អតីតគ្រូជម្រើសជាតិកម្ពុជាលោក Scott O’Donell ក្លាយជាទីប្រឹក្សាក្លិបសៀមរាបយូណាយធីត

កីឡាជាតិ

ជាតិ

អតីតគ្រូជម្រើសជាតិកម្ពុជាលោក Scott O’Donell ក្លាយជាទីប្រឹក្សាក្លិបសៀមរាបយូណាយធីត

09, Jul 2020 , 9:29 pm

រូបភាព

លោក Scott O'Donell (កណ្តាល) ថតសែលហ្វីជាមួយ លោក ហុក សុចិត្រា អតីតគ្រូបង្វឹកជម្រើសជាតិម្នាក់ទៀត និងលោក Yeo Wee Hans អ្នកដឹកនាំក្លិបណាហ្គាវើលដ៍

ដោយ:

លោក Scott O’Donell អតីតគ្រូបង្វឹកក្រុមជម្រើសជាតិកម្ពុជា ត្រូវបានតែងតាំងឲ្យធ្វើជាទីប្រឹក្សាក្លិបបាល់ទាត់សៀមរាបយូណាយធីត។ ក្លិបសៀមរាបយូណាយធីតស្វាគមន៍ចំពោះការវិលត្រឡប់មកកម្ពុជាសាជាថ្មីរបស់លោក Scott ក្នុងការរួមចំណែកអភិវឌ្ឍន៍ធនធានមនុស្សក្នុងវិស័យបាល់ទាត់នៅកម្ពុជា។

ក្លិបបាល់ទាត់សៀមរាបយូណាយធីតនៅថ្ងៃទី៨ ខែកក្កដា ឆ្នាំ២០២០ បានប្រកាសនៅលើហ្វេសប៊ុកផ្លូវការពីការតែងតាំងលោក Scott O’Donell គ្រូឧទ្ទេសរបស់សហព័ន្ធកីឡាបាល់ទាត់ពិភពលោក ជាទីប្រឹក្សារបស់ក្លិប។ នេះមិនមែនជាលើកទី១នោះទេ សម្រាប់លោក Scott នៅលើទឹកដីកម្ពុជា ពោលគឺលោកធ្លាប់មកចូលជាមួយវិស័យកីឡាបាល់ទាត់កម្ពុជាម្តងរួចមកហើយកាលពីអំឡុងឆ្នាំ២០៦។

បុរសវ័យ៥៣ឆ្នាំរូបនេះ ធ្លាប់ដឹកនាំជម្រើសជាតិកម្ពុជាពីរលើក គឺក្នុងចន្លោះឆ្នាំ២០០៥ ដល់២០០៧ និងចន្លោះពីឆ្នាំ២០០៩ ដល់ឆ្នាំ២០១០។ នៅឆ្នាំ២០០៩ លោកក៏បាននាំក្រុម U23 កម្ពុជា ឈ្នះពានមិត្តភាព BIDC Cup ផងដែរ។ បុរសជនជាតិអូស្ត្រាលីរូបនេះ ធ្លាប់ដឹកនាំក្លិប Geylang United FC របស់សិង្ហបុរីពីឆ្នាំ២០០៣-២០០៥។

លោក Scott O’Donell ធ្លាប់មកទស្សនាការប្រកួតវគ្គជម្រុះ FIFA World Cup ជុំទីពីររវាងកម្ពុជា និងហុងកុង នៅពហុកីឡដ្ឋានជាតិ កាលពីល្ងាចថ្ងៃទី៥ ខែកញ្ញា ឆ្នាំ២០១៩។

កាលនៅជាកីឡាករបុរសកម្ពស់១,៨៦ម៉ែត្ររូបនេះ ធ្លាប់លេងឲ្យក្លិបពាក់កណ្តាលអាជីព និងអាជីពជាច្រើននៅសិង្ហបុរី ម៉ាឡេស៊ី និងអូស្ត្រាលី។ ក្លិបទាំងនោះរួមមាន Tampines Rovers FC, Marine Catsle United FC, Parramatta Eagles និងក្លិបជាច្រើនទៀត៕