កីឡាជាតិ
ជាតិ
លោកឧត្តមសេនីយ៍ឯក ជា ប៊ុនហេង (រូបក្នុងរង្វង់)និងសកម្មភាពប្រកួតរបស់កីឡាករសូហ្វតិន្នីស
×![]()
អនុប្រធានទី១នៃសហព័ន្ធកីឡាសូហ្វតិន្នីសកម្ពុជាលោក ជា ប៊ុនហេង បានដាក់គោលដៅខ្ពស់ក្នុងការប្រជែងដណ្តើមមេដាយពីព្រឺត្តិការណ៍កីឡាស៊ីហ្គេមលើកទី៣២ឆ្នាំ២០២៣នៅកម្ពុជា។ ដ្បិតលោកសង្កេតឃើញថា វិស័យកីឡាសូហ្វតិន្នីសបច្ចុប្បន្នមានការរីកចម្រើនគួរឲ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ។ លោកនឹងព្យាយាមបញ្ចុះបញ្ចូលឲ្យវៀតណាមដាក់កីឡានេះក្នុងការប្រកួតកីឡាស៊ីហ្គេមឆ្នាំ២០២១។
លោក ជា ប៊ុនហេង អនុប្រធានទី១នៃសហព័ន្ធកីឡាសូហ្វតិន្នីសកម្ពុជា ហាក់មានការប្តេជ្ញាចិត្តខ្ពស់ក្នុងការដឹកនាំកីឡាសូហ្វតិន្នីសឈានទៅរកភាពជោគជ័យនៅលើឆាកអន្តរជាតិ។ លោកជឿជាក់ថា ក្រុមកីឡាករសូហ្វតិន្នីសនឹងអាចឈានទៅដណ្តើមយកមេដាយមាសក្នុងការប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ជាជំហានដំបូង លោក នឹងព្យាយាមបញ្ចុះបញ្ចូលភាគីវៀតណាម ដើម្បីដាក់កីឡាសូហ្វតិន្នីសក្នុងការប្រកួតកីឡាស៊ីហ្គេមនៅឆ្នាំ២០២១ ដែលវៀតណាមធ្វើជាម្ចាស់ផ្ទះ។ ព្រោះលោកយល់ថា ការប្រកួតស៊ីហ្គេមឆ្នាំ២០២១ ជាការប្រកួតមួយដ៏សំខាន់ក្នុងការធ្វើតេស្តសមត្ថភាពកីឡាករ ក៏ដូចជាស្វែងរកចំណុចខ្សោយរបស់ពួកគេ ដើម្បីឈានទៅសម្រេចគោលដៅនៅឆ្នាំ២០២៣។
«ស៊ីហ្គេមឆ្នាំ២០២១នៅវៀតណាមយើងកំពុង Lobby(បញ្ចុះបញ្ចូល)ឲ្យដាក់កីឡាសូហ្វតិន្នីស យើងកុំរង់ចាំដល់ឆ្នាំ២០២៣ វានៅឆ្ងាយណាស់។ ស៊ីហ្គេមឆ្នាំ២០២១ បើមាន(សូហ្វតិន្នីស)យើងអាចដណ្តើមយកមេដាយបាន ដល់ស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ ធ្វើយ៉ាងណាដណ្តើមមេដាយមាសឲ្យបាន [អានឹងបានវាពូកែ]»។ លោក ជា ប៊ុនហេង បានបង្ហាញក្តីរំពឹងបែបនេះក្នុងពិធីបិទការប្រកួតជើងឯកថ្នាក់ជាតិ និងពានរង្វាន់សម្តេច ស ខេង ប្រចាំឆ្នាំ២០២០ កាលពីពេលកន្លងទៅថ្មីៗ។
ការហ៊ានដាក់គោលដៅខ្ពស់បែបនេះ ធ្វើឡើងក្រោយអនុប្រធានទី១សហព័ន្ធរូបនេះ សង្កេតឃើញពីការវិវត្តខ្លួនយ៉ាងឆាប់រហ័សរបស់កីឡាសូហ្វតិន្នីសក្នុងរយៈពេលប៉ុន្មានឆ្នាំចុងក្រោយនេះ។ ការឈ្នះមេដាយជាបន្តបន្ទាប់របស់ក្រុមកីឡាករជម្រើសជាតិនិងយុវជនថ្នាលក្នុងការប្រកួតកម្រិតពិភពលោក អាស៊ី និងអាស៊ាន វាក៏ជាកត្តាមួយក្នុងការជួយជំរុញឲ្យលោកហ៊ានដាក់ក្តីរំពឹងបែបនេះផងដែរ។
លោកបានបន្ថែមថា៖«យើងអាចវាយតម្លៃបានថា គិតមកទល់ពេលនេះវិស័យកីឡាសូហ្វតិន្នីសកម្ពុជាពិតជាមានការរីកចម្រើនខ្លាំងគួរឲ្យកត់សម្គាល់។ ជាក់ស្តែងកន្លងមកយើងដណ្តើមបានមេដាយសំរឹទ្ធពីរក្នុងការប្រកួតកីឡាស៊ីហ្គេមនៅហ្វីលីពីន(ឆ្នាំ២០១៩)។ និយាយរួម រាល់ព្រឹត្តិការណ៍ប្រកួត ដែលក្រុមកីឡាករសូហ្វតិន្នីសចូលរួម តែងតែទទួលបានលទ្ធផលជាមេដាយ»។
ទន្ទឹមនឹងដាក់ក្តីរំពឹងលោកឧត្តមសេនីយ៍ឯក ជា ប៊ុនហេង ជំរុញឲ្យកីឡាករកីឡាការិនីទាំងអស់ខិតខំព្យាយាមហ្វឹកហាត់អភិវឌ្ឍន៍សមត្ថភាពឲ្យកាន់តែល្អប្រសើរ។ ដ្បិតលោកយល់ថា ភាពជោគជ័យ ឬគោលដៅមួយអាចសម្រេចទៅបាន វាអាស្រ័យលើការខិតខំប្រឹងប្រែងរបស់កីឡាករ ក្រោមការជួយជំរុញ និងលើកទឹកចិត្តពីថ្នាក់ដឹកនាំ។
សូហ្វតិន្នីសជាកីឡាមួយប្រភេទក្នុងចំណោម១៧ប្រភេទ ត្រូវបានថ្នាក់ដឹកនាំកីឡាកម្ពុជា ចាត់ថ្នាក់ជាប្រភេទកីឡាសក្តានុពលក្នុងការប្រជែងដណ្តើមមេដាយពីព្រឹត្តិការណ៍កីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ ជូនជាតិមាតុភូមិ៕
Tag:
សូហ្វតិន្នីស
ជា ប៊ុនហេង
© រក្សាសិទ្ធិដោយ thmeythmey.com
