អ្នកគាំទ្រជាង២ពាន់នាក់នៅ World Cup 2018 កំពុងស្នាក់ដោយខុសច្បាប់នៅរុស្ស៊ីនៅឡើយ

កីឡាអន្តរជាតិ

អន្តរជាតិ

អ្នកគាំទ្រជាង២ពាន់នាក់នៅ World Cup 2018 កំពុងស្នាក់ដោយខុសច្បាប់នៅរុស្ស៊ីនៅឡើយ

30, Jun 2020 , 11:29 am

រូបភាព

ដោយ: ទេព ពិទូរ្យ

អ្នកគាំទ្រជាជនបរទេសលើសពី ២០០០ នាក់ដែលទៅកាន់ប្រទេសរុស្ស៊ី អំឡុងព្រឹត្តិការណ៍កីឡាបាល់ទាត់ពិភពលោក World Cup ឆ្នាំ ២០១៨ នៅតែស្ថិតក្នុងប្រទេសនេះនៅឡើយមកទល់សព្វថ្ងៃ។ លោក Yevgeny Ivanov អនុរដ្ឋមន្ត្រីក្រសួងការបរទេសរុស្ស៊ីអះអាងបែបនេះក្នុងបទសម្ភាសន៍ជាមួយកាសែត Kommersant daily នៅថ្ងៃទី២៨ ខែមិថុនា។

លោក Yevgeny Ivanov របៀបរាប់ដូច្នេះថា៖ «យោងតាមទិន្នន័យពីទីភ្នាក់ងារអនុវត្តច្បាប់ មានជនបរទេសជាងពីរពាន់នាក់បានចូលប្រទេសរុស្ស៊ីក្នុងឆ្នាំ ២០១៨ ដែលជាអ្នកគាំទ្រកីឡាបាល់ទាត់កាន់កាត Fan ID’s ដោយមិនមានទិដ្ឋាការនោះ មិនទាន់បានចាកចេញពីប្រទេសនៅឡើយទេ។ ហើយបច្ចុប្បន្ននេះ ពួកគេជាជនអន្តោប្រវេសន៍ខុសច្បាប់ ក្នុងប្រទេសរុស្ស៊ី»។

បើតាមការផ្សាយរបស់ទីភ្នាក់ងារព័ត៌មាន TASS ការស្នាក់នៅដោយមិនមានទិដ្ឋាការនៅក្នុងប្រទេសរុស្ស៊ីសម្រាប់អ្នកកាន់កាត Fan ID ដើម្បីចូលរួមការប្រកួត FIFA World Cup 2018 បានផុតកំណត់តាំងពីថ្ងៃទី៣១ ខែធ្នូ ឆ្នាំ ២០១៨ ម្លេះ។ អ្នកដែលមិនទាន់បានចាកចេញពីប្រទេសរុស្ស៊ីតាមកាលបរិច្ឆេទ ជាការរំលោភលើច្បាប់នៃការធ្វើចំណាកស្រុករបស់ប្រទេស ហើយអាចនាំឲ្យមានការទទួលខុសត្រូវផ្នែករដ្ឋបាលរហូតដល់ការបណ្តេញចេញពីប្រទេសរុស្ស៊ីផង។

យោងតាមក្រសួងមហាផ្ទៃរុស្ស៊ី ចំនួនអ្នកគាំទ្របរទេសជុំវិញពិភពលោកដែលបានធ្វើដំណើរទៅកាន់រុស្ស៊ីឆ្នាំ២០១៨ មានចំនួនប្រហែល ៦៥០០០០ នាក់អំឡុងពេលការប្រកួតកីឡាបាល់ទាត់ពិភពលោកនោះ។ ហើយអ្នកដែលមិនទាន់ចាកចេញពេលប្រទេសនេះ ភាគច្រើនជាអ្នកគាំទ្រជនជាតិនីហ្សេរីយ៉ា។

ព្រឹត្តិការណ៍ World Cup ឆ្នាំ២០១៨ ដែលរុស្ស៊ីដឹកនាំធ្វើម្ចាស់ផ្ទះនោះ ក្រុមកីឡាបាល់ទាត់ជម្រើសជាតិបារាំងជាអ្នកដណ្តើមពាននេះបាន ដែលជាការឈ្នះលើកទី២ក្នុងប្រវត្តិសាស្ត្រ ក្រោយផ្តួលក្រុមជម្រើសជាតិក្រូអាស៊ីក្នុងវគ្គផ្តាច់ព្រ័ត្រដោយលទ្ធផល ៤-២៕