អន្តរជាតិ
សហភាពអឺរ៉ុប ពន្លឿនមហិច្ឆតានៅទីលំហដើម្បីតាមឲ្យទាន់បច្ចេកវិទ្យាចិននិងអាមេរិក
×![]()
សហភាពអឺរ៉ុប នឹងចាក់បញ្ចូលទឹកប្រាក់រាប់លានដុល្លារបន្ថែមទៀតទៅលើកម្មវិធីបង្ហោះកាំជ្រួច ប្រព័ន្ធផ្កាយរណបទំនាក់ទំនង និងការរុករកទីលំហ។ ប្រធានកម្មវិធីអវកាសអឺរ៉ុបបញ្ជាក់បែបនេះនៅថ្ងៃទី២៨ ខែមិថុនា។ កាវិនិយោគនេះ មានគោលដៅរក្សាកិត្តនាមជាអ្នកធ្លាប់ជោគជ័យក្នុងវិស័យនេះ ក៏ដូចជាតាមឲ្យទាន់សហរដ្ឋអាមេរិក និងចិនដែលបង្កើនសមត្ថភាពរបស់ពួកគេកាន់តែខ្លាំង។ 
«ទីលំហ ជាចំនុចខ្លាំងមួយរបស់អឺរ៉ុប ហើយយើងនឹងផ្តល់មធ្យោបាយដើម្បីពន្លឿន(កម្មវិធីលំហ)»។ នេះជាការលើកឡើងរបស់ លោក Thierry Breton ស្នងការអឺរ៉ុបទទួលបន្ទុកទីផ្សាផ្ទៃក្នុង និងជាអ្នកទទួលខុសត្រូក្នុងការកែលម្អការភ្ជាប់គ្នារវាងវិស័យលំហ សន្តិសុខ និងការការពារ។ លោក Breton បន្ថែមថា ថវិកាសហភាពអឺរ៉ុប នឹងត្រូវប្រើសម្រាប់គាំទ្របច្ចេកវិទ្យាថ្មីក្នុងការបង្កោះកាំជ្រួច ដែលរួមបញ្ចូលផងដែរនូវកាំជ្រួចដែលអាចប្រើប្រាស់បានឡើងវិញ។
បើតាមទីភ្នាក់ងារព័ត៌មាន Reuters ស្នងការអឺរ៉ុបរូបនេះ សង្ឃឹមថា សហភាពអឺរ៉ុបនឹងផ្តល់ទឹកប្រាក់១៦ពាន់លានអឺរ៉ូសម្រាប់វិស័យលំហ ក្នុងកញ្ចប់ថវិកាចំណាយរបស់ខ្លួន។ លោក Breton ក៏អះអាងផងដែរថា លោកនឹងស្នើទឹកប្រាក់១ពាន់លានអឺរ៉ូ ពីមូលនិធិលំហអឺរ៉ុបដើម្បីពន្លឿនដល់ការស្រាវជ្រាវ។ បន្ថែមពីនេះ លោក Breton ក៏ចង់បង្កើតការប្រកួតប្រជែងសម្រាប់ក្រុមហ៊ុនផ្កាយរណប និងអ្នកបង្ហោះយាន្ត ដើម្បីបង្កើនការបង្កើតថ្មីផងដែរ។
ការពន្លឿនកម្មវិធីលំហ របស់អឺរ៉ុបនេះធ្វើឡើងបន្ទាប់ពីក្រុមហ៊ុន SpaceX របស់អាមេរិក ទទួលបានជោគជ័យក្នុងការបង្ហោះកាំជ្រួចដែលអាចប្រើប្រាស់ឡើងវិញ ក៏ដូចជាការវិវឌ្ឍយ៉ាងរហ័សនូវកម្មវិធីលំហរបស់ចិន ដែលអាចឲ្យចិនអាចចុះចតយាន្តរបស់ខ្លួននៅជ្រុងងងឹតរបស់ព្រះចន្ទ។
លោក Breton បានលើកឡើងថា SpaceX បានកែប្រែរបៀបរបបនៃការបង្ហោះកាំជ្រួច ដូចនេះ ការអភិវឌ្ឍយាន Ariane 6 ជាជំហានចាំបាច់ ប៉ុន្តែមិនមែនជាគម្រោងចុងក្រោយឡើយ។ លោក Breton សង្កត់ថា សហភាពអឺរ៉ុបត្រូវចាប់ផ្តើមគិតពី Ariane 7 ផងដែរ។ Ariane គឺជាយានបង្ហោះទៅកាន់ទីលំហ ដែលស្ថិតក្រោមការគ្រប់គ្រងរបស់ទីភ្នាក់ងារលំហអឺរ៉ុប។
ចំពោះប្រព័ន្ធផ្កាយរណបកំណត់ទិសដៅ Galileo វិញ លោក Breton មានបំណងបញ្ចប់កម្មវិធីនេះក្នុងឆ្នាំ២០២៤ ពោលគឺ៣ឆ្នាំមុនការគ្រោងទុក ដើម្បីដាក់ចេញនូវផ្កាយរណបប្រភេទថ្មី ដែលទំនើបបំផុត អាចមានអន្តរកម្មជាមួយគ្នា និងផ្តល់សញ្ញាកាន់តែសុក្រឹត។ បន្ថែមពីនេះ ប្រព័ន្ធផ្កាយរណបថ្មីនឹងអាចផ្តល់ល្បឿនអ៊ីនធឺណិតដែលលឿនបំផុតសម្រាប់ប្រទេសអឺរ៉ុប និងចាប់ផ្តើមធ្វើការលើប្រព័ន្ធគ្រប់គ្រងចរាចរណ៍លំហ ដើម្បីជៀសវាងការប៉ះទង្គិច ដែលបណ្តាលមកពីការកើនឡើងចំនួនផ្កាយរណបយ៉ាងឆាប់រហ័ស៕
© រក្សាសិទ្ធិដោយ thmeythmey.com
