សង្គមអន្តរជាតិ
អន្តរជាតិ
តៃវ៉ាន់ សម្ពោធការិយាល័យជួយអ្នកភៀសខ្លួនពីហុងកុង ក្រោយច្បាប់សន្តិសុខចូលធរមាន លោក Chen Ming-tong (ឆ្វេង) បើកសម្ពោធការិយាល័យសម្រាប់ជួយពលរដ្ឋហុងកុង។ រូបភាព AFP
× នៅថ្ងៃទី១ ខែកក្កដា កោះតៃវ៉ាន់ បានបើកសម្ពោធការិយាល័យមួយដែលមានគោលដៅជួយអ្នកភៀសខ្លួនពីហុងកុង បន្ទាប់ពីចិនចេញច្បាប់សន្តិសុខជាតិដែលត្រូវបានតាក់តែងដើម្បីអនុវត្តក្នុងទីក្រុងហិរញ្ញវត្ថុមួយនេះ។ មន្ត្រីជាន់ខ្ពស់តៃវ៉ាន់ទទួលបន្ទុកកិច្ចការដីគោក ក៏ប្រកាសជំហរតៃវ៉ាន់ក្នុងការគាំទ្រសេរីភាព និងប្រជាធិបតេយ្យនៅហុងកុង។
ការិយាល័យដែលរដ្ឋាភិបាលតៃវ៉ាន់ដាក់ឲ្យប្រើប្រាស់ មានឈ្មោះថា ការិយាល័យសេវា និងការផ្លាស់ប្ដូរតៃវ៉ាន់-ហុងកុង។ ការិយាល័យ មានគោលដៅជួយប្រជាជនហុងកុងដែលភៀសខ្លួនពីទីក្រុងរដ្ឋបាលពិសេសក្នុងកាលៈទេសៈដែលទីក្រុងប៉េកាំងដាក់ឲ្យអនុវត្តច្បាប់សន្តិសុខជាតិដ៏ចម្រូងចម្រាស។ វិទ្ធង្សនាប្រឆាំងអំណាចរដ្ឋ អបគមន៍ ភេរវកម្ម និងការចូលដៃជាមួយបរទេស ជាបទល្មើសដែលអាចជាប់គុកដល់ទៅ១០ឆ្នាំឯណោះ។
កន្លងទៅ តៃវ៉ាន់ តែងបង្ហាញសមានចិត្តរបស់ខ្លួន និងផ្ដល់ជំនួយផ្សេងឲ្យអ្នកដែលភៀសខ្លួនពីហុងកុងដែលភាគច្រើនជាសកម្មជនប្រឆាំងចិន អ្នកប្រជាធិបតេយ្យ ឬក្រុមមាននិន្នការផ្ដាច់ខ្លួនជាដើម។ លើសពីនោះ គេក៏ឃើញមានប្រជាជនហុងកុងដែលរត់គេចពីការចាប់ខ្លួនក្រោយចូលរួមបាតុកម្មឆ្នាំមុនផងដែរ។ បើតាមក្រុមសិទ្ធិមនុស្ស ពលរដ្ឋហុងកុងប្រមាណពីររយនាក់ បានទៅដល់តៃវ៉ាន់ក្រោយការផ្ទុះបាតុកម្មឆ្នាំ២០១៩ ។
ប្រធានក្រុមប្រឹក្សាកិច្ចការដីគោករបស់កោះតៃវ៉ាន់ លោក Chen Ming-tong ចាត់ទុកការិយាល័យថ្មីនេះ ជាការតាំងចិត្តរបស់តៃវ៉ាន់ក្នុងការផ្ដល់ជំនួយឲ្យហុងកុង។ លោកបន្ថែមថា វាជាការបោះជំហានមួយទៀតសម្រាប់រដ្ឋាភិបាលតៃវ៉ាន់ក្នុងការជួយគាំទ្រប្រជាធិបតេយ្យហុងកុង។
បើតាមទីភ្នាក់ងារព័ត៌មាន Reuters មន្ត្រីតៃវ៉ាន់រូបនេះ ក៏បានផ្ញើសារព្រមានទៅកាន់ប្រទេសឯទៀតថា ពួកគេក៏អាចជាគោលដៅរបស់ប៉េកាំងផងដែរ មិនមែនតែហុងកុងមួយឡើយ។ លោក Chen ទំនងចង់សំដៅដល់ចំណុចមួយក្នុងច្បាប់សន្តិសុខជាតិនេះដែលបើកផ្លូវដល់ការកាត់ទោសពលរដ្ឋហុងកុងទាំងមានលំនៅដ្ឋានអចិន្ត្រៃយ៍ និងមិនអចិន្ត្រៃយ៍។
យ៉ាងណាមិញ មន្ត្រីតៃវ៉ាន់រូបនេះ មិនបញ្ជាក់ពីព័ត៌មានលម្អិតទាក់ទងការស្នើសុំជំនួយដោយជនភៀសខ្លួនតៃវ៉ាន់ឡើយ។ លោកក៏មិនបញ្ចេញព័ត៌មានថា មានអ្នកដាក់ពាក្យប៉ុន្មាននាក់ដែរ។ ប៉ុន្តែប្រភពពីអ្នកការទូតនៅតៃវ៉ាន់អះអាងថា មានតែសកម្មជនដែលចេញមុខខ្លាំងនៅហុងកុង ឬអ្នកមិនសូវមានទ្រព្យធនប៉ុណ្ណោះ ដែលអាចធ្វើដំណើរទៅកាន់តៃវ៉ាន់ ខណៈអ្នកដែលមានលុយខ្លះអាចជ្រើសរើសការភៀសខ្លួនទៅកាន់លោកខាងលិចវិញ៕
Tag:
តៃវ៉ាន់
ចិន
ហុងកុង
© រក្សាសិទ្ធិដោយ thmeythmey.com