាប់ ១១៦៩នាក់ និងមានអ្នកជាសះស្បើយមានចំនួន ៧៨៩៣នាក់។
ជាប្រទេសជិតខាង និងឈរនៅលំដាប់បន្ទាប់ពីហ្វីលីពីន ម៉ាឡេស៊ីមានករណីឆ្លង COVID-19 ក្រោម ១ម៉ឺនករណី និងភាគច្រើនអ្នកឆ្លង គឺមកពីវិហារសាសនា។ ម៉ាឡេស៊ីមានករណីឆ្លងសរុបចំនួន ៨៥៧២ករណី អ្នកស្លាប់មានចំនួន ១២១នាក់ និងអ្នកជាសះស្បើយ ៨១៥៦នាក់។ សម្រាប់ប្រទេសថៃ ដែលប្រកាសថា គ្មានករណីឆ្លងក្នុងស្រុកចំនួន២៨ថ្ងៃ ឈរនៅលំដាប់ទី៥ មានករណីឆ្លងកូរ៉ូណាវីរុសសរុប ៣១៥១ករណី អ្នកស្លាប់ចំនួន ៥៨នាក់ និងអ្នកជាសះស្បើយមានចំនួន ៣០២២នាក់។
វៀតណាម គឺជាប្រទេសឈរនៅលំដាប់ទី៦ មានករណីឆ្លងសរុបចំនួន ៣៤៩ករណី និងគ្មានករណីស្លាប់ ខណៈអ្នកជាសះស្បើយមានចំនួន ៣២៧នាក់។ ប្រទេសបន្ទាប់គឺមីយ៉ាន់ម៉ា ឈរនៅលំដាប់ទី៧ មានករណីឆ្លង COVID-19 ២៩០ករណី អ្នកស្លាប់មានចំនួន ៦នាក់ និងអ្នកជាសះស្បើយមានចំនួន ២០០នាក់។
ឈរនៅលំដាប់ទី៨ គឺប្រទេសដែលពឹងផ្អែកខ្លាំងលើការនាំចេញប្រេង និងឧស្ម័នធម្មជាតិ ព្រុយណេ មានករណីកូរ៉ូណាវីរុសសរុបចំនួន ១៤១ករណី អ្នកស្លាប់មានចំនួន ៣នាក់ និងអ្នកជាសះស្បើយមានចំនួន ១៣៨នាក់។
ចំណែកប្រទេសទី៩ កម្ពុជា ដែលភាគច្រើនមានករណីឆ្លងមកពីបរទេស មានករណី COVID-19 សរុបចំនួន ១២៩ករណី មិនមានករណីស្លាប់ និងអ្នកជាសះស្បើយមានចំនួន ១២៧នាក់។ ចំណែកទីម័រខាងកើតវិញ ដែលឈរនៅលំដាប់ទី១០ នៃតារាង COVID-19 ក្នុងតំបន់មានករណី COVID-19 សរុប២៤ករណី មិនមានករណីស្លាប់ និងមានអ្នកជំងឺជាសះស្បើយទាំងអស់។ ប្រទេសចុងក្រោយ ឈរនៅលំដាប់ទី១១ គឺឡាវ ដែលបានប្រកាសអស់អ្នកជំងឺ COVID-19 នាពេលកន្លងមក មានករណី COVID-19 សរុប១៩ករណី មិនមានករណីស្លាប់។
សូមបញ្ជាក់ថា គិតមកត្រឹមរសៀលថ្ងៃទី២២ ខែមិថុនា ពិភពលោកមានឆ្លងCOVID-19 ចំនួនជាង ៩លានករណី អ្នកស្លាប់មានចំនួនជាង ៤៧ម៉ឺននាក់ និងអ្នកជាសះស្បើយមានចំនួន ៤,៨៤លាននាក់៕
Tag:
COVID-19
© រក្សាសិទ្ធិដោយ thmeythmey.com
