ច្បាប់សន្តិសុខជាតិហុងកុងដ៏ចម្រូងចម្រាស នឹងត្រូវអនុវត្តចាប់ពីថ្ងៃទី១ ខែកក្កដាតទៅ។ ច្បាប់នេះ មាន ៦ជំពូក និង ៦៦មាត្រា ហើយចែងពីកាតព្វកិច្ចរបស់រដ្ឋាភិបាលចិន រដ្ឋាភិបាលហុងកុង ការបង្កើតទីភ្នាក់ងាររបស់ចិននៅហុងកុង ការតែងតាំងចៅក្រម បទល្មើស និងការបញ្ជូនអ្នកទោសមួយចំនួនទៅកាត់ទោសនៅទីក្រុងប៉េកាំងជាដើម។ នេះជាការប្រែប្រួលដ៏ធំមួយក្នុងទំនាក់ទំនងរវាងប៉េកាំង និងហុងកុងដែលជាតំបន់រដ្ឋបាលពិសេស។
ការផ្តន្ទាទោសនៅក្នុងច្បាប់សន្តិសុខជាតិ
ដោយផ្អែកទៅតាមច្បាប់សន្តិសុខជាតិហុងកុង បទល្មើសត្រូវបានបែងចែកជាបួនធំៗ គឺវិទ្ធង្សនា ការធ្វើអបគមន៍ សកម្មភាពភេរវកម្ម និងការផ្សំគំនិតជាមួយបរទេស ដែលបណ្តាលឲ្យមានការបំផ្លាញដល់សន្តិសុខជាតិហុងកុង។ រាល់ជនល្មើសនៃបទល្មើសខាងលើនេះ នឹងត្រូវផ្តន្ទាទោសដាក់ពន្ធនាគាររហូតដល់ ១ជីវិត ឬច្រើនជាង ១០ឆ្នាំ ឬតិចជាង ៣ឆ្នាំ ដោយផ្អែកទៅលើស្ថានទម្ងន់ទោស។
រដ្ឋាភិបាលចិនមានយុត្តាធិការមកលើកិច្ចការហុងកុងក្នុងបទឧក្រិដ្ឋធ្ងន់ធ្ងរ
ប្រសិនបើអំពើមួយចំនួន ធ្វើឲ្យប៉ះពាល់ដល់សន្តិសុខជាតិហុងកុងធ្ងន់ធ្ងរ រដ្ឋាភិបាលចិន នឹងមានយុត្តាធិការពេញទី ក្នុងអនុវត្តអំណាចរបស់ខ្លួនក្នុងការកាត់ទោសលើជនល្មើស។ អំណាចទាំងនោះ គឺរាប់ចាប់តាំងពីការចាប់ខ្លួន រហូតដល់កាត់ទោស។ នៅក្នុងករណីខ្លះ ដែលមានភាពស្មុគស្មាញ ឬបង្កឲ្យមានផលវិបាកខ្លាំង អ្នកទោសអាចត្រូវគេធ្វើបត្យាប័នទៅទីក្រុងប៉េកាំងតែម្តង។
ទាក់ទិននឹងបញ្ហានេះ សកម្មជន អ្នករិះគន់រដ្ឋាភិបាល មេធាវីខ្លះ និងអ្នកប្រឆាំងរដ្ឋាភិបាលចិន អាចជាមុខសញ្ញា ដែលចិនអាចប្រើប្រាស់ច្បាប់សន្តិសុខជាតិនេះ ដើម្បីតាមប្រមាញ់។
សវនាការបិទទ្វារ
នៅក្នុងសំណុំរឿងដែលមានពាក់ព័ន្ធនឹងព័ត៌មានសម្ងាត់របស់រដ្ឋ សវនាការនឹងធ្វើឡើងជាសម្ងាត់ ហើយចៅក្រុមហុងកុង មិនអាចមានយុត្តាធិការលើរឿងនេះឡើយ។ យ៉ាងណាក៏ដោយ សេចក្តីសម្រេចរបស់តុលាការនឹងធ្វើឡើងជាសាធារណៈ។
នៅក្នុងសំណុំរឿងសន្តិសុខជាតិ ប្រធានប្រតិបត្តិហុងកុង មានសិទ្ធិតែងតាំងក្រុមប្រឹក្សានៃអង្គចៅក្រម ដើម្បីកាត់ទោសជនល្មើស។ អាណត្តិរបស់ចៅក្រមម្នាក់ៗ មានត្រឹមរយៈពេលតែមួយឆ្នាំប៉ុណ្ណោះ។ ចំណែកជនសង្ស័យនៃបទល្មើសសន្តិសុខជាតិ នឹងមិនអនុញ្ញាតឲ្យនៅក្រៅឃុំឡើយ។
