អន្តរជាតិ
លោក ទ្រូដូ មិនអន្តរាគមន៍ឲ្យដោះលែងមន្ត្រី Huawei ជាថ្នូរការរួចខ្លួនជនជាតិកាណាដាពីរនាក់នៅចិន
នាយករដ្ឋមន្រ្តីកាណាដា ចាស្ទីន ទ្រូដូ ។ រូបភាព AFP
×![]()
ដោយ: តន ចាន់រិទ្ធារ៉ា
នាយករដ្ឋមន្ត្រីកាណាដា ចាស្ទីន ទ្រូដូ នៅថ្ងៃទី២៥ ខែមិថុនា បានទាត់ចោលសំណើមួយដែលចង់ឲ្យមានការធ្វើអន្តរាគមន៍ដើម្បីបញ្ចប់សំណុំរឿងធ្វើបត្យាប័នមន្ត្រីហិរញ្ញវត្ថុ Huawei ហើយដោះលែងឲ្យមានសេរីភាព ជាថ្នូរនឹងការរួចខ្លួនរបស់ជនជាតិកាណាដាពីរនាក់ដែលកំពុងស្ថិតក្រោមការឃុំខ្លួនពីសំណាក់អាជ្ញាធរចិន។ លោក ទ្រូដូ បកស្រាយថា បើលោកលូកដៃចូលបោះ មានន័យស្មើនឹងឲ្យជនជាតិកាណាដាក្រោយៗទៀតត្រូវចាប់ខ្លួនដើម្បីតថ្លៃនយោបាយ។
ក្រុមអតីតមន្ត្រីជាន់ខ្ពស់កាណាដាចំនួន១៧នាក់ បានសរសេរសំបុត្រផ្ញើឲ្យនាយករដ្ឋមន្ត្រីកាណាដា ចាស្ទីន ទ្រូដូ ដោយស្នើឲ្យជួយដោះស្រាយបញ្ហាជនជាតិកាណាដាពីរនាក់ដែលកំពុងជាប់ឃុំនៅចិន ដែលករណីនេះត្រូវមើលឃើញថា ជាការសងសឹកដោយចិនក្រោយកាណាដាចាប់ខ្លួននាយកហិរញ្ញវត្ថុ Huawei លោកស្រី ម៉ឹង វ៉ាន់ចូវ តាមសំណើអាមេរិក។ មន្ត្រីទាំងនេះ ចង់ឲ្យលោក ទ្រូដូ ក្នុងនាមជានាយករដ្ឋមន្ត្រីណែនាំរដ្ឋមន្ត្រីយុត្តិធម៌ឲ្យពិនិត្យមើលករណីនេះ
បើតាមប្រព័ន្ធផ្សព្វផ្សាយកាណាដា CBC លិខិតថ្ងៃទី២៤ ខែមិថុនា អះអាងថា រដ្ឋមន្ត្រីយុត្តិធម៌កាណាដា មានអំណាចក្នុងការបញ្ចប់នីតិធ្វើបត្យាប័នលោកស្រី ម៉ឹង ។ ពួកគេបន្តថា ការដោះលែងមន្ត្រីក្រុមហ៊ុនចិនរូបនេះ នឹងផ្ដល់ឱកាសឲ្យកាណាដាក្នុងការរៀបចំគោលនយោបាយជាមួយចិនសារឡើងវិញ ខណៈការដើរតាមអាមេរិកធ្វើឲ្យកាណាដាជួបបញ្ហាខ្លាំងជាមួយចិន។
យ៉ាងណាមិញ លោក ទ្រូដូ មិនយល់ឃើញដូចនោះឡើយ ដោយលោកបញ្ជាក់ថា កាណាដាមិនចុះញ៉មសម្ពាធរបស់ចិនដើម្បីគ្រាន់តែការដោះលែងជនជាតិកាណាដាឈ្មោះ Michael Spavor និងMichael Kovrig នោះឡើយ។ នាយករដ្ឋមន្ត្រីរូបនេះ បានឆ្លើយនឹងលិខិតខាងលើវិញថា៖ «ខ្ញុំគោរពបុគ្គលដែលផ្ញើសំបុត្រមកខ្ញុំ។ ប៉ុន្តែខ្ញុំមិនយល់ស្របនឹងយោបល់ពួកគេឡើយ។ មធ្យោបាយរបស់ពួកគេមិនត្រូវឡើយ។»
មេដឹកនាំកាណាដារូបនេះ សង្កត់ធ្ងន់ថា ការដោះលែងលោកស្រី ម៉ឹង ដើម្បីគ្រាន់តែដោះស្រាយបញ្ហារយៈពេលខ្លី នឹងនាំគ្រោះថ្នាក់ឲ្យជនជាតិកាណាដារាប់ពាន់នាក់ដែលធ្វើដំណើរទៅចិន និងនៅជុំវិញពិភពលោក ហើយក៏ដូចជាការប្រាប់ឲ្យប្រទេសដទៃដឹងថា ពួកគេអាចដាក់សម្ពាធលើកាណាដាបានដោយគ្រាន់តែចាប់ជនជាតិកាណាដាធ្វើចំណាបខ្មាំង។
ទាក់ទងរឿងដដែលនេះ លោក ទ្រូដូ ក៏បញ្ជាក់ជាថ្មីនូវឯករាជ្យភាពប្រព័ន្ធយុត្តិធម៌ នីតិរដ្ឋនៅកាណាដា ហើយសំណុំរឿងមន្ត្រីក្រុមហ៊ុនចិនរូបនេះ នឹងបន្តតាមនីតិវិធីតុលាការកាណាដាដដែល។ ជាមួយនឹងជំហរបែបនេះ ជនជាតិកាណាដាទាំងពីរនាក់ខាងលើ ដែលត្រូវចោទថា ចែកចាយព័ត៌មានសម្ងាត់រដ្ឋ ប្រាកដជាបន្តស្ថិតក្រោមការចំណាត់ការរបស់ប៉េកាំងទៀត រហូតដល់សំណុំរឿងលោកស្រី ម៉ឹង មានលទ្ធផល៕
Tag:
ចិន
កាណាដា
ចាស្ទី ទ្រូដូ
Huawei
© រក្សាសិទ្ធិដោយ thmeythmey.com
