ភ្នំពេញ៖ វិបត្តិជំងឺកូវីដ-១៩ នេះ ផ្ដល់ការលំបាកដល់សេដ្ឋកិច្ចផង ហើយក៏ជាឱកាសល្អសម្រាប់កម្ពុជាផង ក្នុងការបង្ហាញសក្កានុពលទេសចរណ៍ ដើម្បីទាក់ទាញភ្ញៀវនាពេលអនាគត។ នេះជាការយល់ឃើញរបស់អ្នកជំនួញក្នុងវិស័យទេសចរណ៍។
អ្នកស្រី ប៊ិ ឧដ្ឋានវតី នាយិកាប្រតិបត្តិនៃក្រុមហ៊ុនទេសចរណ៍អ៊ែរ.តេ.អ៊ែរ ទទួលស្គាល់ថា វិបត្តិកូវីដ-១៩ ពិតជាឥទ្ធិពលអាក្រក់ខ្លាំងលើសេដ្ឋកិច្ចកម្ពុជា ប៉ុន្តែវាក៏ជួយឱ្យកម្ពុជា អាចបង្ហាញសក្តានុពលទេសចរណ៍ខ្លួន ទៅកាន់តំបន់ និងពិភពលោក ដើម្បីទាញយកភ្ញៀវជាតិ និងអន្តរជាតិផងដែរ។
ត្រង់ចំណុចនេះអ្នកស្រី ប៊ិ ឧដ្ឋានវតី ជំរុញឱ្យអាជ្ញាធរដែនដី ស្ថាប័នពាក់ព័ន្ធ ក៏ដូចជាសហគមន៍ដែលតាំងទីលំនៅនៅកន្លែងរមណីយដ្ឋានធម្មជាតិទាំងអស់ ត្រូវបង្កើនការផ្សព្វផ្សាយពីសក្កានុពលរបស់តំបន់ទេសចរណ៍នីមួយៗ និងបង្កើនបដិសណ្ឋាកិច្ចឱ្យកាន់តែល្អប្រសើរព្រមគ្នា។ ជាពិសេសការលុបបំបាត់សំរាមពាសវាលពាសកាលនៅតំបន់ទេសចរណ៍ធម្មជាតិ។
អ្នកស្រី ប៊ិ ឧដ្ឋានវតី នាយិកាប្រតិបត្តិក្រុមហ៊ុនទេសចរណ៍អ៊ែរ.តេ.អ៊ែរ។
ថ្លែងប្រាប់សារព័ត៌មានថ្មីៗ អ្នកស្រី ប៊ិ ឧដ្ឋានវតី បានអះអាងថា៖«ប្រសិនបើកូវីដ-១៩ចប់ទៅ ខ្ញុំជឿថានិន្នាការនៃការដើរលេងរបស់ភ្ញៀវទេសចរនៅក្នុងស្រុកនៅតែមាន ប៉ុន្តែគេនឹងទៅទីកន្លែងទេសចរណ៍ណាដែលមានលក្ខណៈប្រណិតៗ និងទៅលក្ខណៈទេសចរណ៍ធម្មជាតិបែបផ្សងព្រេង។ ប៉ុន្តែដំណើរទេសចរណ៍លក្ខណៈផ្សងព្រេង ប្រសិនបើមានការបំផ្លាញឬបំពុលសម្រស់ទីតាំងធម្មជាតិនោះ ដំណើរកម្សាន្តបែបនេះ គឺគ្មាននិរន្ត៍ភាពទេ»។
កម្ពុជា មានកន្លែងទេសចរណ៍ជាច្រើន ពិសេសតំបន់ទេសចរណ៍បែបធម្មជាតិ ដែលប្រជាពលរដ្ឋក្នុងស្រុកមិនទាន់បានទៅដល់ ដោយសារតែការរៀបចំទទួលភ្ញៀវទេសចរ និងការផ្សព្វផ្សាយពីភាគីពាក់ព័ន្ធនៅមានកម្រិត ខណៈភ្ញៀវក្នុងស្រុក កំពុងស្វែងរកតំបន់ទេសចរណ៍ទាំងអស់នេះ។ នេះជាការលើកឡើងរបស់អ្នកស្រី ឆាយ ស៊ីវលីន ប្រធានសមាគមទេសចរណ៍កម្ពុជា ដោយបានបន្ថែមថា អាជ្ញាធរដែនដី និងស្ថាប័នពាក់ព័ន្ធ ត្រូវជួយរៀបចំសេវាកម្ម គុណភាព និងសុវត្ថិភាព ដើម្បីទាញយកអត្ថប្រយោជន៍ពីចលនាទេសចរណ៍ក្នុងស្រុក។
