អាមេរិកនឹងផ្តល់ថវិកាជាង៥០លានដុល្លារដល់កម្ពុជា សម្រាប់ជួយវិស័យចំនួន៤

ជាតិ

សេដ្ឋកិច្ច

អាមេរិកនឹងផ្តល់ថវិកាជាង៥០លានដុល្លារដល់កម្ពុជា សម្រាប់ជួយវិស័យចំនួន៤

26, Jun 2020 , 10:59 pm

រូបភាព

លោក W. Patrik Murphy ឯកអគ្គរដ្ឋទូតអាមេរិកប្រចាំកម្ពុជា (រូបកណ្តាល)

ដោយ: អ៊ូ សុខមាន (OU Sokmean)

ភ្នំពេញ៖ សហរដ្ឋអាមេរិក នឹងផ្តល់ហិរញ្ញប្បទាន៥៦លានដុល្លារ សម្រាប់អភិវឌ្ឍវិស័យចំនួន៤ នៅកម្ពុជា។ ហិរញ្ញប្បទាននេះ គឺជាជំនួយឥតសំណងដែលរដ្ឋាភិបាលអាមេរិក បានចុះហត្ថលេខាជាមួយរដ្ឋាភិបាលកម្ពុជា នៅថ្ងៃទី២៥មិថុនា ឆ្នាំ២០២០ លើកិច្ចព្រមព្រៀងវិសោធនកម្ម ស្តីពីហិរញ្ញប្បទានសហប្រតិកម្មការអភិវឌ្ឍសម្រាប់ឆ្នាំសារពើពន្ធ២០១៩កន្លងមក។

បើតាមសេចក្តីប្រកាសព័ត៌មានរួមស្តីពីកិច្ចព្រមព្រៀងខាងលើ ថវិកាដែលអាមេរិកផ្តល់កម្ពុជាជាង៥០លានដុលា្លរនោះ មាន៣៨លានដុល្លារគឺសម្រាប់អភិវឌ្ឍវិស័យសុខាភិបាល និង១៨លានដុល្លារសម្រាប់គាំទ្រលើវិស័យអប់រំ កសិកម្ម និងបរិស្ថាន ដែលអនុវត្តទៅតាមគម្រោងនានា នៅកម្ពុជា។ សេចក្តីប្រកាសព័ត៌មានដដែលនេះបានបញ្ជាក់ថា ថវិកាទាំងនេះនឹងផ្តល់ឱ្យកម្ពុជាតាមរយៈទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ(USAID)។

លោក ជិន ប៊ុនស៊ាន អនុប្រធានក្រុមបប្រឹក្សាអភិវឌ្ឍន៍កម្ពុជា(CDC) មានប្រសាសន៍ថា ការបន្តកិច្ចសហប្រតិបត្តិការអភិវឌ្ឍទ្វេភាគីនេះ គឺជាសសរស្តម្ភដ៏សំខាន់ក្នុងការលើកកម្ពស់ និងពង្រឹកិច្ចសហប្រតិបត្តិការ និងភាពជាដៃគូរវាងកម្ពុជា និងអាមេរិក។

ជាមួយគ្នានេះលោក W. Patrik Murphy ឯកអគ្គរដ្ឋទូតអាមេរិកប្រចាំកម្ពុជា ក៏បញ្ជាក់ថា សហរដ្ឋអាមេរិក ប្តេជ្ញាបន្តការគាំទ្ររបស់ខ្លួនចំពោះប្រជាជនកម្ពុជា ក្នុងការសម្រេចចិត្តឱ្យបាននូវការអភិវឌ្ឍសង្គមសេដ្ឋកិច្ចមួយប្រកបដោយចីរភាព បរិយាប័ន្ន និងសមធម៌។

ក្នុងសេចក្តីប្រកាសព័ត៌មានដដែលនេះបានសរសេររៀបរាប់បន្តថា តាមរយៈកិច្ចសហប្រតិបត្តិការជាមួយក្រសួងសុខាភិបាល ការគាំទ្ររបស់សហរដ្ឋអាមេរិកនេះ នឹងបន្តរួមចំណែកកាត់បន្ថយអត្រាមរណៈភាពមាតា និងទារកក្រោមអាយុ៥ឆ្នាំ ក៏ដូចជាការផ្តល់ការគាំទ្រលើកម្មវិធីនានាក្នុងការកាត់បន្ថយជំងឺក្រិន និងជំងឺខ្វះគ្រាប់ឈាមក្រហមរបស់កុមារ និងស្ត្រី។ ក្រៅពីជួយកាត់បន្ថយអត្រាប្រេវ៉ាឡង់នៃជំងឺអេដស៍ ជំងឺរបេង និងជំងឺគ្រុនចាញ់ នៅកម្ពុជាផងដែរ។

