ជាតិ
សម្តេច ហ៊ុន សែន អំពាវនាវឲ្យនាំគ្នាការពារថែរក្សាមច្ឆាជាតិ កុំប្រើគ្រឿងផ្ទុះ និងសារធាតុបំពុល...
× នាឱកាសអបអរសាទរទិវាមច្ឆាជាតិ ១កក្កដា ឆ្នាំ២០២០ សម្តេចនាយករដ្ឋមន្ត្រី ហ៊ុន សែន បានអំពាវនាវឲ្យនាំគ្នាការពារថែរក្សាធនធានមច្ឆាជាតិ និងពូជត្រីសំខាន់ៗដ៏កម្រដែលស្ទើរផុតពូជ ព្រមទាំងជីវចម្រុះជាច្រើនទៀត ដើម្បីប្រជាពលរដ្ឋមានត្រីទទួលទានគ្រប់គ្រាន់ជារៀងរាល់ឆ្នាំ។
«សូមបងប្អូនប្រជាពលរដ្ឋកុំប្រើគ្រឿងផ្ទុះ និងសារធាតុបំពុលផ្សេងៗ រួមទាំងសម្ភារ និងឧបករណ៍ហាមឃាត់មួយចំនួនដូចជាមងឬអួនដែលអាចងាយនឹងបំផ្លាញពូជត្រីអោយវិនាសហិនហោចបាន»។ នេះជាការលើកឡើងរបស់ប្រមុខរដ្ឋាភិបាលអមដោយបទចម្រៀង «១កក្កដា មច្ឆាស្នេហាសន្តិភាព»។
សម្តេច ហ៊ុន សែន បានគូសបញ្ជាក់ថា ទិវាមច្ឆាជាតិ ថ្ងៃទី១ កក្កដា គឺជាទិវាដ៏សំខាន់មួយដែលត្រូវបានរៀបចំឡើងជារៀងរាល់ឆ្នាំ ដើម្បីបំផុសចលនាយល់ដឹងក្នុងចំណោមប្រជាពលរដ្ឋឲ្យចូលរួមក្នុងការថែរក្សាពូជត្រី ឱ្យមានក្នុងដែនទឹកធម្មជាតិផង និងបង្កើនផលត្រីនៅតំបន់ឆ្ងាយពីដែននេសាទផង ជាពិសេសនៅតាមតំបន់សមស្របនៃវាលទំនាប និងនៅតាមវាលស្រែទូទាំងប្រទេស។
ជាមួយគ្នានេះ សម្តេចអំពាវនាវដល់ប្រជាពលរដ្ឋ អាជ្ញាធរដែនដី មន្ត្រីមានសមត្ថកិច្ច ចូលរួមថែរក្សា ពូជត្រី និងចូលរួមអភិរក្សជីវចំរុះផ្សេងៗទៀតឲ្យបានគង់វង្សដើម្បីធានានិរន្តរភាពធនធានជលផលឲ្យបានគ្រប់គ្រាន់ សម្រាប់តម្រូវការទទួលទានរបស់ប្រជាពលរដ្ឋនៅទូទាំងប្រទេស៕
© រក្សាសិទ្ធិដោយ thmeythmey.com