ជាតិ
WWF ស្នើដល់អាជ្ញាធរពាក់ព័ន្ធចាត់វិធានការលើបទល្មើសនេសាទឱ្យម៉ឹងម៉ាត់ ខណៈរកឃើញត្រីកម្រកំពុងដាក់លក់លើផ្សារ រូបភាពពី អង្គការWWF
× ភ្នំពេញ៖ ត្រីគល់រាំង ត្រីត្រសក់ក្រហម ត្រីខ្លា ត្រីក្របី ត្រីត្រចៀកដំរី និងបបែលយក្សទឹកសាប ជាត្រីដែលស្ថិតក្នុងចំណោមត្រីចំនួន៣៥ប្រភេទ ដែលកំពុងត្រូវបានគេដាក់លក់នៅតាមផ្សារក្នុងប្រទេស និងនាំចេញទៅប្រទេសជិតខាង។ បើតាម WWF ត្រីគល់រាំង និងត្រីត្រសក់ក្រហម ជាប្រភេទត្រីជិតផុតពូជជាសកល រីឯត្រីខ្លា ត្រីក្របី និងត្រីត្រចៀកដំរី ជាត្រីកំពុងរងគ្រោះថ្នាក់នៅកម្ពុជា។
របាយការណ៍របស់អង្គការមូលនិធិសកលសម្រាប់ធម្មជាតិ ហៅកាត់ថា WWF បានបង្ហាញថា ការនេសាទខុសច្បាប់ និងជួញដូរប្រភេទត្រីជិតផុតពូជ កំពុងកើតមាននៅតាមបណ្ដោយដងទន្លេមេគង្គនៅកម្ពុជា និងបានដាក់លក់នៅតាមទីផ្សារ។ រដ្ឋបាលជលផល និងអង្គការWWF បានចាត់ទុកថា ការធ្វើពាណិជ្ជកម្ម និងជួញដូរត្រីជិតផុតពូជនេះ មិនត្រឹមជាទង្វើខុសច្បាប់ប៉ុណ្ណោះទេ វាក៏ជាការបង្កហានីភ័យខ្ពស់ ដល់ធនធានជលផល ជាពិសេសប្រភេទត្រីមេសំខាន់ៗ និងសត្វផ្សោតផងដែរ។
ជាមួយគ្នានេះរដ្ឋបាលជលផល និងអង្គការWWF ក៏បានអំពាវនាវដល់អាជ្ញាធរពាក់ព័ន្ធឱ្យចាត់វិធានការលើការពង្រឹងអនុវត្តន៍ច្បាប់ឱ្យបានតឹងរ៉ឹង ចំពោះការនេសាទនិងជួញដូរប្រភេទត្រីជិតផុតពូជនេះ។
លោក សេង ទៀក នាយកអង្គការWWF បានស្នើទៅកាន់អាជ្ញាធរពាក់ព័ន្ធដូច្នេះថា៖ «ខ្ញុំសូមអំពាវនាវដល់អាជ្ញាធរមានសមត្ថកិច្ចគ្រប់លំដាប់ថ្នាក់ទាំងអស់មេត្តាបង្កើនការរឹតបន្តឹងលើការអនុវត្តច្បាប់ឱ្យកាន់តែមានប្រសិទ្ធភាពខ្ពស់បំផុត។ និងបង្កើនយន្តការត្រួតពិនិត្យជាប្រចាំនៅតាមបណ្ដាយទីផ្សារ និងដេប៉ូទិញ-លក់ត្រី ព្រមទាំងដាក់ពិន័យឱ្យបានធ្ងន់ធ្ងរបំផុតដល់ជនល្មើសទាំងឡាយណាដែលធ្វើសកម្មភាពនេសាទនៅក្នុងតំបន់ហាមឃាត់ និងធ្វើពាណិជ្ជកម្មប្រភេទត្រីជិតផុតពូជ និងត្រីមេពូជក្នុងប្រទេសកម្ពុជា»។
លោក អេង ជាសាន ប្រតិភូរាជរដ្ឋាភិបាលកម្ពុជាទទួលបន្ទុកជាប្រធាន រដ្ឋបាលជលផល បានលើកឡើងថា អ្នកនេសាទត្រី អ្នកទិញត្រី និងឈ្មួញកណ្ដាល មិនសូវយល់ដឹងអំពីច្បាប់ស្ដីពីជលផល និងលិខិតបទដ្ឋានគតិយុត្តិពាក់ព័ន្ធនឹងកិច្ចការពារ និងការគ្រប់គ្រងធនធានជលផលជាពិសេសប្រភេទជលផលកំពុងទទួលរងការគំរាមកំហែងនោះទេ។
លោកក៏បានស្នើដល់អាជ្ញាធរពាក់ព័ន្ធឱ្យបង្កើនការអប់រំ និងផ្សព្វផ្សាយបន្ថែមដល់ប្រជានេសាទ និងសហគមន៍មូលដ្ឋានដែលរស់នៅតាមបណ្ដោយដងទន្លេមេគង្គ អំពីច្បាប់ស្ដីពីជលផល និងលិខិតបទដ្ឋានគតិយុត្តិផ្សេងៗទៀត ដើម្បីបំផុសស្មារតីឱ្យពលរដ្ឋចូលរួមថែរក្សាធនធានជលផល ហើយលើកទឹកចិត្តឱ្យពលរដ្ឋបង្កើនមុខរបរផ្សេងបន្លែមពីការនេសាទ៕
© រក្សាសិទ្ធិដោយ thmeythmey.com