ជាតិ
សង្គមជាតិ
ពីថ្ងៃនេះទៅ សៀវភៅស្នាក់នៅ ធ្វើត្រឹមប៉ុស្តិ៍នគរបាល ហើយសៀវភៅគ្រួសារ ធ្វើត្រឹមអធិការដ្ឋាន រូបពីហ្វេសប៊ុក ការិយាល័យច្រកចេញចូលតែមួយស្រុកបវេល
× សៀវភៅស្នាក់នៅ ទុតិយតាសៀវភៅស្នាក់នៅ លិខិតបញ្ជាក់ទីលំនៅ ការប្រែប្រួលនៃសមាជិកគ្រួសារ ការផ្លាស់ប្តូរទីលំនៅ និង រាល់ការកែតម្រូវទិន្នន័យក្នុងបញ្ជីស្នាក់នៅ ដែលពីមុន អធិការនគរបាលក្រុង-ស្រុក-ខណ្ឌ ជាអ្នកពិនិត្យនិងផ្តល់ជូនពលរដ្ឋ ត្រូវបានប្រគល់ទៅឲ្យនាយប៉ុស្តិ៍នគរបាលរដ្ឋបាលឃុំ-សង្កាត់ ជាអ្នកពិនិត្យនិងផ្តល់ជូនវិញ។
ចំណែក ការពិនិត្យនិងការផ្តល់សៀវភៅគ្រួសារ ទុតិយតាសៀវភៅគ្រួសារ ការប្រែប្រួលសមាជិកគ្រួសារ និង ការកែតម្រូវទិន្នន័យក្នុងបញ្ជីគ្រួសារ ដែលជាសមត្ថកិច្ចរបស់ស្នងការនគរបាលរាជធានី-ខេត្ត ត្រូវបានផ្ទេរទៅឲ្យអធិការនគរបាលក្រុង-ស្រុក-ខណ្ឌ។
ការផ្ទេរសមត្ថកិច្ចក្នុងការផ្តល់សៀវភៅស្នាក់នៅនិងសៀវភៅគ្រួសារនេះ ធ្វើឡើងតាមរយៈប្រកាសរបស់សម្តេច ស ខេង រដ្ឋមន្ត្រីក្រសួងមហាផ្ទៃ ដែលចេញនៅថ្ងៃទី១ ខែកក្កដា ឆ្នាំ២០២០។ រដ្ឋមន្ត្រីមហាផ្ទៃ បញ្ជាក់ក្នុងប្រកាសនោះថា ការផ្ទេរសមត្ថកិច្ចចុះទៅក្រោមមួយថ្នាក់ៗបែបនេះ គឺដើម្បី «បង្កលក្ខណៈងាយស្រួល និងឆាប់រហ័សលើការចុះបញ្ជីស្នាក់នៅ និង បញ្ជីគ្រួសារ ជូនប្រជាជន»។
សូមបញ្ជាក់ថា ការធ្វើអត្ដសញ្ញាណបណ្ណ សៀវភៅស្នាក់នៅ សៀវភៅគ្រួសារ និង អាត្រានុកូលដ្ឋាន ជាដើម មិនតម្រូវឲ្យបង់ថវិកាឡើយ៕
Tag:
សេវារដ្ឋបាល
សៀវភៅស្នាក់នៅ
© រក្សាសិទ្ធិដោយ thmeythmey.com