លោក ត្រាំ ថា ទ័ពអាមេរិកដែលដកពីអាល្លឺម៉ង់ នឹងត្រូវពង្រាយខ្លះនៅប៉ូឡូញដែលជាប់រុស្ស៊ី

អន្តរជាតិ

លោក ត្រាំ ថា ទ័ពអាមេរិកដែលដកពីអាល្លឺម៉ង់ នឹងត្រូវពង្រាយខ្លះនៅប៉ូឡូញដែលជាប់រុស្ស៊ី

25, Jun 2020 , 1:22 pm

រូបភាព

ប្រធានាធិបតីប៉ូឡូញ និងប្រធានាធិបតីអាមេរិកនៅសេតវិមាន។ រូបភាព AFP

ដោយ: តន ចាន់រិទ្ធារ៉ា

ប្រធានាធិបតីអាមេរិក ដូណាល់ ត្រាំ នៅថ្ងៃទី២៤ ខែមិថុនា និយាយថា កងទ័ពមួយផ្នែកនៃទាហានអាមេរិកដែលដកពីអាល្លឺម៉ង់ នឹងត្រូវបញ្ជូនទៅកាន់ប៉ូឡូញដែលមានព្រំដែនជាប់រុស្ស៊ី។ លោក ត្រាំ ប្រកាសបែបនេះនាជំនួបនៅសេតវិមានជាមួយសមភាគីប៉ូឡូញដែលបង្ហាញការសប្បាយចិត្តចំពោះការសម្រេចិត្តបែបនេះ។ លោក ត្រាំ ចាត់ទុកការពង្រាយទ័ពនៅប៉ូឡូញ ជាសារផ្ញើដ៏ខ្លាំងក្លាមួយទៅកាន់រុស្ស៊ីផងដែរ។

លោក ដូណាល់ ត្រាំ បានស្វាគមន៍ប្រធានាធិបតីប៉ូឡូញ Andrzej Duda នៅសេតវិមាន បើទោះជាបញ្ហា COVID-19 បន្តរាលដាលក្ដី។ ការពង្រឹងជំនួយយោធាអាមេរិកលើប៉ូឡូញជាគោលដៅសំខាន់មួយនៃដំណើរទស្សនកិច្ចរបស់លោក Duda ដែលធ្វើឡើងបួនថ្ងៃប៉ុណ្ណោះមុនការបោះឆ្នោតថ្នាក់ជាតិនៅប៉ូឡូញ។

អត្ថបទទាក់ទង

លោក ត្រាំ ប្រកាសកាត់បន្ថយទ័ពអាមេរិកនៅអាល្លឺម៉ង់ពាក់កណ្តាលព្រោះមិនជួយចេញថ្លៃចំណាយ

ថ្លែងទៅកាន់អ្នកសារព័ត៌មានក្នុងបន្ទប់ពងក្រពើក្នុងជំនួបជាមួយលោក Duda លោក ត្រាំ ក៏និយាយដល់ការដកទ័ពពីអាល្លឺម៉ង់។ ប្រធានាធិបតីអាមេរិកនិយាយថា អាមេរិក នឹងដកទ័ពពីអាល្លឺម៉ង់ពី៥២០០០នាក់ មកត្រឹម២៥០០០នាក់វិញ។ មូលហេតុនៃការដកនេះ ត្រូវបានលោក ត្រាំ អះអាងថា ដោយសារទីក្រុងបែរឡាំងមិនព្រមបង្កើនវិភាគទានរបស់ខ្លួនសម្រាប់ណាតូ និងការកេងចំណេញពាណិជ្ជកម្មជាមួយអាមេរិក។

«កងទ័ពខ្លះ នឹងត្រឡប់ទៅផ្ទះវិញ ហើយខ្លះទៀតទៅកន្លែងផ្សេង។ ប៉ួឡូញ ក៏ស្ថិតក្នុងចំណោមនោះដែរ។» នេះជាការបញ្ជាក់របស់លោក ត្រាំ ដែលផ្សាយដោយទីភ្នាក់ងារព័ត៌មាន AFP ។ លោក Duda វិញ សប្បាយចិត្តមិនស្ទើរឡើយ ដោយនិយាយថា នេះជាការសម្រេចចិត្តដ៏សមហេតុផល។ មេដឹកនាំប៉ូឡូញរូបនេះ បានទម្លាយដែរថា លោកបានស្នើឲ្យលោក ត្រាំ កុំដកយោធាអាមេរិកចេញពីអឺរ៉ុប ព្រោះអឺរ៉ុបសំខាន់ណាស់សម្រាប់ប៉ូឡូញ។

នៅពេលអ្នកសារព័ត៌មានសួរថា ការពង្រាយកម្លាំងទៅប៉ូឡូញបែបនេះមានន័យយ៉ាងណាសម្រាប់រុស្ស៊ី លោក ត្រាំ ក៏ចាត់ទុកការពង្រាយទ័ពនេះ ជាសញ្ញាដ៏ខ្លាំងសម្រាប់គូប្រជែងរបស់ណាតូ។ លោក ត្រាំ មិនបានបញ្ជាក់ពីចំនួនទ័ព ឬយុទ្ធោបករណ៍ដែលផ្ទេរពីអាល្លឺម៉ង់ទៅប៉ូឡូញឡើយ។ ប៉ុន្តែសារព័ត៌មានក្នុងស្រុកប៉ូឡូញ Dziennik Gazeta Prawna ផ្សាយថា យន្តហោះF-16 ៣០គ្រឿងដែលនៅអាល្លឺម៉ង់ និងទាហាន២ពាន់នាក់ អាចពង្រាយនៅប៉ូឡូញវិញ។

បើសម្ដីលោក ត្រាំ ក្លាយជាការពិត ការប្រឈមមុខរវាងរុស្ស៊ី និងណាតូ នឹងតានតឹងកាន់តែខ្លាំងមិនខាន។ កន្លងទៅ សម្ព័ន្ធយោធាណាតូ ធ្លាប់សន្យាថា ខ្លួននឹងមិនពង្រាយកងទ័ពអចិន្ត្រៃយ៍នៅព្រំដែនជាមួយរុស្ស៊ីឡើយ។ យ៉ាងណាមិញ នៅពេលការប្រឈមមុខលេខកាន់តែច្បាស់ ណាតូ ក៏ចាប់ផ្ដើមចល័តទ័ពចុះឡើយនៅតាមប្រទេសដែលជាខ្សែត្រៀមជាប់រុស្ស៊ី៕