ជាតិ
ក្រសួងផែនការ នឹងបង្កើតក្រុមការងារឆ្លើយឆ្លងបន្ទាប់ ចាំដោះស្រាយបញ្ហាធ្វើប័ណ្ណសមធម៌ លោក ថេង បញ្ញាធន អគ្គនាយកផែនការនៃក្រសួងផែនការ ក្នុងពិធីសន្និសីទសារព័ត៌មានស្ដីពី នីតិវិធីនិងដំណើរការអនុវត្តកម្មវិធីឧបត្ថមសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលជំងឺកូវីដ-១៩ ថ្ងៃទី២៥ មិថុនា។
× ភ្នំពេញ៖ ក្រសួងផែនការ នឹងបង្កើតក្រុមការងារអន្តរាគមន៍ (Hotline) ចាំដោះស្រាយបញ្ហាពលរដ្ឋលើករណីធ្វើប័ណ្ណសមធម៌ ដើម្បីទប់ស្កាត់ករណីពុករលួយ ដែលនាំឱ្យប៉ះពាល់ដល់ពលរដ្ឋក្រីក្រជាក់ស្ដែង។
អគ្គនាយកផែនការនៃក្រសួងផែនការ លោក ថេង បញ្ញាធន បានបញ្ជាក់ថា ក្រសួង និងក្រុមការងារមន្ទីរ ក៏ដូចជាអាជ្ញាធរមូលដ្ឋាន និងសង្កេតលើស្ថានភាពពលរដ្ឋ ដើម្បីពិនិត្យរកភាពមិនប្រក្រតីណាមួយ លើការចែកបណ្ណសមធម៌ ដល់ពលរដ្ឋក្រីក្រតាមមូលដ្ឋាននេះ។ បើតាមលោក ថេង បញ្ញាធន ក្រសួងនឹងបង្កើតក្រុមការងារទទួលពាក្យបណ្ដឹង និងស៊ើបអង្កេត លើករណីធ្វើប័ណ្ណសមធម៌ ហើយបើរកឃើញពលរដ្ឋណាម្នាក់ក្លែងបន្លំជាជនក្រីក្រ ក្រសួងនឹងដកបណ្ណសមធម៌វិញ។
អគ្គនាយកផែនការនៃក្រសួងផែនការ ថ្លែងក្នុងសន្និសីទសារព័ត៌មានស្ដីពីនីតិវិធីនិងដំណើរការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលជំងឺកូវីដ-១៩ កាលពីថ្ងៃទី ២៥ មិថុនា យ៉ាងដូច្នេះថា៖«ក្រុមការងារជាតិឬអាជ្ញាធរ រួមទាំងមន្រី្តរបស់មន្ទីរផែនការ ក៏បានចុះទៅចែក (បណ្ណសមធម៌) ដល់មូលដ្ឋានផ្ទាល់តែម្ដង។ អ៊ីចឹងពេលយើងចែកហ្នឹង ក៏អាចជាយន្តការមួយកាត់បន្ថយនូវអ្វីដែលជាការបន្លំ គប់គិតគ្នា ដើម្បីទទួលបានបណ្ណសមធម៌នេះហើយ...»។
កាលពីថ្ងៃទី២៤ ខែមិថុនា ក្នុងពិធីប្រកាសជាផ្លូវការនូវកម្មវិធីឧបត្ថម្ភសាច់ប្រាក់ជូនប្រជាពលរដ្ឋភាពក្រីក្រនិងងាយរងគ្រោះក្នុងអំឡុងពេលជំងឺកូវីដ-១៩ ប្រមាណ៦០ម៉ឺនគ្រួសារ សម្ដេចនាយករដ្ឋមន្ត្រី ហ៊ុន សែន បានឲ្យអាជ្ញាធរខេត្តនិងក្រសួងផែនការ តាមដានលើស្ថានភាពជីវភាពរបស់ប្រជាជនឲ្យបានដិតដល់ ដើម្បីធ្វើរបាយការណ៍ឲ្យក្រសួងសេដ្ឋកិច្ច និងហិរញ្ញវត្ថុ សម្រាប់រៀបចំផ្ដល់ថវិកាឲ្យបានគ្រប់ចំនួន៕
© រក្សាសិទ្ធិដោយ thmeythmey.com