ភ្នំពេញ៖ កិច្ចប្រជុំកំពូលអាស៊ី-អឺរ៉ុប (ASEM) លើកទី១៣ នៅកម្ពុជាដែលគ្រោងរៀបចំនៅថ្ងៃទី១៦និង១៧ ខែវិច្ឆិកា ឆ្នាំ២០២០ នៅរាជធានីភ្នំពេញ ក្រោមប្រធានបទ«ពង្រឹងពហុភាគីនិយម ដើម្បីកំណើនរួម» នឹងត្រូវលើកពេលរៀបចំនៅពាក់កណ្ដាលឆ្នាំ២០២១វិញ ដោយសារវិបត្តិកូវីដ-១៩។
នាកិច្ចប្រជុំឧត្តមមន្ត្រីអាស៊ី-អឺរ៉ុបតាមប្រព័ន្ធវីដេអូ កាលពីថ្ងៃទី២-៣ ខែកក្កដា លោក សុក ស៊ីផាន់ណា ទីប្រឹក្សាជាន់ខ្ពស់របស់រាជរដ្ឋាភិបាល បានធ្វើសំណើរដល់ប្រទេសជាដៃគូ ASEM ទាំងអស់ ដើម្បីសុំលើកពេលកិច្ចប្រជុំកំពូលអាស៊ី-អឺរ៉ុបលើកទី១៣ ទៅប្រព្រឹត្តនៅពាក់កណ្ដាលឆ្នាំ២០២១វិញ ដោយសារការរាលដាលនៃជំងឺកូវីដ-១៩។ ជាមួយគ្នានេះ ប្រទេសជាដៃគូ ASEM ទាំងអស់បានយល់ព្រមជាឯកច្ឆន្ទចំពោះសំណើររបស់កម្ពុជា។
កិច្ចប្រជុំអាស៊ី-អឺរ៉ុប (ASEM) បានបង្កើតឡើង នៅឆ្នាំ១៩៩៦ ដើម្បីផ្សាភ្ជាប់អាស៊ីនិងអឺរ៉ុប តាមរយៈវេទិកាសន្ទនា និងសហប្រតិបត្តិការួមគ្នា។ កម្ពុជា បានក្លាយជាសមាជិកASEM នៅឆ្នាំ២០០៤។ កម្ពុជា គឺជាប្រទេសទី៤ ក្នុងចំណោមប្រទេសតំបន់អាស៊ាន បន្ទាប់ពីប្រទេសថៃ (១៩៩៦) វៀតណាម(២០០៤) និងឡាវ (២០១២) ដែលក្លាយជាម្ចាស់ផ្ទះនៃកិច្ចប្រជុំអាស៊ី-អឺរ៉ុប ,គណៈកម្មាធិការអឺរ៉ុប និងសមាគមន៍អាស៊ាន។
បើគិតចាប់តាំងពីឆ្នាំ១៩៩៦មក កិច្ចប្រជុំអាស៊ី-អឺរ៉ុប (ASEM) បានរៀបចំចំនួន១២លើកហើយ ដោយក្នុងនោះធ្វើឡើងនៅប្រទេសថៃ (១៩៩៦) អង់គ្លេស (១៩៩៨) កូរ៉េខាងត្បូង (២០០០) ដាណាម៉ាក (២០០២) វៀតណាម (២០០៤) ហ្វាំងឡង់ (២០០៦) ចិន (២០០៨) បែលហ្ស៊ិក (២០១០) ឡាវ (២០១២) អ៊ីតាលី (២០១៤) ម៉ុងហ្គោលី (២០១៦) និងបែលហ្ស៊ិកម្តងទៀត នាឆ្នាំ២០១៨ ។
បច្ចុប្បន្នប្រទេសដែលជាសមាជិក ASEM មាន៥១ប្រទេស ក្នុងនោះមាន អូស្ត្រាលី, អូទ្រីស, បង់ក្លាដែស, បែលហ្ស៊ិក, ប្រ៊ុយណេ, ប៊ុលហ្គារី, កម្ពុជា, ចិន, ក្រូអាត, សាធារណរដ្ឋឆែក, ដាណឺម៉ាក, អេស្តូនី, ហ្វាំងឡង់, បារាំង, អាល្លឺម៉ង់, ក្រិក, ហុងគ្រី, ឥណ្ឌា, ឥណ្ឌូណេស៊ី, អៀរឡង់, អ៊ីតាលី, ជប៉ុន, កាហ្សាក់ស្ថាន, កូរ៉េខាងត្បូង, ឡាវ, ឡេតូនី, លីទុយអានី, លុចសំបួ, ម៉ាឡេស៊ី, ម៉ាល់ត៍, ម៉ុងហ្គោលី, មីយ៉ាន់ម៉ា, ហូឡង់, នូវែលសេឡង់, ន័រវេស, ប៉ាគីស្ថាន, ហ្វីលីពីន, ប៉ូឡូញ, ព័រទុយហ្គាល់, រុស្ស៊ី, សិង្ហបុរី, ស្លូវ៉ាគី, ស្លូវេនី, អេស្ប៉ាញ, ស៊ុយអែត, ស្វ៊ីស, ថៃ, ចក្រភពអង់គ្លេស និងវៀតណាម។ សហភាពអឺរ៉ុប និងអាស៊ាន ជាអង្គការប្រចាំតំបន់ដែលចូលរួមក្នុងកិច្ចប្រជុំនេះផងដែរ៕