ភ្នំពេញ៖ រាល់និស្សិតដែលរៀនដោយខ្លួនឯង និងរៀនតាមអនឡាញ អាចបន្តនិរន្តរភាពនៃការសិក្សាប្រកបដោយគុណភាព។ ប៉ុន្តែនិស្សិតដែលរៀនផ្នែក STEM ដែលតែងរៀនផ្នែកអនុវត្ត ច្រើនជាងរៀនផ្នែកទ្រឹស្តីនោះ ហាក់បីទទួលបានចំណេះដឹងមិនពេញលេញឡើយ។ និស្សិតខ្លះទៀតអាចរៀនតែទ្រឹស្តីតែមួយមុខតែប៉ុណ្ណោះ។ តែនិស្សិតខ្លះនៅតែអាចបន្តរៀនទ្រឹស្តីបណ្តើរ និងអនុវត្តបណ្តើរ។
សាលាទាំងអស់ត្រូវបានបិទ ហើយបន្ទប់សិក្សាស្រាវជ្រាវ ពិសោធន៍ និង ការអនុវត្តរបស់និស្សិតផ្នែកវិទ្យាសាស្ត្រ និងបច្ចេកវិទ្យាមួយចំនួនក៏ត្រូវផ្អាកបើកឲ្យដំណើរការជាបណ្តោះអាសន្ន ដើម្បីការពារពីជំងឺកូវីដ-១៩។
និស្សិតផ្នែកអគ្គិសនីនៅវិទ្យាស្ថានបច្ចេកវិទ្យាកម្ពុជា លោក ផេង សេងលី ដែលកំពុងតែរៀនផ្នែកអគ្គិសនីតាមអនឡាញ យល់ឃើញថា ការសិក្សារបស់ខ្លួនតាមអនឡាញ ធ្វើឲ្យសិស្សបាត់បង់គំនិតសម្រាប់ច្នៃប្រតិដ្ឋអ្វីមួយ។
លោក លោក ផេង សេងលី ដែលបានបម្រើការងារស្ម័គ្រចិត្តនៅក្រុមហ៊ុនផ្នែកអគ្គិសនីមួយកន្លែងរយៈពេល៣ខែ បាននិយាយដូច្នេះថា៖«ពេលយើងអត់បានធ្វើលើវាអ៊ីចឹងទៅ យើងអត់សូវមានគំនិតច្នៃអ្វីមួយ។ ពេលយើងបានធ្វើជាប់ យើងរៀងសុំាំជាមួយវា ជាងដែលយើងរៀនទ្រឹស្តីទៀត។ ពេលយើងរៀនជាមួយឧបករណ៍ យើងចាំ យើងដឹងថាអាហ្នឹងវាដើរម៉េច»។
លោក ព្រួយបារម្ភថា និស្សិតអាចប្រឈមនឹងការពិបាកទទួលបានឱកាសការងារនៅថ្ងៃអនាគត បើកាលណាសិស្សនៅតែបន្តរៀនទ្រឹស្តីតែមួយមុខ ដោយគ្មានការយល់ដឹងពីការប្រើប្រាស់ឧបករណ៍ ឬម៉ាស៊ីនណាមួយនៅតាមសាលា ឬនៅតាមស្ថាប័នណាមួយក្នុងអំឡុងមានវិបត្តិកូវីដ-១៩។
ថ្វីដ្បិត អវត្តមាននៅក្នុងបន្ទប់ពិសោធន៍ដែលមានឧបករណ៍ប្រើប្រាស់លើផ្នែកអគ្គិសនីអស់រយៈពេលជាយូរខែមកហើយក៏ពិតមែន តែនិស្សិត សេងលី អាចសិក្សាលើផ្នែក Software ដែលជាកម្មវិធីមួយ អាចឲ្យនិស្សិតសិក្សា និងយល់ពីដំណើរការម៉ាស៊ីន ឬឧបករណ៍ណាមួយ ជំនួសឲ្យការអនុវត្តផ្ទាល់ នៅក្នុងបន្ទប់ពិសោធន៍ផងដែរ។ និស្សិតវ័យ២០ឆ្នាំរូបនេះ បានលើកឡើងថា៖«សម្រាប់ខ្ញុំតាំងពីរៀនតាមអនឡាញមក ខ្ញុំអត់មានបញ្ហាអ្វីទេ ខ្ញុំដឹងបានច្រើន។ ការអនុវត្ត ខ្ញុំធ្វើទៅលើកម្មវិធី Software ច្រើនជាង»។