អ្នកស្រី ឆាយ ស៊ីវលីន បន្តមានប្រសាសន៍ដូច្នេះ៖«ប្រសិនបើយើងអត់បង្កើតនូវសកម្មសេវាកម្មផ្សេងៗទេ ឬសកម្មភាពសម្បទានផ្សេងៗទេ គឺយើងអត់បានអត្ថប្រយោជន៍ប៉ុន្មានទេ ពីភ្ញៀវទេសចរក្នុងស្រុក ព្រោះ ភ្ញៀវទេសចរសម័យឥឡូវនេះ គឺអត់ចង់យកឥវ៉ានទៅតាមខ្លួនច្រើនៗដូចជាមុនទេ។ ភាគច្រើនគឺមានកាបូប ឬកាបូបស្ពាយតាមខ្លួនដាក់ឥវ៉ានចាំបាច់មួយចំនួនប៉ុណ្ណោះ រីឯឥវ៉ាន់មួយចំនួនទៀត គឺពឹងផ្អែកលើសេវាកម្មនៅរមណីដ្ឋានទាំងនោះតែម្តង»។
អ្នកស្រី ឆាយ ស៊ីវលីន ប្រធានសមាគមទេសចរណ៍កម្ពុជា
បើតាមអ្នកស្រី ស៊ីវលីន ម្ចាស់មរណីយដ្ឋាន និងសហគមន៍ទេសចរណ៍នីមួយៗ ត្រូវចេះលើកបង្ហាញ ឬរំលេចនូវអ្វីដែលជាផលិតផលអត្តសញ្ញាណប្រចាំតំបន់ ដោយប្រកាន់ភ្ជាប់អនាម័យខ្ពស់ ផាកសុខភាព និងតម្លៃសមរម្យ។ ជាពិសេសបង្កើតអ្វីប្លែកពិសេស ដើម្បីទាក់ទាញអារម្មណ៍ភ្ញៀវ ដែលធ្វើឱ្យគេបំភ្លេចមិនបាន។ « បើរមណីយដ្ឋានយើងមានសេវាកម្មល្អ មានចំណីអាហារឆ្ងាញ់ អនាម័យ ហើយទីកន្លែងស្រស់ស្អាតមានផាកសុខភាព ទោះបីរមណីយដ្ឋានយើងនៅឆ្ងាយយ៉ាងណាក៏ដោយ ក៏មនុស្សនៅតែនឹងចង់ទៅជានិច្ច»។ នេះជាការបញ្ជាក់របស់ប្រធានសមាគមទេសចរណ៍កម្ពុជា។
កាលឆ្នាំ២០១៩កន្លងមក មានពលរដ្ឋខ្មែរប្រហែល២លាននាក់ បានធ្វើដំណើរទេសចរណ៍នៅបរទេស។បើតាមអ្នកស្រី ឆាយ ស៊ីវលីនពលរដ្ឋខ្មែរដែលទៅធ្វើទេសចរណ៍នៅបរទេសក្នុងមួយនាក់ចំណាយយ៉ាងតិចណាស់៥០០ដុល្លារ។ ដូច្នេះ ក្នុងឆ្នាំ២០១៩កន្លងមកនេះ ពលរដ្ឋខ្មែរប្រមាណ២លាននាក់ ដែលទៅទេសចរណ៍នៅបរទេស គឺបានចំណាយយ៉ាងហោចណាស់១,០០០លានដុល្លារ ដោយចាក់ចូលក្នុងចរន្តសេដ្ឋកិច្ចប្រទេសគេ។ នេះជាការខាតបង់ដ៏ច្រើននៅវិស័យទេសចរណ៍នៅកម្ពុជា។
អ្នកស្រី ឆាយ ស៊ីវលីនបាននិយាយថា៖« ពលរដ្ឋខ្មែរយើងដែលទៅទេសចរណ៍នៅបរទេសនេះ គឺជាចំនួនមួយដ៏ច្រើន ហើយបើយើងស្រមៃមើល ប្រសិនបើចំនួនប្រជាពលរដ្ឋក្នុងស្រុកហ្នឹង ងាកមកដើរលេងក្នុងស្រុកវិញក្នុងចំនួន២លាននាក់ហ្នឹងវិញ គឺបានជួយសេដ្ឋកិច្ចក្នុងស្រុកបានច្រើននាក់ ព្រោះថាបើយើងចេញដើរ គឺត្រូវចំណាយហើយ។ តែទន្ទឹមនឹងនេះ ក៏ទាមទារឱ្យតំបន់ទេសចរណ៍នៅក្នុងយើងហ្នឹង ផ្តល់សេវាកម្មអ្វីឱ្យអ្នកទេសចរ កុំឱ្យចាញ់សេវាកម្មទេសចរណ៍គេនៅបរទេសខ្លាំងពេក»។
