តុលាការឧទ្ធរណ៍បារាំង នៅថ្ងៃទី៣ ខែកក្កដា បានទាត់ចោលការស្នើឲ្យបើកការស៊ើបអង្កេតឡើងវិញសំណុះរឿងធ្វើឃាតអតីតប្រធានាធិបតីរវ៉ាន់ដាដោយការបាញ់ទម្លាក់យន្តហោះកាលពីឆ្នាំ១៩៩៤។ តុលាការឧទ្ធរណ៍បារាំង ត្រូវបានស្នើឲ្យពិនិត្យឡើងវិញនូវសេចក្តីសម្រេចឆ្នាំ២០១៨ ដែលច្រានចោលការស៊ើបអង្កេតលើមនុស្សជំនិតរបស់ លោក Paul Kagame ប្រធានាធិបតីរវ៉ាន់ដាបច្ចុប្បន្ន។
នៅថ្ងៃទី៤ ខែមេសា ឆ្នាំ១៩៩៤ យន្តហោះដឹកអ្នកដំណើរ មួយគ្រឿងត្រូវបានមីស៊ីលយ៉ាងហោចណាស់មួយគ្រាប់បាញ់ទម្លាក់នៅពេលចុះចត ក្នុងរដ្ឋធានីគីហ្កាលី ប្រទេសរវ៉ាន់ដា។ យន្តហោះមួយគ្រឿងនោះ កំពុងដឹកលោក Juvenal Habyarimana ប្រធានាធិបតីរវ៉ាន់ដា និងលោកCyprien Ntaryamira ប្រធានាធិបតីប៊ូរុនឌី នៅពេលនោះ។
ប្រធានាធិបតីទាំងពីររូបខាងលើ មកពីក្រុមជនជាតិ ហ៊ូទូ (Hutu)។ ឃាតកម្មខាងលើ ប្រៀបបានដូចជាប្រេងទៅចាក់លើសាំង ទៅលើជម្លោះជនជាតិហ៊ូទូ និង ទុតស៊ី( Tutsi) ដែលឈានដល់ការកាប់សម្លាប់ប្រល័យពូជសាសន៍ប្រព្រឹត្តដោយក្រុមហ៊ូទូជ្រុលនិយមរយៈពេល១០០ ថ្ងៃនៅរវ៉ាន់ដា។ ក្រុមជនជាតិទុស៊ីជាង ៨សែននាក់បាត់បង់ជីវិត។
នៅឆ្នាំ១៩៩៨ ក្រោយការដាក់ពាក្យបណ្តឹងពីសំណាក់ក្រុមគ្រួសាររបស់នាវិកយន្តហោះខាងលើ ការស៊ើបអង្កេតលើសំណុំធ្លាក់យន្តហោះនេះត្រូវចាប់ផ្តើម។ ដំបូងឡើយ ការស៊ើបអង្កេតផ្តោតទៅលើមនុស្សជំនិតរបស់លោក Paul Kagame ប្រធានាធិបតីរវ៉ាន់ដាបច្ចុប្បន្នដែលជាជនទុតស៊ី និងជាអ្នកដឹកនាំចលនាបះបោរប្រឆាំងរដ្ឋាភិបាលហ៊ូទូ ។ នៅឆ្នាំ២០១២ របាយការណ៍អ្នកជំនាញបារាំងបានបង្ហាញថា មីស៊ីលនោះបានបាញ់ចេញពីជំរំកងទ័ពរបស់អតីតលោក Habyarimana ។
នៅឆ្នាំ២០១៨ តុលាការបារាំងសម្រេចទម្លាក់ចោលមិនបន្តការស៊ើបអង្កេតក្រោមហេតុផលខ្វះភស្តុតាង។ ដោយមិនអស់ចិត្តក្រុមគ្រួសាររបស់នាវិកក្នុងយន្តហោះ ក៏ដូចជាភរិយារបស់អតីតប្រធានាធិបតីរវ៉ាន់ដា Habyarimana បានធ្វើបណ្តឹងឧទ្ធរណ៍ ឲ្យតុលាការបន្តធ្វើការស៊ើបអង្កេតទាំងអស់ ឬផ្នែកណាមួយ និងនាំជនសង្ស័យមកជំនុំជម្រះនៅចំពោះមុខតុលាការ។ នេះបើតាមទីភ្នាក់ងារព័ត៌មាន AFP ។
យ៉ាងណាមិញ តុលាការបារាំងបានបដិសេធសំណើនេះ។ នេះបើតាមការបញ្ជាក់របស់មេធាវីដើមបណ្ដឹងនៅថ្ងៃទី៣ ខែកក្កដា។ ក្រុមមេធាវីដដែលប្រកាស កូនក្ដីរបស់ខ្លួននឹងតវ៉ាទៅកាន់តុលាការកំពូលបារាំងទៀត។
ការស៊ើបអង្កេតទៅលើសំណុំរឿងនេះ ប្រៀបបានដូចជាយកឈើទៅឆ្កឹះដំបៅ ត្បិតអីក្រោយលោក Kagame បានឡើងកាន់អំណាចប្រធានាធិបតីក្នុងឆ្នាំ២០០០ បានផ្តាច់ទំនាក់ទំនងការទូតជាមួយបារាំងនៅចន្លោះឆ្នាំ២០០៦ និង ២០០៩ ក្រោយតុលាការបារាំងចេញដីការចាប់ខ្លួនមនុស្សជំនិតរបស់លោក។
នៅឆ្នាំ២០១៤ និងជាខួបទី២០ឆ្នាំ នៃអំពើប្រល័យពូជសាសន៍ លោក Kagame បានចោទបារាំងថា បានដើរតួនាទីដោយផ្ទាល់ក្នុងអំពើអមនុស្សធម៌នេះ។ នៅឆ្នាំ២០១៦ លោក Kagame បានបើកការស៊ើបអង្កេតចំពោះតួនាទីរបស់ជនជាតិបារាំង២០រូប ក្រោយយន្តហោះធ្លាក់ប៉ុន្មានម៉ោង។ បារាំង តែងប្រកែករាល់ការចោទប្រកាន់ ហើយប្រធានាធិបតីបារាំង អេម៉ានុយអ៊ែល ម៉ាក្រុងថែមទាំងបានប្រកាសបង្កើតវេទិកាប្រវត្តិវិទូ និងអ្នកស្រាជ្រាវដើម្បីសិក្សាលើការចោទប្រកាន់ទាំងនោះទៀតផង៕