យ៉ាងណាក៏ដោយ មិនមែនរាល់និស្សិតផ្នែកស្ទែមទាំងអស់ គឺសុទ្ធតែមិនអាចអនុវត្តនៅបន្ទប់ពិសោធន៍ ឬបន្ទប់ស្រាវជ្រាវ ក្នុងអំឡុងនៃការសិក្សាតាមអនឡាញនោះទេ។ ជាក់ស្តែងនិស្សិតផ្នែកស្ទែមមួយចំនួនទៀត ក៏នៅតែអាចបន្តរៀនទាំងទ្រឹស្តីផង និងអនុវត្តផង។
លោក ឃឹម សៅគុណ ប្រធានផ្នែកស្រាវជ្រាវ និងអភិវឌ្ឍន៍ នៃវិទ្យាស្ថានជាតិពហុបច្ចេកវិទ្យាកម្ពុជា (NPIC) បានបញ្ជាក់ថា សម្រាប់និស្សិត រៀនជំនាញឬមុខវិជ្ជា ដែលទាមទារការអនុវត្តច្រើន គឺសុទ្ធតែអាចបន្តការរៀនតាមអនឡាញផង និងអាចអនុវត្តផង ប៉ុន្តែត្រូវគោរពតាមលក្ខខណ្ឌ ដែលក្រសួងសុខាភិបាល បានណែនាំ។
លោក សៅគុណ និយាយដូច្នេះថា៖«សម្រាប់សិស្សដែលត្រូវការអនុវត្ត គឺយើងរៀបកាលវិភាគឲ្យគាត់ចូលតាមក្រុមដែលមានគ្នា២ ទៅ៣នាក់។ បើគាត់មិនចាំបាច់ត្រូវធ្វើអីទេ យើងអត់ឲ្យពួកគាត់មានការជួបជុំទេ។ យើងរៀបតាមគោលការណ៍សុវត្ថិភាពរបស់រដ្ឋាភិបាល និងក្រសួងសុខាភិបាល ដោយណែនាំឲ្យគាត់ពាក់ម៉ាស់ លាងដៃពេលចូលក្នុងបន្ទប់អនុវត្ត»។
បើតាមលោក សៅគុណ ការណ៍ដែលសាលាអនុញ្ញាតឲ្យនិស្សិតចូលអនុវត្ត ដោយសារសាលាចង់ឲ្យនិស្សិតអាចបន្តការសិក្សា និងយល់ច្បាស់ពីការប្រើប្រាស់ឧបករណ៍ផ្សេងៗទៅតាមមុខជំនាញនីមួយៗរបស់ពួកគេ។ លោក សៅគុណ បន្តបែបនេះថា៖«ជាធម្មតា ការរៀនផ្នែកបច្ចេកវិទ្យាគឺចាំបាច់ត្រូវអនុវត្ត យើងមិនអាចផ្តោតតែទ្រឹស្តីទេ»។
និស្សិតម្នាក់ទៀត ឈ្មោះ ផៃ លីហួរ រៀនផ្នែកអេឡិចត្រូនិកនៅវិទ្យាស្ថានជាតិពហុបច្ចេកវិទ្យាកម្ពុជា ត្រេកអរចំពោះការបើកឱកាសឲ្យនិស្សិតចូលអនុវត្តលើមុខជំនាញបច្ចេកវិទ្យាន ដែលអាចឲ្យលោក អាចចូលក្នុងបន្ទប់ពិសោធន៍ និងអនុវត្ត សម្រាប់បន្តដំឡើងរ៉ូបូត (Robot ) ជាកិច្ចការងាររបស់គ្រូ សម្រាប់ជាស្នាដៃឲ្យនិស្សិតជំនាន់សិក្សាបន្តទៀត។
និស្សិតឆ្នាំទី៤រូបនេះ បាននិយាយដូច្នេះថា៖«ខ្ញុំត្រូវធ្វើសារណាបញ្ចប់ (នៅឆ្នាំនេះ)។ អ៊ីចឹងខ្ញុំអត់អាចត្រូវរង់ចាំធ្វើនៅឆ្នាំក្រោយបានទេ។ អ្នក ដែលត្រូវបញ្ចប់ការសិក្សានៅឆ្នាំនេះ គឺគ្រូ ផ្តល់អាទិភាព ឲ្យយើងចូលសាលាសម្រាប់ជាកិច្ចស្រាវជ្រាវ»។
STEM មកពីពាក្យថា Science (វិទ្យាសាស្ត្រ) Technology (បច្ចេកវិទ្យា) Engineering (វិស្វកម្ម) និង និង Mathematics (គណិតវិទ្យា)។ ការសិក្សាផ្នែក STEM ត្រូវបានគេមើលឃើញថា កំពុងពេញនិយមយ៉ាងខ្លាំង សម្រាប់ទីផ្សារការងារ នាយុគសម័យថ្មីនេះ៕