ដោយសារពិភពលោកជួបនូវវិបត្តិនៃជំងឺកូវីដ-១៩ ទាំងកម្ពុជានិង បណ្ដាប្រទេសផ្សេងៗ គឺសុទ្ធសឹងតែបាត់លំហូរភ្ញៀវទេសចរបរទេស។ ប៉ុន្តែបច្ចុប្បន្ននេះ កម្ពុជាចាប់ផ្ដើមកើនឡើងទេសចរណ៍ក្នុងស្រុកជាបណ្ដើរវិញហើយ ។ យោងតាមរបាយការណ៍របស់ក្រសួងទេសចរណ៍ ក្នុងខែឧសភា ឆ្នាំ២០២០ កម្ពពុជាមានភ្ញៀវទេសចរក្នុងស្រុកចំនួន៦០ម៉ឺននាក់ បានទៅកម្សាន្តនៅតាមតំបន់ទេសចរណ៍នានានៅទូទាំងប្រទេស ពិសេសពីសំណាក់យុវជនដែលចូលចិត្តធ្វើដំណើរទេសចរណ៍ផ្សងព្រេង។
កាំពី ក្នុងខេត្តក្រចេះ
ក្រសួងទេសចរណ៍ ក៏បានជំរុញ និងណែនាំឱ្យប្រតិបត្តិករទេសចរណ៍ទាំងអស់ ជាពិសេសម្ចាស់សណ្ឋាគារ ភោជនីយដ្ឋាន និងរមណីយដ្ឋាន ពង្រឹងគុណភាពស្ដង់ដារអនាម័យ សម្រាប់ទទួលភ្ញៀវនៅពេលខាងមុខ។ អ្នកនាំពាក្យក្រសួងទេសចរណ៍ លោក តុប សុភ័ក បានសង្កត់ធ្ងន់ថា ក្រសួងបានប្រាប់ឱ្យប្រតិបត្តិករទេសចរណ៍រៀបចំទីកន្លែងទេសចរណ៍និងឱ្យបានភាពទាក់ទាញ និងស្អាត ជាពិសេសគឺមានភាពអនាម័យទាំងទីកន្លែងកម្សាន្ត កន្លែងស្នាក់នៅ រួមទាំងអនាម័យចំណីអាហារ និងបរិស្ថាន។ មិនតែប៉ុណ្ណោះការបង្កើតសេវាកម្មសម្បូរបែប ប្រកដដោយគុណភាព និងរក្សាតម្លៃសមរម្យ សម្រាប់ភ្ញៀវទេសចរ។
«នៅពេលដែលទីកន្លែងយើងស្អាត សេវាកម្មយើងធ្វើបានល្អ តម្លៃសេវាកម្មសមរម្យអាចទទួលយកបាន នោះមិនត្រឹមជាការទាក់ទាញចិត្តភ្ញៀវទេសចរទេ គឺធ្វើឱ្យជក់ចិត្ត នឹងចង់មកលេងកម្សាន្តម្តងហើយម្តងទៀត»។ នេះជាការបញ្ជាក់របស់អ្នកនាំពាក្យក្រសួងទេសចរណ៍៕
លោក តុប សុភ័ក អ្នកនាំពាក្យក្រសួងទេសចរណ៍
ក្រុមយុវជន ឡើងភ្នំគូលែន ខេត្តសៀមរាប
ក្រុមយុវជននាំគ្នាឡើង«ខ្នងផ្សា» កាលពីថ្ងៃទី៣កក្កដា ឆ្នាំ២០២០។ រូបថត៖ លោក ប៉ាន់ បូនី
ទីកន្លែងបោះតង់នៅក្នុងសហគមអេកូទេសចរណ៍ចង្ក្រានរយ នៅខេត្តសៀមរាប
សកម្មភាពគោយន្តដឹកជញ្ជូនទំនិញរបស់ភ្ញៀវទេសចរឡើងខ្នងផ្សា កាលពីថ្ងៃទី៣កក្កដា ឆ្នាំ២០២០។ រូបថត៖ លោក ប៉ាន បូនី