កិច្ចសហការរវាងអាជ្ញាធរហុងកុង និងទីភ្នាក់ងារចិន
នៅក្នុងច្បាប់នេះដដែល បានចែងថា រាល់អង្គភាពចំណុះរដ្ឋាភិបាលហុងកុងទាំងអស់ ត្រូវតែសហការជាមួយទីភ្នាក់ងាររបស់ទីក្រុងប៉េកាំងដែលត្រូវបង្កើតដើម្បីអនុវត្តច្បាប់នេះ។ ជាពិសេសច្បាប់នេះ ក៏ប្រគល់អំណាចដល់ទីភ្នាក់ងារចិនយ៉ាងទូលំទូលាយផងដែរ។ ក្នុងន័យនេះ រដ្ឋាភិបាលហុងកុង គ្មានយុត្តាធិការ ឬអំណាចលើទីភ្នាក់ងារសន្តិសុខចិនឡើយ ចំណែកបុគ្គលិកនៃទីភ្នាក់ងារនេះ គឺត្រូវគោរពតាមច្បាប់សន្តិសុខជាតិហុងកុងមួយមុខតែប៉ុណ្ណោះ។
បន្ថែមពីលើនេះ ច្បាប់សន្តិសុខជាតិហុងកុងនេះ តម្រូវឲ្យបង្កើតកម្លាំងប៉ូលិសមួយក្រុម ដើម្បីស៊ើបអង្កេត និងប្រមូលព័ត៌មានជុំវិញករណីទាក់ទិននឹងច្បាប់សន្តិសុខជាតិ។ ម្យ៉ាងវិញទៀត អង្គភាពប៉ូលិសពិសេសមួយនេះ អាចតែងតាំងអ្នកជំនាញនៅក្រៅទីក្រុងហុងកុង ដើម្បីជាជំនួយការបាន។ ប្រសិនបើចាំបាច់ ប៉ូលិសមានសិទ្ធិស្នើឲ្យអ្នកផ្តល់សេវា និងអ្នកកាន់ទិន្នន័យមួយចំនួន លុបព័ត៌មានចោល ឬផ្តល់ព័ត៌មានទាំងនោះ ឬសហការជាមួយកម្លាំងប៉ូលិស។
ការរឹតបន្តឹងលើអង្គការក្រៅរដ្ឋាភិបាល និងទីភ្នាក់ងារព័ត៌មានបរទេស
ដោយផ្អែកទៅតាមមាត្រា៥៤ នៃច្បាប់សន្តិសុខជាតិហុងកុង ទីភ្នាក់ងារទីក្រុងប៉េកាំង និងការិយាល័យនៃអគ្គស្នងការនៃក្រសួងការបរទេសហុងកុង គួរតែសហការជាមួយរដ្ឋាភិបាលហុងកុង ដើម្បីចាត់វិធានការពង្រឹងការគ្រប់គ្រងលើអង្គការបរទេស អង្គការអន្តរជាតិ អង្គការមិនមែនរដ្ឋាភិបាល ទីភ្នាក់ងារព័ត៌មានបរទេស។ ក្នុងន័យនេះ ប្រសិនបើក្រុមហ៊ុន ឬអង្គការបរទេសណាមួយ ត្រូវបានគេរកឃើញថា ប្រព្រឹត្តខុសនឹងច្បាប់សន្តិសុខជាតិហុងកុង នឹងត្រូវទទួលរងការពិន័យជាប្រាក់ និងផ្អាកប្រតិបត្តិការនៅក្នុងទឹកដីហុងកុងតែម្តង។
សូមបញ្ជាក់ថា ច្បាប់សន្តិសុខជាតិនេះ បានចូលជាធរនៅខួបលើកទី២៣ ដែលអង់គ្លេសប្រគល់ទឹកដីហុងកុង ត្រលប់មកឲ្យចិនវិញ តាមរយៈកិច្ចព្រមព្រៀងឆ្នាំ ១៩៩៧។ យ៉ាងណាក៏ដោយ នៅក្នុងកិច្ចព្រមព្រៀងឆ្នាំនោះ ចិន មិនទាន់មានអំណាចគ្រប់គ្រងផ្តាច់មុខលើហុងកុងឡើយ ពោលគឺត្រូវរក្សាគោលការណ៍ «ប្រទេសមួយ ប្រព័ន្ធពីរ» រហូតដល់ឆ្នាំ ២០៤៧ ទើបចិនមានអំណាចលើហុងកុងពេញទី៕