កីឡាអន្តរជាតិ
អន្តរជាតិ
West Ham ជួយ Man Utd ដោយបង្អាក់ដំណើរ Chelsea សម្រាប់តំណែង Top 4
× ក្រុម West Ham បង្អាក់ដំណើរប្រជែង Top 4 របស់ Chelsea ដោយការយកឈ្នះក្នុងលទ្ធផល ៣-២ នាជំនួបក្របខណ្ឌ Premier League នៅរាត្រីថ្ងៃទី១ ខែកក្កដា។ ចំណែក Pierre-Emerick Aubameyang ស៊ុតបញ្ចូលទី២គ្រាប់ ក្នុងជ័យជម្នះរបស់ Arsenal លើ Norwich City ៤-០ ដើម្បីជួយក្រុមកាំភ្លើងធំបន្តប្រជែងកៅអី Europa League រដូវកាលក្រោយ។
ក្រុមតោខៀវ Chelsea សង្ឃឹមថា នឹងទាញយកប្រយោជន៍ពីក្រុមលេខ៣ Leicester City ដែលបរាជ័យក្រោមថ្វីជើង Everton ក្នុងលទ្ធផល ២-១ នៅពេលពួកគេជួបក្រុមរួមទីក្រុងឡុងដ៍ West Ham ។ ផ្ទុយទៅវិញក្រុមតោខៀវខ្លួនឯងក៏ទទួលបានត្រឹមខកចិត្តដូចគ្នាក្នុងការទទួលបាន៣ពិន្ទុបន្ថែមដើម្បីធានាក្នុងចំណាត់ថ្នាក់ Top 4។
West Ham ជាអ្នករាំងស្ទះក្តីសង្ឃឹមរបស់ក្រុមលោក Frank Lampard សម្រាប់ជំនួបលីគកំពូលអង់គ្លេសសប្តាហ៍ទី៣២។ នាការប្រកួតក្នុងកីឡដ្ឋាន London Stadium ក្រុមភ្ញៀវមានឱកាសរកគ្រាប់បាល់នាំមុខមុនដោយធ្វើបានតាមរយៈការស៊ុតបាល់ពិន័យ ១១ម៉ែត្រពីសំណាក់ខ្សែបម្រើ Willian នៅនាទី៤២ មុនពេលក្រុមរហស្សនាមញញួរតាមបានស្មើវិញនៅចុងវគ្គទី១ ដែលសម្រេចទីបានដោយ Tomas Soucek។
ចូលដល់វគ្គទី២ ខណៈការប្រកួតដំណើរការបាន៦នាទី ខ្សែប្រយុទ្ធ Michail Antonio បន្ថែមគ្រាប់បាល់ទី២ឲ្យ West Ham ដើម្បីនាំមុខ Chelsea ២-១ វិញ។ យ៉ាងណាក៏ដោយ ខ្សែបម្រើសញ្ជាតិប្រេស៊ីល Willian បានទាត់បាល់ពីន័យ Free-kick យ៉ាងល្អដើម្បីជួយក្រុមតាមស្មើ ២-២ វិញនៅនាទី៧២។
លទ្ធផលខកចិត្តសម្រាប់ក្រុមតោខៀវ បានកើតឡើងនៅនាទី៨៩ បន្ទាប់ពីខ្សែប្រយុទ្ធ Andriy Yarmolenko សម្រេចគ្រាប់ទី៣ ឲ្យក្រុមម្ចាស់ផ្ទះ ដើម្បីជួយក្រុមលោក David Moyes ទទួលជ័យជម្នះលើក្រុម Chelsea ក្នុងលទ្ធផល ៣-២។
បរាជ័យនេះ ធ្វើឲ្យ Chelsea នៅរក្សាចំណាត់ថ្នាក់ទី៤ដដែល ប៉ុន្តែមានពិន្ទុប្រកៀកនឹងគូប្រជែង Manchester United ដែលឈរលេខ៥។ ឆ្លងកាត់ការប្រកួត៣២លើក Chelsea មាន៥៤ពិន្ទុ នាំមុន Man Utd តែ២ពិន្ទុប៉ុណ្ណោះ។ ក្រុមដែលត្រូវប្រជែងយកតំណែង Top 4 មានរហូតដល់៤ក្រុម ក្នុងនោះ Leicester City ដែលឈរលេខ៣មាន៥៥ពិន្ទុ Chelsea, Man Utd និង Wolves។ ប៉ុន្តែជ័យម្នះរបស់ West Ham នេះ បានជួយពួកគេកើនដល់៣០ពិន្ទុ ឈរចំណាត់ថ្នាក់ទី១៦ គេចផុតពីតំបន់ត្រូវកាត់ចោល ដោយនាំមុខក្រុមលេខ១៨ Aston Villa ចំនួន៣ពិន្ទុ។
ដោយឡែក Arsenal រកបាន៣ពិន្ទុបន្ថែមក្រោយឈ្នះ ក្រុមបាតតារាង Norwich City ៤-០ ដោយលទ្ធផលនេះនាំឲ្យពួកគេមានឱកាសច្រើនក្នុងដណ្តើមកៅអី Europa League រដូវកាលក្រោយ ខណៈសព្វថ្ងៃរកបាន៤៦ពិន្ទុ ឈរចំណាត់ថ្នាក់ទី៧ក្នុងតារាង Premier League តាមពីក្រោយ Wolves ដែលឈរលេខ៦ចំនួន៦ពិន្ទុ។ ការប្រកួតក្របខណ្ឌកំពូលអង់គ្លេសនៅសល់៦លើកទៀតសម្រាប់រដូវកាល ២០១៩-២០ នេះ៕
© រក្សាសិទ្ធិដោយ thmeythmey.com