លោក ប្រាក់ សុខុន រដ្ឋមន្ត្រីការបរទេសកម្ពុជា ថ្លែងថា គ្រប់ប្រទេសក្នុងតំបន់អាស៊ាន និងអូស្ត្រាលី ត្រូវរក្សាការប្រុងប្រយ័ត្នជានិច្ច ចំពោះរលកទីពីរនៃជំងឺកូវីដ-១៩ ខណៈប្រទេសទាំងឡាយ ចាប់ផ្តើមបង្ហាញផ្លូវរៀងខ្លួន ដើម្បីបន្ធូរបន្ថយការរឹតបន្តឹងចំពោះជំងឺរាតត្បាតនេះ។ លោក ថ្លែងសារនេះ នៅក្នុងកិច្ចប្រជុំពិសេសនៃរដ្ឋមន្ត្រីការបរទេសអាស៊ាននិងរដ្ឋមន្ត្រីការបរទេសអូស្ត្រាលី តាមរយៈការតភ្ជាប់ប្រព័ន្ធវីដេអូ (Video Conference) ស្តីពីការរួមគ្នាប្រឆាំងនឹងជំងឺកូវីដ-១៩ នៅថ្ងៃទៅ៣០ ខែមិថុនា ឆ្នាំ២០២០។
សេចក្តីប្រកាសព័ត៌មានរបស់ក្រសួងការបរទេសកម្ពុជា ស្តីពីលទ្ធផលនៃកិច្ចប្រជុំ បានសរសេរពីប្រសាសន៍របស់លោក ប្រាក់ សុខុន យ៉ាងដូច្នេះថា៖«យើងទាំងអស់គ្នា ត្រូវបន្តកិច្ចប្រឹងប្រែងបន្ថែមទៀត ដើម្បីកម្ចាត់ជំងឺរាតត្បាតនេះ លើគ្រប់ផ្នែកទាំងអស់ ស្របតាមការប្តេជ្ញាចិត្តរួមគ្នា នៅមហាសន្និបាតសុខភាពពិភពលោកលើកទី៧៣»។
ជាមួយគ្នានេះ ប្រមុខការទូតកម្ពុជា ជំរុញឲ្យអាស៊ាននិងអូស្ត្រាលី សហការគ្នានៅគ្រប់កម្រិត លើការធ្វើតេស្ត ការបង្កើនផលិតកម្មឱសថ និង វ៉ាក់សាំងការពារ សម្រាបជំងឺរាតត្បាតកូវីដ-១៩ ប្រកបដោយគុណភាព សុវត្ថិភាព និង មានតម្លៃសមរម្យ ដែលប្រជាពលរដ្ឋ មានតម្រូវការ អាចទទួលបានទាន់ពេលវេលា។
លោក វាយតម្លៃថា អាស៊ាន បានធ្វើកិច្ចការយ៉ាងសកម្ម ក្នុងការឆ្លើយតបនឹងជំងឺកូវីដ-១៩។ សម្រាប់លោក ដំណោះស្រាយប្រកបដោយភាពសកម្មរបស់អាស៊ាន គឺជាសារមួយ ដែលបង្ហាញថា ក្នុងពេលមានវិបត្តិ សហគមន៍អន្តរជាតិ ចាំបាច់ត្រូវបង្កើនការសម្របសម្រួលនិងការឆ្លើយតបរួមគ្នា ក៏ដូចជា សាមគ្គីភាពជាអន្តរជាតិ។
ក្នុងកិច្ចប្រជុំនោះ លោករដ្ឋមន្ត្រី ឆ្លៀតអរគុណអូស្ត្រាលី ដែលបានផ្តល់ការគាំទ្រនិងជំនួយថវិកា ដល់កម្ពុជា ដើម្បីពង្រឹងប្រព័ន្ធសុខភាពសាធារណៈ ក្នុងអំឡុងជំងឺកូវីដ-១៩។
កិច្ចប្រជុំ ក៏បានពិភាក្សាពីទិសដៅអនាគតនៃភាពជាដៃគូយុទ្ធសាស្ត្រអាស៊ាន-អូស្ត្រាលីផងដែរ សម្រាប់ដំណាក់កាលនៅក្រោយជំងឺកូវីដ-១៩ ត្រូវបញ្ចប់។
គិតត្រឹមថ្ងៃទី១ ខែកក្កដា ឆ្នាំ២០២០ អូស្ត្រាលី មានអ្នកឆ្លងជំងឺកូវីដ-១៩ ជិត៨ពាន់នាក់ ជាសះស្បើយជាង៧ពាន់នាក់ ស្លាប់ជាង១រយនាក់។ ចំណែកនៅតំបន់អាស៊ាន ឥណ្ឌូណេស៊ី មានអ្នកឆ្លងច្រើនជាងគេ ដែលមានជាង៥,៦ម៉ឺនាក់ បន្ទាប់មក គឺសិង្ហបុរី ដែលមានជាង៤,៣ម៉ឺននាក់ ហើយឡាវ មានអ្នកឆ្លងតិចជាងគេ គឺមាន១៩នាក់ និងបានជាសះស្បើយទាំង១៩នាក់វិញ។
រីឯ ប្រទេសក្នុងតំបន់អាស៊ាន ដែលមានអ្នកឆ្លងតិចជាងគេ បន្ទាប់ពីឡាវ គឺ កម្ពុជា និង ប្រុយណេ។ ត្រឹមថ្ងៃទី១ ខែកក្កដា ប្រទេសទាំង២នេះ មានអ្នកឆ្លង១៤១នាក់ដូចគ្នា តែកម្ពុជា មានអ្នកជាសះស្បើយ១៣១នាក់ ដោយគ្មានអ្នកស្លាប់ ឯប្រុយណេ មានអ្នកជាសះស្បើយ១៣៨នាក់ ស្លាប់៣នាក់។
នៅលើពិភពលោក មានមនុស្សជាង១០លាន៦សែននាក់ហើយ ដែលឆ្លងកូវីដ-១៩ ដោយអាមេរិក មានច្រើនជាងគេ៕