COVID-19
អន្តរជាតិ
បុគ្គលិកពេទ្យ ដើរពីមុនរថយន្តសង្រ្គោះបន្ទាន់ នៅក្នុងទីក្រុង Melbourne នាថ្ងៃទី៧ ខែកក្កដា ឆ្នាំ២០២០។ រូបភាព៖ AFP
×![]()
ដោយ: ធៀន ភារិន្ទ
រដ្ឋVictoria របស់អូស្ត្រាលីរាយការណ៍ពីមានការកើនឡើងករណីឆ្លងCOVID-19 ជិត២០០ករណីក្នុងមួយថ្ងៃ។ បញ្ហានេះ បានធ្វើឲ្យ នាយករដ្ឋមន្ត្រីនៃរដ្ឋ Victoria លោក Daniel Andrews នៅថ្ងៃទី៧ ខែកក្កដា បានប្រកាសបិទទីក្រុងធំលំដាប់ទី២ នៅក្នុងអូស្ត្រាលីសារជាថ្មី។ ការបិទទីក្រុងMelbourne នឹងមានសុពលភាពចាប់ពីថ្ងៃទី៨ ខែកក្កដាតទៅ ហើយក៏ត្រូវជាថ្ងៃបិទព្រំដែនរវាងរដ្ឋ Victoria និងរដ្ឋ New South Wales ផងដែរ។ 
រដ្ឋVictoria បានរាយការណ៍ថា មានករណីឆ្លងច្រើនបំផុតចាប់តាំងពីផ្ទុះកូរូណាវីរុសមក ពោលគឺមានរហូតដល់ទៅ ១៩១ករណី នៅថ្ងៃទី៧ ខែកក្កដា។ ចំនួននេះ គឺច្រើនជាងតួលេខម្សិលមិញ ដែលមានចំនួន ១២៧ករណីទៅទៀត។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ទាក់ទងនឹងករណីឆ្លងកូរ៉ូណាវីរុសកើនឡើងបែបនេះ លោក Daniel Andrews នាយករដ្ឋមន្ត្រីនៃរដ្ឋ Victoria បានលើកឡើងនៅក្នុងសន្និសីទសារព័ត៌មានថា៖ «វាមានករណីឆ្លង COVID-19 ថ្មីជាច្រើន»។ ដោយមើលឃើញពីបញ្ហាខាងលើ លោកនាយករដ្ឋមន្ត្រីរូបនេះ បានសម្រេចបិទទីក្រុង Melbourne យ៉ាងហោចណាស់ ៦សប្តាហ៍ ដោយចាប់គិតពីថ្ងៃទី៨ ខែកក្កដាទៅ ដើម្បីទប់ស្កាត់ការរាតត្បាតនៃកូរ៉ូណាវីរុស។ មនុស្សជាច្រើនលាននាក់ នឹងជាប់បម្រាមរឹតត្បិតឲ្យស្នាក់នៅក្នុងផ្ទះ ប៉ុន្តែក៏មានករណីលើកលែងមួយចំនួនផងដែរ ដូចជាការទៅទិញរបស់ប្រើប្រាស់ចាំបាច់ ម្ហូបអាហារជាដើម។
កន្លងមក អូស្ត្រាលី ក៏បានប្រកាសបិទព្រំដែនរវាងរដ្ឋ Victoria និង New South Wales ដែរ បន្ទាប់ពីករណីឆ្លងCOVID-19 នៅក្នុងរដ្ឋVictoria បានហក់ឡើង។ ការបិទព្រំដែនរដ្ឋនេះ នឹងចូលជាធរមានដូចគ្នាទៅនឹងថ្ងៃបិទក្រុងMelbourne ដែរ។ ដើម្បីយាមល្បាតតាមព្រំដែនរវាងរដ្ឋVictoria និង New South Wales ឲ្យមានប្រសិទ្ធភាព អូស្ត្រាលីបានពង្រាយកម្លាំងប៉ូលិស និងយោធា ដោយមានបន្ថែមបច្ចេកវិទ្យាដូចជា ដ្រូន ជាដើម។
សូមបញ្ជាក់ថា គិតមកត្រឹមពេលនេះ អូស្ត្រាលីមានករណី COVID-19 សរុបជាង ៨ពាន់ករណី អ្នកស្លាប់មានចំនួនជាង ១០០នាក់ និងអ្នកជាសះស្បើយមានចំនួនជាង ៧ពាន់នាក់៕
Tag:
អូស្ត្រាលី
COVID-19
© រក្សាសិទ្ធិដោយ thmeythmey.com
