បក្សកុម្មុយនីស្តវៀតណាម ប្រកាសជំហរឥតងាករេ ក្នុងការចងមិត្តភាពជាមួយកម្ពុជា

ជាតិ

នយោបាយជាតិ

បក្សកុម្មុយនីស្តវៀតណាម ប្រកាសជំហរឥតងាករេ ក្នុងការចងមិត្តភាពជាមួយកម្ពុជា

23, Jun 2020 , 4:02 pm

រូបភាព

លោក Nguyễn Xuân Phúc នាយករដ្ឋមន្រ្តីនិងជាសមាជិកការិយាល័យនយោបាយនៃគណៈកម្មាធិការមជ្ឈិមគណបក្សកុម្មុនីស្តវៀតណាម ទទួលសម្តេច ហ៊ុន សែន នាយករដ្ឋមន្រ្តីនិងជាប្រធានគណបក្សប្រជាជនកម្ពុជា ក្នុងឱកាសសម្តេចទៅបំពេញទស្សនកិច្ចនៅវៀតណាម កាលពីខែតុលា ឆ្នាំ២០១៩ (រូបពី AFP )

ដោយ: សារព័ត៌មានថ្មីៗ

គណបក្សកុម្មុយនីស្តវៀតណាម បានអបអរសាទរគណបក្សប្រជាជនកម្ពុជា ក្នុងឱកាសរម្លឹកខួបលើកទី៦៩ឆ្នាំនៃការបង្កើតគណបក្ស ដែលនឹងមកដល់នៅថ្ងៃទី២៨ ខែមិថុនា ឆ្នាំ២០២០។ គណៈកម្មាធិការមជ្ឈិមនៃគណបក្សកុម្មុយនីស្តវៀតណាម បានសរសេរលិខិតអបអរសាទរនេះ ជូនមកគណៈកម្មាធិការកណ្តាលនៃគណបក្សប្រជាជនកម្ពុជា។

លិខិតអបអរសាទរ ដែលត្រូវបានបកប្រែពីភាសាវៀតណាម មកជាភាសាខ្មែរ និងត្រូវបានបង្ហោះលើទំព័រហ្វេសប៊ុករបស់ស្ថានទូតវៀតណាម សរសេរថា គណបក្សកុម្មុយនីស្តវៀតណាម មានគោលជំហរ «ដោយឥតងាករេ» ក្នុងការគោរពនិងការពូនជ្រំនូវសាមគ្គីភាព-មិត្តភាពរវាងគណបក្សនិងប្រជាជននៃប្រទេសទាំងពីរ។

តាមរយៈលិខិតនោះ គណបក្សកុម្មុយនីស្តវៀតណាម ចាត់ទុកចំណងមិត្តភាពនេះ ថាជា «ទ្រព្យសម្បត្តិរួមដ៏មានតម្លៃរបស់ប្រទេសទាំងពីរ»។ លិខិតដដែល បន្តថា បក្ស រដ្ឋ និង ប្រជាជនវៀតណាម នឹងខិតខំអស់ពីកម្លាំងកាយចិត្ត រួមជាមួយគណបក្សប្រជាជនកម្ពុជា រដ្ឋ និង ប្រជាជនកម្ពុជា ដើម្បីថែរក្សានិងពូនជ្រំបន្ថែមទៀតនូវចំណងទាក់ទង និងកិច្ចសហប្រតិបត្តិការ «ឲ្យកាន់តែស្រស់បំព្រងនិងរឹងមាំជានិរន្តតរៀងទៅ»។

ទន្ទឹមនឹងនេះ គណបក្សកុម្មុយនីស្តវៀតណាម បានសរសើរគណបក្សប្រជាជនកម្ពុជា ក៏ដូចជារដ្ឋាភិបាលកម្ពុជា ក្នុងការប្រយុទ្ធប្រឆាំងនឹងជំងឺកូវីដ-១៩។ គណបក្សកុម្មុយនីស្តវៀតណាម ក៏បានអរគុណគណបក្សប្រជាជនកម្ពុជា រដ្ឋ និង ប្រជាជនខ្មែរ ថា បានសហការយ៉ាងល្អជាមួយវៀតណាម ក្នុងការទប់ស្កាត់ជំងឺកូវីដ-១៩។

គណបក្សកុម្មុយនីស្តីវៀតណាម រម្លឹកថា ការរួមគ្នាទប់ស្កាត់ជំងឺកូវីដ-១៩នាពេលនេះ គឺដូចអ្វីដែលកម្ពុជានិងវៀតណាម ធ្លាប់បានជួយគ្នាទៅវិញទៅមកក្នុងអតីតកាល ដូចជា ការវាយផ្តួលរំលំរបបខ្មែរក្រហម និងការរំដោះវៀតណាមភូមិភាគខាងត្បូង ដើម្បីឈានដល់បានឯករាជ្យជាតិនៅទូទាំងប្រទេស ជាដើម។

ក្នុងលិខិតនោះ គណបក្សកុម្មុយនីស្តវៀតណាម បង្ហាញក្តីជឿជាក់ថា ក្រោមការដឹកនាំរបស់គណបក្សប្រជាជនកម្ពុជា ប្រទេសកម្ពុជា នឹងសម្រេចបានសមិទ្ធផលថ្មីៗបន្ថែមទៀត ហើយកម្ពុជា កាន់តែត្រូវបានលើកតម្កើងលើឆាកអន្តរជាតិ។

គណបក្សប្រជាជនកម្ពុជា ប្រកាសរួចហើយ ថា នៅថ្ងៃទី២៨ ខែមិថុនា ឆ្នាំ២០២០នេះ មិនបានប្រារព្ធពិធីរម្លឹកខួប៦៩ឆ្នាំនៃការបង្កើតគណបក្ស ជាទ្រង់ទ្រាយធំ ដែលតែងតែធ្វើជារៀងរាល់ឆ្នាំឡើយ ដោយសារតែបារម្ភនឹងជំងឺកូវីដ-១៩។ រាល់ឆ្នាំ គណបក្សកាន់អំណាចមួយនេះ តែងរៀបចំពិធីជួបជុំគ្នា នៅមជ្ឈមណ្ឌលកោះពេជ្រ ឬនៅកន្លែងផ្សេងទៀត ដើម្បីរម្លឹកខួបនៃការបង្កើតគណបក្ស៕