ជាតិ
២៥ខេត្ត/រាជធានី
សោកស្តាយ! ខ្ទីងមួយក្បាលទៀតត្រូវព្រានព្រៃសម្លាប់ ហេីយថែមទាំងពន្លះសាច់ សពសត្វខ្ទីងមួយក្បាល ដែលគេប្រទះឃើញកាលពីខែឧសភាកន្លងទៅ។
× ភ្នំពេញ៖ សត្វខ្ទីងមួយក្បាលទៀត ត្រូវបានសម្លាប់ទាំងជើងជាប់អន្ទាក់ ហើយត្រូវបានជនល្មើសពន្លះសាច់ជាដុំៗ មុនពេលក្រុមមន្ត្រីឧទ្យានុរក្ស និងមន្ត្រីនៃអង្គការសម្ព័ន្ធមិត្តសត្វព្រៃ ដែលចុះល្បាតទប់ស្កាត់ និងបង្ក្រាបបទល្មើសទៅដល់។ នេះបើតាមលោក នេត្យ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ប្រាប់ក្រុមអ្នកសារព័ត៌មានតាមបណ្តាញតេឡេក្រាម នៅយប់ថ្ងៃទី២៣មិថុនានេះ។ លោក នេត្រ ភក្ត្រា បញ្ជាក់ថា សាកសពសត្វខ្ទីង ដែលជាប្រភេទសត្វកម្រនេះ ត្រូវបានប្រទះឃើញនៅថ្ងៃទី២៣ ខែ មិថុនា ឆ្នាំ២០២០នេះ នៅក្នុងដែនជម្រកសត្វព្រៃភ្នំសំកុស ខេត្តពោធិ៍សាត់។ ។
អ្នកនាំពាក្យរូបនេះ ពន្យល់បន្ថែមថា៖«ក្រុមជនល្មើសបានរត់គេចខ្លួនបាត់ នៅពេលដែលដឹងថាក្រុមមន្ត្រីឧទ្យានុរក្សដើរល្បាតនៅក្នុងតំបន់នោះ ដោយបន្សល់ទុកនូវសាច់សត្វខ្ទីង ដែលបានពន្លះជាដុំៗ បម្រុងនឹងដឹកចេញ។ សត្វខ្ទីងដែលត្រូវបានសម្លាប់នេះ មានជើងជាប់អន្ទាក់ ហើយស្នែងរបស់វា ត្រូវបានគេកាត់យកទៅបាត់ បន្សល់ទុកក្បាល និងសាច់ជាច្រើនគីឡូក្រាម»។
លោក នេត្រ ភក្ត្រា បានបង្ហាញការសោកស្តាយយ៉ាងខ្លាំង ចំពោះការបាត់បង់សត្វខ្ទីងមួយក្បាលនេះ មុននឹងថ្កោលទោសក្រុមជនល្មើស ដែលតែងតែងលួចដាក់អន្ទាក់សត្វ និងបរបាញ់សត្វកម្រនៅកម្ពុជា។ ទន្ទឹមនឹងលោករដ្ឋលេខាធិការរូបនេះ ទទូចឲ្យពលរដ្ឋ ដែលបានដឹង ឬស្គាល់ពីអត្តសញ្ញាណជនល្មើស រាយការណ៍ប្រាប់សមត្ថកិច្ចផងដែរ។
នេះគឺជាសត្វខ្ទីងទី២ហើយ ដែលរកឃើញថាត្រូវបាននៅក្នុងរយៈពេល២ ខែចុងក្រោយនេះ។ កាលពីខែឧសភាកន្លងទៅ ខ្ទីងពេញវ័យមួយក្បាលអាយុប្រហែល ៥ឆ្នាំ ត្រូវបានព្រានបាញ់សម្លាប់ ដោយបន្សល់ទុកតែក្បាល នៅក្នុងដែនជម្រកសត្វព្រៃព្រះរកា នៅក្នុងខេត្តព្រះវិហារ។ នេះបើតាមអ្នកនាំពាក្យក្រសួងបរិស្ថាន ដែលលោកបានបញ្ជាក់បន្តថា អន្ទាក់ និងកាំភ្លើងកែច្នៃ គឺជាឃាតកលាក់មុខ សម្លាប់សត្វព្រៃនៅកម្ពុជាជារៀងរាល់ថ្ងៃ។ អ្នកនាំពាក្យក្រសួងបរិស្ថានរូបនេះ ឲ្យដឹងថា គ្រាន់តែក្នុងរយៈពេល៤ខែដើមឆ្នាំ២០២០នេះ មានអន្ទាក់ជាងមួយម៉ឺន ត្រូវបានដោះចេញពីតំបន់ការពារធម្មជាតិ ហើយកាំភ្លើង និងកាំភ្លើងកែច្នៃជាង ៣០០ដើម ត្រូវបានរឹបអូស។
យោងតាមជីវសាស្ត្រ សត្វខ្ទីង អាចរស់នៅបានពីតំបន់ទំនាប រហូតដល់រយៈកម្ពស់ខ្ពស់រហូតដល់កម្ពស់ជាង ២០០០ ម៉ែត្រ។ នៅកម្ពុជា សត្វខ្ទីងមានវត្តមានរស់នៅតំបន់មួយចំនួនដូចជាភូមិភាគឦសាន ភូមិភាគខាងជើងខេត្តកោះកុង ពោធិ៍សាត់(ជួរភ្នំក្រវាញ) និងក្នុងខេត្តកំពង់ស្ពឺជាដើម។ សត្វខ្ទីង ជាប្រភេទសត្វកម្រដែលងាយទទួលរងការគំរាមកំហែងយ៉ាងខ្លាំង និងត្រូវបានចុះក្នុងបញ្ជីក្រហម IUCN ថាជាប្រភេទសត្វព្រៃងាយរងគ្រោះថ្នាក់ជាសកលនៅឆ្នាំ១៩៨៦ ។ នៅឆ្នាំ ២០១៦ សត្វខ្ទីងនៅលើពិភពលោក មានចំនួនប្រមាណ ២១០០០ ក្បាល ដែលរស់នៅក្នុងប្រទេសឥណ្ឌា និងតំបន់អាស៊ីអាគ្នេយ៍។
ដើម្បីចូលរួមការពារ និងអភិរក្សសត្វព្រៃជាពិសេសសត្វព្រៃកម្រៗនៅលើពិភពលោក ដែលមានវត្តមាននៅកម្ពុជា រដ្ឋលេខាធិការក្រសួងបរិស្ថាន បានទទូចអង្វរដល់ប្រជាពលរដ្ឋទាំងអស់ ឲ្យបញ្ឈប់ការបរិភោគសាច់សត្វព្រៃ ។ លើសពីនេះ លោក នេត្រ ភក្ត្រា សង្កត់ធ្ងន់ថាសមត្ថកិច្ចពាក់ព័ន្ធ នឹងអនុវត្តច្បាប់ប្រឆាំងនឹងជនល្មើសសម្លាប់សត្វ មិនលើកលែងនោះឡើយ៕
© រក្សាសិទ្ធិដោយ thmeythmey.com