ចំពោះវិស័យអប់រំវិញ ក្រសួងអប់រំ យុវជន និងកីឡា និងទីភ្នាក់ងារUSAID នឹងបន្តគាំទ្រកិច្ចខិតខំក្នុងការធ្វើឱ្យប្រសើរឡើងនូវសមត្ថភាពការអានរបស់កុមារ។ ការកាត់បន្ថយអត្រាបោះបង់ចោលការសិក្សានៅថ្នាក់វិទ្យាល័យ និងបំពាក់បំប៉នបន្ថែមដល់ប្រជាជនកម្ពុជា ក្នុងការឈានចូលទៅក្នុងទីផ្សារពលកម្ម។

សម្រាប់ភាពជាដៃគូរវាងក្រសួងកសិកម្ម រុក្ខាប្រមាញ់ និងនេសាទ វិញ ទីភ្នាក់ងារUSAIDនឹងផ្តល់ការគាំទ្រលើកម្មវិធីក្នុងការកាត់បន្ថយភាពក្រីក្រ លើកកម្ពស់ការផលិតគ្រប់ពូជសំខាន់ៗ និងអាហារូបត្តម្ភក្នុងសហគមន៍ជនបទ។

ទន្ទឹមនឹងគ្នានេះ ក្រោមកិច្ចសហប្រតិបត្តិការជាមួយក្រសួងបរិស្ថាន កិច្ចព្រមព្រៀងហិរញ្ញវត្ថុនេះ នឹងគាំទ្រកម្មវិធីបរិស្ថានក្នុងការកាត់បន្ថយភាពងាយរងគ្រោះរបស់ប្រជាជន ក៏ដូជាតំបន់ទេសភាពដែលទទួលរងផលប៉ះពាល់ពីការប្រែប្រួលអាកាសធាតុ និងបានជួយកម្ពុជា សម្រេចបានតាមការប្តេជ្ញាក្នុងក្រមខណ្ឌអន្តរជាតិរបស់ខ្លួន ក្នុងការកាត់បន្ថយការបំភាយឧស្ម័នផ្ទះកញ្ចក់ ជាពិសេសដែលបណ្តាលមកពីការបាត់បង់ និងរេចរិលព្រៃឈើ។

លោក ជិន ប៊ុនស៊ាន អនុប្រធានក្រុមបប្រឹក្សាអភិវឌ្ឍន៍កម្ពុជា(CDC)

គិតចាប់ពីខែមីនា ឆ្នាំ២០១៦ មកដល់ថ្ងៃទី២៥មិថុនា ឆ្នាំ២០២០ អាមេរិកបានផ្តល់ហិរញ្ញប្បទានឥតសំណងដល់កម្ពុជា សម្រាប់គាំទ្រដល់វិស័យអទិភាពទាំង៤ខាងលើនេះ មានចំនួនសរុប២៥៣លានដុល្លារ។ បន្ថែមលើសពីនេះ រដ្ឋាភិបាលអាមេរិក ក៏បានផ្តល់ការគាំទ្រដល់អង្គការសង្គមស៊ីវិលដែលបានធ្វើការផ្តោតលើសិទ្ធមនុស្ស, ការប្រឆាំងការជួញដូរមនុស្ស និងគណនេយ្យភាព និងតម្លាភាពសង្គមផងដែរ។

ដោយឡែក គិតចាប់ពីខែមីនា ឆ្នាំ២០២០មក អាមេរិក បានផ្តល់ថវិកាឥតសំណងប្រមាណ១១លានដុល្លារ ដែលគាំទ្រដល់ផែនការឆ្លើយតបបន្ទាន់ទៅនឹងជំងឺកូវីដ-១៩ របស់រដ្ឋាភិបាលកម្ពុជា។ សរុបមក គិតចាប់តាំងពីឆ្នាំ១៩៩៤ មកដល់បច្ចុប្បន្ន រដ្ឋាភិបាលអាមេរិកបានផ្តល់ការគាំទ្រដល់កម្ពុជាជាង ១,០០០លានដុល្លារ៕