កីឡាអន្តរជាតិ
អន្តរជាតិ
Pullin ម្ចាស់មេដាយមាសពិភពលោកកីឡាស្គីទឹកកក ស្លាប់ដោយសារលង់ទឹកនៅអូស្ត្រាលី
× Alex Pullin ម្ចាស់ជើងឯកកីឡាស្គីលើទឹកកកពិភពលោកពីរសម័យកាល បានទទួលមរណៈភាពដោយលង់ទឹកអំឡុងពេលកម្សាន្តក្នុងសមុទ្រនាប្រទេសកំណើតអូស្ត្រាលី នៅថ្ងៃទី៨ ខែកក្កដានេះ។ បើតាមការបញ្ជាក់របស់មន្ត្រីក្នុងតំបន់ Pullin ត្រូវបានប្រទះឃើញសន្លប់នៅក្នុងសមុទ្រ។
ប្រព័ន្ធផ្សព្វផ្សាយក្នុងស្រុកអូស្ត្រាលីអះអាងថា អ្នកដើរកម្សាន្តម្នាក់បានប្រទះឃើញ Pullin សន្លប់នៅក្នុងទឹកសមុទ្រលើថ្មប៉ប្រះទឹកសិប្បនិម្មិតមួយ។ ឆ្មាំការពារនៅទីនោះ បាននាំគ្នាយកកីឡាកររូបនេះទៅលើឆ្នេរ Gold Coast ក្នុងរដ្ឋ Queensland ប្រទេសអូស្ត្រាលី រួចហើយបានហៅគ្រូពេទ្យមកសង្គ្រោះភ្លាមៗ។ គេមិនឃើញកីឡាកររូបនេះពាក់ឧបករណ៍ជំនួយអុកស៊ីសែនឡើយ។
យ៉ាងណាក៏ដោយ Pullin វ័យ៣២ឆ្នាំ ដែលបាត់បង់ស្មារតីនៅឯឆ្នេរនោះ បានស្លាប់ដោយសារលង់ទឹកទៅហើយ បើទោះបានទទួលការសង្គ្រោះដោយក្រុមគ្រូពេទ្យប្រចាំនៅកន្លែងកើតហេតុក្តី។
Pullin ដើរកាន់ទង់ជាតិអូស្ត្រាលីក្នុងព្រឹត្តិការណ៍អូឡាំពិកឆ្នាំ២០១៤
Pullin ដែលមានរហស្សនាមថា «Chumpy» ជាអ្នកកាន់ទង់ជាតិអូស្ត្រាលីនៅក្នុងការដើរបង្ហាញខ្លួនរបស់អត្តពលិកអូស្ត្រាលីនៅក្នុងការចូលរួមព្រឹត្តិការណ៍កីឡាអូឡាំពិករដូវរងាឆ្នាំ ២០១៤ នៅទីក្រុងស៊ូជី ប្រទេសរុស្ស៊ី។ រូបគេ ជាម្ចាស់មេដាយមាសកីឡាស្គីលើទឹកកកពីរសម័យកាលក្នុងព្រឹត្តិការណ៍ World Championships ក្នុងឆ្នាំ ២០១១ និងឆ្នាំ២០១៣ រួមទាំងមេដាយសំរិទ្ធិមួយលើកផងដែរនៅឆ្នាំ ២០១៧។
ក្រៅពីនេះ Pullin ក៏បានឈ្នះមេដាយប្រាក់ក្នុងព្រឹត្តិការណ៍ Winter X Games មួយលើកក្នុងឆ្នាំ២០១៦ និងមេដាយមាសកម្មវិធីកីឡារដូវរងាក្នុងប្រទេសនូវែលសេឡង់ ឆ្នាំ ២០១១ ទៀតផង។
មុនជួបហេតុការណ៍អាក្រក់ខាងលើ អត្តពលិកសញ្ជាតិអូស្ត្រាលីរូបនេះ ធ្លាប់បានចែករំលែករូបភាពតាមអ៊ីនធឺណិតដោយបង្ហាញរូបខ្លួនគេផ្ទាល់ហែលទឹកក្នុងសមុទ្រ និងមានកាន់លំពែងសម្រាប់ចាក់ត្រី ឬសត្វផ្សេងៗក្នុងសមុទ្រនោះផង។
គណៈកម្មាធិការអូឡាំពិកអូស្ត្រាលី (AOC) បានបង្ហាញការសោកស្តាយយ៉ាងខ្លាំងចំពោះការបាត់បង់អត្តពលិកឆ្នើមរបស់ខ្លួនរូបនេះ។ ស្ថាប័ន AOC កំពុងចូលរួមកាន់ទុក្ខចំពោះសោកនាដកម្មនេះដែរ៕
Tag:
Alex Pullin
កីឡាស្គីទឹកកក
© រក្សាសិទ្ធិដោយ thmeythmey.com