ជាតិ
សង្គមជាតិ
រដ្ឋមន្ត្រីអប់រំ អនុញ្ញាតឲ្យគ្រឹះស្ថានឧត្តមសិក្សារដ្ឋ រៀបចំប្រឡងបញ្ចប់ឆ្នាំ តាមបន្ទប់
សកម្មភាពសិស្សប្រឡង (រូបភាពពីសាកលវិទ្យាល័យកម្ពុជា)
×![]()
ភ្នំពេញ៖ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និង កីឡា សម្រេចឲ្យគ្រឹះស្ថានឧត្តមសិក្សារបស់រដ្ឋ រៀបចំការប្រឡងបញ្ចប់សិក្សាតាមបន្ទប់ ដោយកំណត់ត្រឹមមនុស្សតែ១៥ ទៅ២០នាក់ ក្នុងមួយបន្ទប់ ហើយត្រូវគោរពតាមវិធានការអនាម័យរបស់ក្រសួងសុខាភិបាល និងអង្គការសុខភាពពិភពលោក (WHO)។ នេះបើតាមសេចក្តីជូនដំណឹង ដែលរដ្ឋមន្ត្រីអប់រំ ផ្ញើទៅបណ្តាគ្រឹះស្ថានសិក្សារបស់រដ្ឋ នាថ្ងៃទី៦ ខែកក្កដា ឆ្នាំ២០២០។ 
ការណ៍ដែលលោក ហង់ជួន ណារ៉ុន អនុញ្ញាតឲ្យគ្រឹះស្ថានឧត្តមសិក្សារបស់រដ្ឋ ប្រឡងបញ្ចប់ឆ្នាំតាមបន្ទប់រៀន ដោយសារតែគ្រឹះស្ថានសិក្សារបស់រដ្ឋ មិនអាចរៀបចំការប្រឡងតាមអនឡាញ ឲ្យមានលក្ខណៈបច្ចេកទេសបានឡើយ។ ចំណែកគ្រឹះស្ថានឧត្តមសិក្សាឯកជន លោករដ្ឋមន្ត្រី ឲ្យរៀបចំការប្រឡងបញ្ចប់ឆ្នាំតាមអនឡាញដដែល។
លោករដ្ឋមន្ត្រី តម្រូវឲ្យគ្រឹះស្ថានសិក្សារបស់រដ្ឋនីមួយៗ រៀបចំដំណើរការប្រឡងបញ្ចប់ឆ្នាំត្រឹមតែរយៈពេល២ថ្ងៃប៉ុណ្ណោះ។ មុនហ្នឹងរៀបចំដំណើរការប្រឡងនេះបាន គ្រឹះស្ថានឧត្តមសិក្សារបស់រដ្ឋ ត្រូវដាក់ពាក្យស្នើសុំទៅក្រសួងអប់រំ ដើម្បីពិនិត្យ និងទុកជាព័ត៌មានជាមុនសិន។
ក្រសួងអប់រំ នឹងពិចារណាបើកសាលារៀនឡើងវិញ ដោយក្រសួងបែងចែកជា៣ដំណាក់កាល គឺ ដំណាក់កាលទី១ សាលារៀន មានស្តង់ដាសុវត្ថិភាពខ្ពស់ ដំណាក់កាលទី២ សាលារៀន មានស្តង់ដាមធ្យម និង ដំណាក់កាលទី៣ សាលារៀនមានស្តង់ដាអប្បបរមា។
លោក រស់ សុវាចា អ្នកនាំពាក្យក្រសួងអប់រំ បានបញ្ជាក់ថា ក្រសួងកំពុងតែសហការជាមួយនឹងគ្រប់ភាគីពាក់ព័ន្ធ ជាពិសេសក្រសួងសុខាភិបាល ក្រសួងសេដ្ឋកិច្ច ដើម្បីពិចារណាកំណត់ថ្ងៃបរិច្ឆេទ និងវិធានការចាំបាច់ សម្រាប់បើកសាលាឡើងវិញ ក្នុងដំណាក់កាលទី១ ប៉ុណ្ណោះ។
ចំណែក ដំណាក់កាលទី២ និងដំណាក់កាលទី៣ ក្រសួងនឹងកំណត់បើកជាបន្តបន្ទាប់ទៀត។ នេះបើតាមអ្នកនាំពាក្យដដែល ដោយលោក បញ្ជាក់ដូច្នេះថា៖«ក្រសួងអប់រំ នឹងពិនិត្យតាមដានយ៉ាងយកចិត្តទុកដាក់លើដំណាក់កាលទី១ រួចនឹងបន្តពិនិត្យករណីដំណាក់កាលទី២ និងដំណាក់កាលទី៣ យោងលើផែនការដែលក្រសួងបានរៀបចំជាមួយក្រសួង-ស្ថាប័នពាក់ព័ន្ធ»៕
Tag:
គ្រឹះស្ថានសិក្សា
ប្រឡង
អប់រំ
© រក្សាសិទ្ធិដោយ thmeythmey.com
