ជាតិ
សង្គមជាតិ
វៀតណាម ស្នើឲ្យកម្ពុជា ផ្តល់លក្ខណៈងាយស្រួលដល់ការរស់នៅរបស់ពលរដ្ឋវៀតណាម សម្តេចនាយករដ្ឋមន្រ្តី ហ៊ុន សែន ទទួលស្វាគមន៍លោក ង្វៀន ភូជុង ប្រធាននាធិបតីវៀតណាម នៅវិមានសន្តិភាព ក្នុងឱកាសដែលលោក មកបំពេញទស្សនកិច្ចនៅកម្ពុជា កាលពីថ្ងៃទី២៦ ខែកុម្ភៈ ឆ្នាំ២០២០ (រូបពី AFP)
× លោក ង្វៀន ភូជុង ប្រធានាធិបតីវៀតណាម ស្នើមកកាន់សម្តេចនាយករដ្ឋមន្រ្តី ហ៊ុន សែន ឲ្យបន្តជួយសម្រួលនិងបង្កលក្ខណៈងាយស្រួល ដល់ពលរដ្ឋរបស់លោក ឲ្យបានរស់នៅដោយស្ថិរភាព បានរៀនសូត្រ និង ប្រកបមុខរបរយូរអង្វែងនៅកម្ពុជា ដើម្បីរួមចំណែកដ៏សកម្មក្នុងការអភិវឌ្ឍរបស់កម្ពុជា ក៏ដូចជារួមចំណែកក្នុងការពង្រឹងចំណងទំនាក់ទំនងកម្ពុជា-វៀតណាម។
សំណើរបស់មេដឹកនាំវៀតណាម មកកាន់មេដឹកនាំកម្ពុជា គឺធ្វើឡើក្នុងកិច្ចសន្ទនាតាមទូរស័ព្ទ កាលពីថ្ងៃទី៩ ខែកក្កដា ឆ្នាំ២០២០។ ស្ថានទូតវៀតណាមប្រចាំកម្ពុជា បានសរសេរខ្លឹមសារនៃកិច្ចសន្ទនានោះ នៅលើទំព័រហ្វេសប៊ុករបស់ខ្លួន។
បើតាមសំណេររបស់ស្ថានទូតវៀតណាម សម្តេចនាយករដ្ឋមន្រ្តី ហ៊ុន សែន អះអាងថា កម្ពុជា នឹងបន្តជួយសម្រួលនិងបង្កលក្ខណៈងាយស្រួលដល់ពលរដ្ឋវៀតណាម ដើម្បីឲ្យមានលំនឹងចិត្ត បន្តការរស់នៅក្នុងប្រទេសកម្ពុជា។
មិនមែនជាលើកទីមួយទេ គឺកន្លងមក វៀតណាម ក៏ធ្លាប់មានសំណើនេះ មកកម្ពុជាដែរ។
លោក សុខ ផល រដ្ឋលេខាធិការក្រសួងមហាផ្ទៃ បង្ហាញរបាយការណ៍ កាលពីចុងខែមករា ឆ្នាំ២០២០ថា បច្ចុប្បន្ន កម្ពុជា មានជនអន្ដោប្រវេសន៍ស្របច្បាប់ជិត៩ម៉ឺននាក់ ដោយក្នុងនោះ ជនជាតិវៀតណាម មានច្រើនជាងគេ។
ក្រៅពីនេះ មេដឹកនាំពីរ សាទរគ្នាទៅវិញទៅមកអំពីការសម្រេចបានសមិទ្ធផលនានា ក្នុងប្រទេសរបស់ខ្លួន។ មេដឹកនាំទាំងពីរ ក៏បានអរគុណគ្នាទៅវិញទៅមកដែរ ចំពោះកិច្ចសហការក្នុងការប្រយុទ្ធប្រឆាំងជំងឺកូវីដ-១៩។
