សម្ដេច ស ខេង ៖ គ្រោះថ្នាក់ចរាចរណ៍ថយចុះជាង៥០០ករណីនៅឆមាសទី១ ដោយសារការរឹតបន្តឹងច្បាប់

ជាតិ

សម្ដេច ស ខេង ៖ គ្រោះថ្នាក់ចរាចរណ៍ថយចុះជាង៥០០ករណីនៅឆមាសទី១ ដោយសារការរឹតបន្តឹងច្បាប់

01, Jul 2020 , 10:59 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ៦ខែនេះ គ្រោះថ្នាក់ចរាចរណ៍ ថយចុះជាង៥០០ករណី ខណៈអ្នកស្លាប់ធ្លាក់ចុះ១៧២នាក់ បើធៀបរយៈពេលដូចគ្នានៅឆ្នាំ២០១៩។ នោះក៏ព្រោះតែកម្ពុជា បានរឹតបន្តឹងការអនុវត្តច្បាប់ចរាចរណ៍ផ្លូវគោក កាលពីដើមខែឧសភាមក។ នេះបើតាមសម្ដេច ស ខេង រដ្ឋមន្ត្រីក្រសួងមហាផ្ទៃ។

សម្ដេច ស ខេង បានមើលឃើញថា ពលរដ្ឋបានយល់ដឹងនិងគោរពច្បាប់ច្រើនជាងមុន ទើបធ្វើឱ្យអត្រាគ្រោះថ្នាក់ចរាចរណ៍ធ្លាក់ចុះបែបនេះ។ រដ្ឋមន្ត្រីក្រសួងមហាផ្ទៃរូបនេះ បានសរសេរលើហ្វេសប៊ុកដូច្នេះ៖«តាមទិន្នន័យបញ្ជាក់ខាងលើនេះគឺបានបង្ហាញយ៉ាងច្បាស់ថាប្រជាពលរដ្ឋយើងពិតជាមានការយល់ដឹង និងបានចូលរួមគោរពច្បាប់ចរាចរណ៍កាន់តែច្រើន នៅពេលប្រទេសជាតិយើងមានការរីកចម្រើន មានកំណើនយានយន្តធ្វើដំណើរ និង កំណើនអ្នកបើកបរក៏ដោយ តែគ្រោះថ្នាក់ចរាចរណ៍មានការថយចុះ»។

ប្រមុខក្រសួងមហាផ្ទៃ ចាត់ទុកលទ្ធផលវិជ្ជមាននេះ បានមកពីការចូលរួមរបស់ប្រជាពលរដ្ឋ កងកម្លាំងមានសមត្ថកិច្ច និងមន្ត្រីពាក់ព័ន្ធនានា ក្នុងការអនុវត្តភារកិច្ចរបស់ខ្លួន ។ មិនតែប៉ុណ្ណោះសម្ដេច ស ខេង ក៏ស្នើរាយការណ៍ និងបញ្ចេញមតិយោបល់ក្នុងន័យស្ថាបនា តាមរយៈបណ្ដាញសង្គមហ្វេសប៊ុក ដើម្បីកែលម្អថែមទៀត នូវការអនុវត្តច្បាប់ចរាចរណ៍ផ្លូវគោកឱ្យកាន់តែល្អប្រសើរឡើង ក្នុងទិសដៅកាត់បន្ថយអត្រាគ្រោះថ្នាក់ចរាចរណ៍ ជាពិសេសចំនួនអ្នកស្លាប់កាន់តែតិច និងរក្សាសណ្តាប់ធ្នាប់សាធារណៈឱ្យកាន់តែមានរបៀបរៀបរយ។

«ខ្ញុំក៏សូមថ្លែងអំណរគុណដ៏ជ្រាលជ្រៅចំពោះបងប្អូនជនរួមជាតិដែលបានផ្ញើសារ និងការបញ្ចេញមតិ ជាពិសេសនៅក្នុងផេកហ្វេសប៊ុករបស់ខ្ញុំផ្ទាល់តែម្តង ដែលសុទ្ធតែជាសារ និងមតិប្រកបដោយខ្លឹមសារចូលរួមស្ថាបនានិងកែលម្អ» ។ នេះជាការលើកឡើងរបស់សម្ដេច ស ខេង។

ជាមួយគ្នានេះ រដ្ឋមន្ត្រីមហាផ្ទៃ ក៏ឆ្លៀតក្រើនរំឭកដល់កងកម្លាំងមានសមត្ថកិច្ច និងមន្ត្រីពាក់ព័ន្ធទាំងអស់ ត្រូវតែបន្តការគោរពក្រមសីលធម៌វិជ្ជាជីវៈ និងវិន័យឱ្យបានខ្ជាប់ខ្ជួន ក្នុងការអនុវត្តតួនាទីភារកិច្ច ។ ជាពិសេសត្រូវកាត់បន្ថយ ឬលប់បំបាត់នូវបាតុភាពអវិជ្ជមានផ្សេងៗ ដើម្បីបម្រើផលប្រយោជន៍ជាតិ និងប្រជាពលរដ្ឋ ។

គ្រោះថ្នាក់ចរាចរណ៍ នៅក្នុងរយៈពេល១ឆមាសឆ្នាំ២០២០នេះ មានចំនួន១,៦១៩ករណីថយចុះ៥៥២ករណី ដែលស្មើ២៥ភាគរយ បើធៀបរយៈពេលដូចគ្នានៅឆ្នាំ២០១៩ ដែលគ្រោះថ្នាក់កើតឡើង២,១៧១លើក។ ចំណែកមនុស្សស្លាប់៨៦១នាក់ លើ១០៣៣នាក់ ដោយថយចុះ១៧២នាក់ ស្មើនឹង១៧ភាគរយ ខណៈអ្នករងរបួស ២,៤៤៩ លើ ៣,២២៧នាក់ គឺថយចុះ៧៧៨នាក់ស្មើនឹង២៤ភាគរយ៕