អន្តរជាតិ
ចិនថា ខ្លួនធ្វើតាមច្បាប់ក្នុងការកាត់ទោសជនជាតិកាណាដាពីរនាក់ពាក់ព័ន្ធករណីសន្តិសុខជាតិ
× ទីក្រុងប៉េកាំង នៅថ្ងៃទី២២ ខែមិថុនា បាននិយាយការពារចំណាត់របស់ខ្លួនទាក់ទងការចាប់ផ្ដើមនីតិវិធីកាត់ទោសជនជាតិកាណាដាពីរនាក់លើសំណុំរឿងសន្តិសុខជាតិ។ នាយករដ្ឋមន្ត្រីកាណាដា ចាស្ទីន ទ្រូដូ បានហៅការចាប់ខ្លួននេះ ជារឿងនយោបាយគួរឲ្យខ្មាស់អៀនសម្រាប់ចិន ដែលធ្វើឡើងដើម្បីដាក់សម្ពាធលើកាណាដាក្រោយកាណាដាចាប់ខ្លួនមន្ត្រីក្រុមហ៊ុន Huawei ។ ប៉ុន្តែក្រសួងការបរទេសចិនអះអាងថា ចិនអនុវត្តច្បាប់របស់ខ្លួនប៉ុណ្ណោះលើករណីនេះ។
កាណាដា និងចិន បានដំឡើងសម្ដីដាក់គ្នាជាថ្មីពាក់ព័ន្ធការចាប់ខ្លួនជនជាតិកាណាដាពីរនាក់ដោយអាជ្ញាធរចិនលើសំណុំរឿងសន្តិសុខជាតិ។ ការចាប់ខ្លួនអតីតមន្ត្រីការទូត លោក Michael Kovrig និងអ្នកជំនួញ Michael Spavor កើតឡើងក្រោយការចាប់ខ្លួនលោកស្រី ម៉ឹង វ៉ាន់ចូវ នាយកហិរញ្ញវត្ថុរបស់ក្រុមហ៊ុនបច្ចេកវិទ្យា Huawei ដោយអាជ្ញាធរកាណាដាតាមការស្នើរបស់អាមេរិកពីបទកេងបន្លំ និងកុហកក្នុងទំនាក់ទំនងជាមួយអ៊ីរ៉ង់។
ខណៈសំណុំរឿងលោកស្រី ម៉ឹង ស្ថិតក្នុងដំណាក់កាលតវ៉ាលើការធ្វើបត្យាប័នទៅអាមេរិក នៅសប្ដាហ៍មុន រដ្ឋអាជ្ញាចិនបានចាប់ផ្ដើមនីតិអាជ្ញារបស់ខ្លួនលើលោក Kovrig និងលោក Spavor ដែលសង្ស័យថា លួចធ្វើចារកម្ម និងចែកចាយព័ត៌មានសម្ងាត់រដ្ឋ។ នាយករដ្ឋមន្ត្រីកាណាដា ចាស្ទីន ទ្រូដូ នៅតែមិនអស់ចិត្តនឹងការចាប់ខ្លួនជនជាតិកាណាដាទាំងពីរ ដោយចាត់ទុកជាការចាប់ខ្លួនដោយបង្ខំដើម្បីប្រយោជន៍នយោបាយ។
ក្នុងសន្និសីទសារព័ត៌មានថ្ងៃទី២២ ខែមិថុនា លោក ទ្រូដូ បញ្ជាក់ថា រដ្ឋាភិបាលរបស់លោកបានរិះគន់ពីដើមទីលើការសម្រេចចិត្តនយោបាយរបស់ចិនក្នុងការដាក់សម្ពាធលើកាណាដា។ លោកចង់សំដៅដល់ការផ្អាកការនាំចូលទំនិញកាណាដាតម្លៃរាប់ពាន់លានដុល្លារពីសំណាក់ចិនក្រោយការកើតឡើងរឿងរ៉ាវទាំងនេះ។ មេដឹកនាំកាណាដារូបនេះ ថែមទាំងរិះគន់ចិនថា បន្តកាត់ទោសជនជាតិកាណាដា ដើម្បីសងសឹងការសម្រេចចិត្តរបស់ប្រព័ន្ធតុលាការឯករាជ្យនៅកាណាដា។
យ៉ាងណាមិញ ចិនបានទាត់ចោលសម្ដីប្រមុខរដ្ឋាភិបាលកាណាដា។ ក្នុងសន្និសីទសារព័ត៌មានថ្ងៃទី២២ ខែមិថុនា អ្នកនាំពាក្យក្រសួងការបរទេសចិន Zhao Lijian និយាយថា កាណាដាកំពុងអនុវត្តស្តង់ដាពីរជាន់លើរឿងតុលាការឯករាជ្យ។ លោក Zhao បានការពារការកាត់ទោសជនជាតិកាណាដាទាំងពីរ ដោយថា ជាការអនុវត្តច្បាប់លើករណីសង្ស័យពាក់ព័ន្ធសន្តិសុខជាតិ និងមិនមែនជាការចាប់ខ្លួនដោយបង្ខំអ្វីទាំងអស់។
មន្ត្រីនាំពាក្យក្រសួងការបរទេសចិនរូបនេះ ក៏បន្តវាយប្រហារកាណាដាលើករណីមន្ត្រីក្រុមហ៊ុន Huawei ដោយលោកហៅសំណុំរឿងនេះជារឿងនយោបាយ ព្រោះអាមេរិកចង់ធ្វើទុក្ខក្រុមហ៊ុនបច្ចេកវិទ្យាចិនមួយនេះ និងក្រុមហ៊ុនឯទៀត ហើយកាណាដាជាអ្នកចូលដៃចូលជើង។ លោក Zhao ក៏បានទទូចឲ្យកាណាដាកែប្រែកំហុសរបស់ខ្លួន ដោះលែងលោកស្រី ម៉ឹង ឲ្យវិលត្រឡប់ទៅផ្ទះវិញឲ្យបានឆាប់រហ័ស៕
Tag:
ចិន
កាណាដា
ចាស្ទីន ទ្រូដូ
© រក្សាសិទ្ធិដោយ thmeythmey.com