ភ្នំពេញ៖ អាជ្ញាធរខេត្តសៀមរាប បានចេញបម្រាមធ្វើអាជីវកម្មទិញ-លក់សត្វឆ្កែ ធ្វើជាម្ហូបអាហារ ដើម្បីកុំឲ្យប៉ះពាល់ដល់កិត្តិយស និងសេចក្តីថ្លៃថ្នូរខេត្ត ជាពិសេសបញ្ហាសុខភាពពលរដ្ឋ។ អាជ្ញាធរក៏ជំរុញឲ្យតំបន់ដទៃទៀត អនុវត្តវិធានការបែបនេះដែរ។
លោក ទា គឹមសុទ្ធ ប្រធានមន្ទីរកសិកម្មខេត្តសៀមរាប បានបញ្ជាក់ថា ការហាមប្រាមអាជីវកម្មទិញ-លក់សាច់សត្វឆ្កែនៅខេត្តសៀមរាប ដោយសារតែខេត្តសៀមរាបជាគោលដៅទេសចរណ៍បែបវប្បធម៌ ដែលមិនអាចឲ្យមានអាជីវកម្មបែបអនាធិបតេយ្យប៉ះពាល់ដល់សុខភាពសាធារណៈ និងប៉ះពាល់ដល់វិស័យទេសចរណ៍ឡើយ។
ការអនុវត្តវិធានការហាមឲ្យមានអាជីវកម្មទិញ-លក់ និងបរិភោគសាច់សត្វឆ្កែនេះ លោក ទា គឹមសុទ្ធ ចង់ឲ្យពលរដ្ឋគោរពស្រឡាញ់សត្វឆ្កែ ដែលជាសត្វស្មោះត្រង់នឹងមនុស្ស និងជាសត្វដែលមានគុណតម្លៃសម្រាប់បម្រើនៅក្នុងវិស័យយោធា។
លោក ក៏ណែនាំឲ្យពលរដ្ឋឈប់បរិភោគសាច់សត្វឆ្កែ ដើម្បីជំរុញឲ្យម្ចាស់អាជីវកម្មបញ្ឈប់សកម្មភាពនេះផងដែរ។ លោក និយាយដូច្នេះថា៖«យើងអំពាវនាវឲ្យគាត់ឈប់បរិភោគសាច់សត្វឆ្កែ។ បើគាត់ឈប់បរិភោគ ក៏ឈប់លក់ដែរ។ យើងអំពាវនាវដល់ម្ចាស់អាជីវកម្មទាំងអស់ ត្រូវរកប្រកបមុខរបរណាមួយគួរសមស្របនឹងច្បាប់។ ខេត្តដទៃទៀត បើឃើញថាគំរូនេះល្អ គួរតែអនុវត្តតាមដែរ»។
ប្រធានមន្ទីរកសិកម្មខេត្តសៀមរាបរូបនេះ ចាត់ទុកសកម្មភាពទិញ-លក់ និងបិរភោគសត្វឆ្កែ ជាការធ្លាក់ចុះនៃក្រមសីលធម៌ គុណធម៌ របស់មនុស្ស និងជាប្រភពចម្លងនូវជំងឺឆ្កែឆ្កួត និងជំងឺផ្សេងៗទៀតផងដែរ។
លោក ឃឹម ហ្វីណង់ អភិបាលស្រុកបន្ទាយស្រី សង្កេតឃើញថា ការជួញដូរសត្វឆ្កែធ្វើជាម្ហូបអាហារ មានការកើនឡើងនៅស្រុកបន្ទាយស្រី និងចែកចាយទៅបណ្តាខេត្តដទៃទៀត ដែលជាសកម្មភាពមួយប៉ះពាល់ដល់កិត្តិយសខេត្តសៀមរាប។
អភិបាលស្រុកបន្ទាយស្រីរូបនេះ សង្ឃឹមថា ម្ចាស់អាជីវករទាំងអស់នឹងចូលរួមសហការ និងបញ្ឈប់សកម្មភាពទាំងនេះ និងងាកទៅប្រកបមុខរបរថ្មី។ លោកបានរៀបរាប់ដូច្នេះថា៖«ការផ្សព្វផ្សាយជាមុននេះ ចាត់ទុកជាជំហរទន់ភ្លន់មួយរបស់អាជ្ញាធរមូលដ្ឋាន ដើម្បីទុកឱ្យអាជីវករទាំងអស់ស្ម័គ្រចិត្តរៀបចំអនុវត្តតាមការតម្រូវនៃច្បាប់ដោយខ្លួនឯង មុននឹងរដ្ឋបាលស្រុកអនុវត្តនីតិវិធីរដ្ឋបាល»។