មេដឹកនាំកំពូលកម្ពុជា-វៀតណាម ក៏បាននិយាយពីរឿងព្រំដែនដែរ។ ស្ថានទូតវៀតណាម បានឲ្យដឹងថា លោក ង្វៀន ភូជុង ស្នើឲ្យកម្ពុជា-វៀតណាម បន្តកិច្ចសហប្រតិបត្តិការនិងជូនដំណឹងដល់គ្នា ឲ្យទាន់ពេលវេលាក្នុងការបង្ការនិងការប្រឆាំងនឹងជំងឺកូវីដ-១៩ ហើយបន្តរក្សាភាពប្រក្រតីក្នុងការដោះដូរទំនិញតាមបណ្តោយខ្សែព្រំដែន ព្រមទាំងរួមគ្នាដោះស្រាយបញ្ហាដែលកើតឡើងជាយថាហេតុ ដោយឈរលើស្មារតីយោគយល់គ្នាទៅវិញទៅមក។
ប្រធានាធិបតីវៀតណាមនិងនាយករដ្ឋមន្រ្តីកម្ពុជា វាយតម្លៃខ្ពស់ចំពោះការចុះហត្ថលេខាលើឯកសារទទួលស្គាល់ការបោះបង្គោលខ័ណ្ឌសីមាតាមបណ្តោលព្រំដែនបាន៨៤ភាគរយកន្លងមក និងបង្ហាញឆន្ទៈបន្តដោះស្រាយតំបន់ព្រំដែននៅសេសសល់១៦ទៀត ដែលមិនទាន់ឯកភាពគ្នា។
យ៉ាងណា មេដឹកនាំទាំងពីរ ជជែកគ្នាឬក៏អត់ ពីការបោះតង់យោធាវៀតណាម ចូលមកទឹកដីកម្ពុជានោះ គេ មិនបានដឹងឡើយ ព្រោះទាំងព័ត៌មានលើទំព័រហ្វេសប៊ុករបស់ស្ថានទូតវៀតណាម ទាំងសេចក្តីប្រកាសព័ត៌មានរបស់ក្រសួងការបរទេសកម្ពុជា មិនឃើញសរសេរឡើយ។
វៀតណាម បានបោះតង់យោធា៣១កន្លែង នៅតាមបណ្តោយព្រំដែនក្នុងខេត្តកណ្តាល និងកន្លែងផ្សេងទៀត។ តំបន់ ដែលវៀតណាម បោះតង់នោះ គឺស្ថិតក្នុងចំណោមតំបន់ទាំង១៦ភាគរយ ដែលមិនទាន់ឯកភាពគ្នា។
វៀតណាម មានហេតុផលថា ការបោះតង់ទាំងអស់ គឺដើម្បីទប់ស្កាត់ការធ្វើដំណើរចេញចូល ព្រោះបារម្ភពីការរាលដាលជំងឺកូវីដ-១៩។ ដោយសារតែមានការតឿនម្តងជាពីរដងពីកម្ពុជា វៀតណាម សម្រេចរុះរើនិងរំកិលតង់មួយចំនួន ថយក្រោយ ហើយសន្យាថា នឹងរុះរើទាំងអស់ នៅក្រោយជំងឺកូវីដ-១៩ ត្រូវបានកម្ចាត់ទាំងស្រុង។
ស្ថានទូតវៀតណាម បន្តថា លោក ង្វៀន ភូត្រុង និង សម្តេច ហ៊ុនសែន ក៏បានវាយតម្លៃខ្ពស់ផងដែរ លើចំណងទំនាក់ទំនងរវាងបក្សនិងរដ្ឋទាំងពីរ ដែលមានការពង្រឹងមិនចេះឈប់ឈរនិងប្រកបដោយភាពស៊ីជម្រៅទៅលើគ្រប់វិស័យ។ ស្ថានទូតវៀតណាម បន្ថែមថា ភាគីទាំងពីរ ក៏បានអះអាងពីការពូនជ្រំបន្ថែមទៀតនូវចំណងទំនាក់ទំនង និងភាពជាអ្នកជិតខាងល្អ៕ Tag:
ទំនាក់ទំនងកម្ពុជា-វៀតណាម
ហ៊ុន សែន
ង្វៀន ភូជុង
© រក្សាសិទ្ធិដោយ thmeythmey.com