ជាតិ
កម្ពុជាមានមហិច្ឆតាប្រែក្លាយពីល្បែងពាណិជ្ជកម្មទៅជាមណ្ឌលល្បែងពាណិជ្ជកម្មសមាហរ័ណ
×![]()
ភ្នំពេញ៖ សេចក្ដីព្រាងច្បាប់ស្ដីពីការគ្រប់គ្រងល្បែងពាណិជ្ជកម្ម ត្រូវបានអនុម័តនៅក្នុងកិច្ចប្រជុំគណៈរដ្ឋមន្ត្រី កាលពីថ្ងៃទី៣ ខែកក្កដាកន្លងទៅ។ សេចក្ដីព្រាងច្បាប់នេះ រៀបចំឡើងមានចំនួន១២ជំពូក និង៩០មាត្រា ហើយត្រូវបានសម្រេចឯកភាពដោយអង្គប្រជុំពេញអង្គគណៈរដ្ឋមន្ត្រី ក្រោមមអធិបតីភាពសម្តេចនាយករដ្ឋមន្ត្រី ហ៊ុន សែន។
សេចក្ដីព្រាងច្បាប់ស្ដីពីការគ្រប់គ្រងល្បែងពាណិជ្ជកម្ម ត្រូវបានតាក់តែងឡើងក្នុងគោលបំណងធានាដល់ការគ្រប់គ្រងមណ្ឌលល្បែងពាណិជ្ជកម្មសមាហរ័ណ (Integrated Resort) និងល្បែងពាណិជ្ជកម្ម ដើម្បីរួមចំណែកជំរុញកំណើនសេដ្ឋកិច្ច លើកកម្ពស់វិស័យទេសចរណ៍ បង្កើតការងារ ប្រមូលចំណូល រក្សាសុវត្ថិភាព និងសន្តិសុខសង្គម។
សេចក្ដីព្រាងច្បាប់នេះ នឹងអនុញ្ញាតឱ្យមានការគ្រប់គ្រងលើវិស័យកាស៊ីណូ និងល្បែងពាណិជ្ជកម្មយ៉ាងតឹងរ៉ឹង ប្រកបដោយប្រសិទ្ធភាពខ្ពស់ តាមរយៈការកំណត់ចំនួនទុនវិនិយោគអប្បបរមា សម្រាប់អាជីវកម្មកាស៊ីណូ។
រដ្ឋាភិបាលវាយតម្លៃថា ការវិនិយោគលើវិស័យកាស៊ីណូ បានចូលរួមជុំរុញការអភិវឌ្ឍតំបន់ព្រំដែន ដែលជាអតីតសមរភូមិ តំបន់ពោរពេញដោយគ្រាប់មីន តំបន់គ្រុនចាញ់ និងជាអតីតតំបន់គ្មានប្រជាជនរស់នៅ។ បន្ថែមពីលើនេះ វាបានរួមចំណែកការពារខ្សែក្រវាត់ព្រំដែន ការគាំទ្រដល់ការអភិវឌ្ឍវិស័យទេសចរណ៍ បង្កើតការងារជូនពលរដ្ឋ ក៏ដូចជាការបង្កើតប្រភពចំណូលថវិកាជាតិ។
គណៈរដ្ឋមន្ត្រីក៏បានលើកឡើងផងដែរពីការប្រែក្លាយល្បែងពាណិជ្ជកម្មទៅជាមណ្ឌលល្បែងពាណិជ្ជកម្មសមាហរ័ណ និងជាកន្លែងកម្សាន្តទាក់ទាញទេសចរ តាមរយៈការរៀបចំទីតាំងល្បែងពាណិជ្ជកម្ម ដោយរួមបញ្ចូលនូវទីតាំងបដិសណ្ឋារកិច្ច ភោជនីយដ្ឋាន ផ្សារទំនើប សណ្ឋាគារ មណ្ឌលកីឡា មណ្ឌលកម្សាន្តនិងទស្សនា មណ្ឌលសន្និបាត ឬពិព័រណ៌ និងហាងលក់ទំនិញជាដើម។
ការកំណត់តំបន់ដែលគួរអនុញ្ញាតឱ្យមានល្បែងពាណិជ្ជកម្ម ឬមិនគួរអនុញ្ញាតការពង្រឹងសមត្ថភាពស្ថាប័ន និងការបំពាក់នូវបច្ចេកវិទ្យាសមស្របក្នុងការត្រួតពិនិត្យជាប្រចាំលើកិច្ចដំណើរការរបស់ប្រតិបត្តករល្បែងពាណិជ្ជកម្ម ព្រមទាំងបានគិតគូរអំពីយន្តការយ៉ាងតឹងរ៉ឹងពាក់ព័ន្ធនឹងការប្រឆាំងការលាងសម្អាតប្រាក់ និងហិរញ្ញប្បទានភេរវកម្ម៕
Tag:
ច្បាប់
ល្បែងពាណិជ្ជកម្ម
© រក្សាសិទ្ធិដោយ thmeythmey.com
