សង្គមអន្តរជាតិ
អន្តរជាតិ
ប្រទេស២៧ ស្នើឲ្យចិនពិចារណាការអនុវត្តច្បាប់សន្តិសុខជាតិនៅហុងកុងឡើងវិញ
× ប្រទេសចំនួន២៧ រាប់បញ្ចូលអង់គ្លេស បារាំង និងជប៉ុនជាដើម បានស្នើឲ្យចិនពិចារណាឡើងវិញលើការអនុវត្តច្បាប់សន្តិសុខជាតិសម្រាប់ទីក្រុងហុងកុង ព្រោះវាធ្វើឲ្យប៉ះពាល់ដល់សេរីភាពរបស់ទីក្រុងហិរញ្ញវត្ថុមួយនេះ។ ច្បាប់សន្តិសុខជាតិនេះ បានចូលជាធរមាននៅថ្ងៃទី១ ខែកក្កដា មួយថ្ងៃក្រោយត្រូវបានអនុម័តដោយគណៈកម្មាធិការអចិន្ត្រៃយ៍សភាប្រជាជន។ ប្រធានប្រតិបត្តិហុងកុង លោកស្រី ការី ឡាំ បានចេញការពារច្បាប់នេះ។
សេចក្ដីស្នើច្បាប់សន្តិសុខជាតិដែលត្រូវអនុវត្តនៅហុងកុង ត្រូវបានអនុម័តយ៉ាងលឿនក្នុងកិច្ចប្រជុំគណៈកម្មាធិការអចិន្ត្រៃយ៍សភាប្រជាជននៅថ្ងៃទី៣០ ខែមិថុនា ហើយប្រធានាធិបតីចិន ស៊ី ជិនភីង បានចុះហត្ថលេខាឲ្យចូលជាធរមាននៅថ្ងៃដដែល។ ច្បាប់មួយនេះ នឹងចូលជាធរមានចាប់ពីនៅថ្ងៃទី១ ខែកក្កដា ដែលជាថ្ងៃអង់គ្លេសផ្ទេរហុងកុងឲ្យចិនវិញកាលពីឆ្នាំ១៩៩៧ ។
ប្រតិកម្មបានធ្លាក់មកជាបន្តបន្ទាប់ពីក្រោយការអនុម័តនេះ។ ទីភ្នាក់ងារព័ត៌មាន AFP ផ្សាយថា ប្រទេសចំនួន២៧ រួមមានបារាំង ជប៉ុន អាល្លឺម៉ង់ និងអង់គ្លសផងនោះ បានសេចក្ដីថ្លែងការណ៍រួមមួយទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិ ដោយទទូចឲ្យទីក្រុងប៉េកាំងគិតគូរម្ដងទៀតពីការអនុវត្តច្បាប់នេះនៅហុងកុង។ ដោយឡែកនាយករដ្ឋមន្ត្រីអង់គ្លេស បូរីស ចនសុន វិញ និយាយថា អង់គ្លេសនឹងពិនិត្យមើលច្បាប់ ក្រែងមានចំណុចណាដែលផ្ទុយពីកិច្ចព្រមព្រៀងផ្ទេរហុងកុង។
ការអនុម័តច្បាប់ដដែលនេះ ក៏បានបញ្ឆេះកម្ដៅទំនាក់ទំនងរវាងចិន និងអាមេរិកផងដែរ។ ប្រធានសភាតំណាងអាមេរិក លោកស្រី ណាន់ស៊ី ផេឡូស៊ី រិះគន់ថា គោលដៅព្រៃផ្សៃរបស់ចិន គឺដើម្បីបំភិតបំភ័យ និងធ្វើទុក្ខបុកម្នេញការបញ្ចេញមតិរបស់ប្រជាជនហុងកុង។ មុននេះ រដ្ឋាភិបាលលោក ដូណាល់ ត្រាំ ក៏បានប្រកាសបញ្ចប់ការនាំចេញអាវុធឲ្យហុងកុងព្រោះទីក្រុងនេះលែងមានស្វ័យភាព ហើយត្រៀមចាត់វិធានការថែមទៀត។
យ៉ាងណាមិញ ប្រធានប្រតិបត្តិតំបន់រដ្ឋបាលពិសេសហុងកុង លោកស្រី ការី ឡាំ បានចេញការពារច្បាប់នេះដែលចាំបាច់ក្នុងការរក្សាស្ថិរភាពហុងកុង បន្ទាប់ពីរញ្ជួយញាប់ញ័រដោយសារបាតុកម្មជាច្រើនខែ។ ក្នុងសារវីដេអូទៅក្រុមប្រឹក្សាសិទ្ធិមនុស្ស លោកស្រី ឡាំ បញ្ជាក់ថា ហុងកុង រងគ្រោះដោយការកើនឡើងអំពើហិង្សាដែលនៅពីក្រោយដោយកម្លាំងខាងក្រៅ ដែលការណ៍នេះ មិនអាចត្រូវទុកចោលដោយរដ្ឋាភិបាលមជ្ឈិមឡើយ។
«ច្បាប់មានគោលដៅទប់ស្កាត់ រារាំង និងដាក់ពិន័យសកម្មភាពអប្បគមន៍ វិទ្ធង្សនាប្រឆាំងអំណាចរដ្ឋ និងសកម្មភាពភេរវកម្ម។ ទង្វើទាំងនេះ ត្រូវបានចែងយ៉ាងច្បាស់ក្នុងច្បាប់។ យើងតម្រង់គោលដៅលើមនុស្សមួយក្រុមដែលបំពានច្បាប់ប៉ុណ្ណោះ។» នេះជាការបញ្ជាក់របស់លោកស្រី ឡាំ ដែលដឹកនាំហុងកុង៤ឆ្នាំហើយ ដែលបន្តថា អាយុជីវិត សិទ្ធិសេរីភាព និងសិទ្ធិមូលដ្ឋានរបស់ប្រជាជនហុងកុងភាគច្រើន នឹងត្រូវបានការពារ៕
© រក្សាសិទ្ធិដោយ thmeythmey.com