ទាក់ទងនឹងការហាមប្រាមអាជីវកម្មទិញ លក់ និងពិឃាតសត្វឆ្កែនេះ លោក ស្រី វុឌ្ឍី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ក្រសួងមិនទាន់អាចអនុវត្តការហាមឲ្យបិទអាជីវកម្មនេះទាំងស្រុងក្នុងក្របខណ្ឌទូទាំងប្រទេសឡើយ។ ក្នុងន័យនេះ លោកគ្រាន់តែបញ្ជាក់ថា ការដើរទាក់ ទិញ លក់ និងពិឃាតសត្វសុនខនៅតាមបណ្តោយផ្លូវ ឬតាមរមណីយដ្ឋានផ្សេងៗ ណាដែលគ្មានការសុំការអនុញ្ញាតពីក្រសួងកសិកម្ម និងមិនគោរពតាមបទដ្ឋានបច្ចេកទេសបសុព្យាបាលទេ អាជីវកម្មនោះនឹងត្រូវប្រឈមនឹងច្បាប់ស្តីពីសុខភាពសត្វ និងផលិតកម្មសត្វតាមមាត្រា១១២,១១៣ និង១១៥ ។
ក្នុងករណីដែលម្ចាស់ជីវកម្មនៅតែបន្តលក់ និងទិញដោយមិនស្របច្បាប់ស្តីពីសុខភាពសត្វ និងផលិតកម្មសត្វ និងមិនអនុវត្តតាមបទដ្ឋានបច្ចេកទេសបសុព្យាបាលនោះទេ ជននោះនឹងត្រូវរងពិន័យបង់ជាទឹកប្រាក់ទៅតាមអំពើដែលបុគ្គលប្រព្រឹត្ត តាមមាត្រា១១២ នឹងត្រូវបង់ប្រាក់៧លានរៀល តាមមាត្រា១១៣ ត្រូវបង់ថវិកា១០លានរៀល និងមាត្រា១១៥ ត្រូវបង់ពី១០លានរៀល ទៅ៥០លានរៀល និងត្រូវជាប់ពន្ធនាគារពី២ ទៅ៥ឆ្នាំ។ នេះជាការបញ្ជាក់របស់លោក ស្រី វុឌ្ឍី។
បើតាមការស៊ើបអង្កេតរបស់អង្គការ FOUR PAWS អន្តរជាតិ នៅកម្ពុជាមានសត្វឆ្កែប្រមាណ ៣លានក្បាល ត្រូវបានសម្លាប់ និងបរិភោគ ជារៀងរាល់ឆ្នាំ។ ក្នុងចំណោមសត្វដែលគេបរិភោគនោះ គឺជាឆ្កែអនាថា និងត្រូវបានគេលួច។ តម្លៃឆ្កែរស់មួយក្បាល ចន្លោះពី ២ដុល្លារ ទៅ៣ដុល្លារ ក្នុងមួយគីឡូក្រាម។
បើតាមរបាយការណ៍របស់អង្គការ FOUR PAWS អន្តរជាតិដដែល សម្រាប់នៅខេត្តសៀមរាបមានភោជីយដ្ឋានសាច់ឆ្កែចំនួន២០កន្លែង ហើយសត្វឆ្កែចន្លោះពី៤ទៅ៦ក្បាលក្នុងមួយថ្ងៃ ត្រូវបានសម្លាប់យកធ្វើជាម្ហូប នៅតាមភោជនីយដ្ឋាននីមួយៗ។បើគិតជាខែវិញ គឺមានសត្វឆ្កែប្រមាណ២,៩០០ក្បាលត្រូវបានសម្លាប់ ហើយជាឆ្នាំ គឺមាន៣៥,០០០ក្បាល។
កន្លងមកអាជ្ញាធររាជធានីភ្នំពេញ ក៏ធ្លាប់ចេញបម្រាមធ្វើអាជីវកម្មសត្វឆ្កែ យកទៅធ្វើជាម្ហូបអាហារដែរ ប៉ុន្តែគេនៅតែប្រទះឃើញកន្លែងលក់-ដូរសាច់ឆ្កែ រីកស្គុសស្គាយ និងមានភ្ញៀវចូលពេញៗហាងទៀតផង។
របាយការណ៍ដែលចុះផ្សាយកាលពីខែកុម្ភៈឆ្នាំ២០២០នេះបញ្ជាក់ថា៖«សម្រាប់តែក្នុងរាជធានីភ្នំពេញ អង្គការ FOUR PAWS បានរកឃើញហាងជាង១១០ទីតាំងដែលលក់សាច់ឆ្កែ ហើយភាគច្រើនបើកទ្វារក្នុងពេល២ឆ្នាំចុងក្រោយនេះ»៕