ជាតិ
លោក សាយ សំអាល់៖ ទេសចរម្នាក់ចាយជាង៥៨ដុល្លារក្នុង១ថ្ងៃលើដំណើរកម្សាន្តនៅតំបន់អភិរក្ស
× ភ្នំពេញ៖ អ្នកទេសចរម្នាក់ អាចចំណាយប្រាក់ចំនួន ៥៨,១៤ដុល្លារក្នុងមួយថ្ងៃ ទៅលើស្នាក់នៅ ហូបចុក និងសេវាកម្មផ្សេងៗ នៅក្នុងតំបន់អភិរក្ស នៃប្រទេសកម្ពុជា។ លោក សាយ សំអាល់ រដ្ឋមន្ត្រីក្រសួងបរិស្ថាន បញ្ជាក់យ៉ាងដូច្នេះ នៅលើទំព័រហ្វេសប៊ុករបស់ខ្លួន។
លោក សាយ សំអាល់ សរសេរយ៉ាងដូច្នេះថា៖«ក្រសួងបរិស្ថាន បានរកឃើញថា ទេសចរម្នាក់អាចចំណាយប្រមាណ៥៨.១៤ដុល្លារអាមេរិក ក្នុងមួយថ្ងៃ ទៅលើការធ្វើដំណើរ ហូបចុក ស្នាក់នៅ និងផ្សេងៗ នៅក្នុងតំបន់អភិរក្ស។ ដូច្នេះ ទេសចរជួយច្រើន ទៅក្នុងសេដ្ឋកិច្ចមូលដ្ឋាន»។
មួយរយៈចុងក្រោយនេះ តំបន់ទេសចរណ៍ជាច្រើនដែលស្ថិតនៅក្នុងតំបន់អភិរក្ស បានទាក់ទាញទេសចរណ៍ក្នុងស្រុកយ៉ាងកុះករ ក្នុងនោះមានតំបន់វាលធំ នៅក្នុងឧទ្យានជាតិវីរៈជ័យ,ឧទ្យានជាតិគិរីរម្យ,ភ្នំឱរ៉ាល់ដែលជាភ្នំខ្ពស់ជាងគេនៅកម្ពុជា និងស្ថិតនៅក្នុងដែលជម្រកសត្វព្រៃឱរ៉ាល់ ភ្នំខ្នងផ្សា និងភ្នំទំព័រជាដើម។
លោក ឈឺន ឈីម មគ្គុទ្ទេសក៍នៅភ្នំឱរ៉ាល់ ប្រាប់សារព័ត៌មាន Thmey Thmey 25 តាមទូរសព្ទថា គិតត្រឹមរយៈពេល៦ខែ នៃឆ្នាំ២០២០នេះ មានភ្ញៀវទេសចរប្រមាណ៥,៥០០នាក់ បានឡើងភ្នំឱរ៉ាល់ ដែលចំនួននេះ មានការកើនឡើងខ្លាំង បើធៀបនឹងឆ្នាំ២០១៩។ តាម លោកឈឺន ឈីម កំណើនភ្ញៀវទេសចរ បានជួយលើកកម្ពស់ជីវភាពរបស់ប្រជាពលរដ្ឋនៅទីនោះផ្ទាល់ តាមរយៈការផ្ដល់សេវាកម្មលក់ចំណីអាហារ និងតម្រូវការផ្សេងៗដល់អ្នកទេសចរ។
តំបន់ខ្នងផ្សា ដែលកំពុងទទួលបានប្រជាប្រិយភាពនេះវិញ ក៏មានភ្ញៀវទេសចរទៅលេងកម្សាន្តច្រើនដូចគ្នា ដោយគ្រាន់តែគិតត្រឹមរយៈពេលមួយខែក្នុងខែមិថុនាកន្លងទៅនេះ មានភ្ញៀវទេសចរចំនួន១ពាន់នាក់បានទៅកម្សាន្តនៅទីនោះ។
នៅកម្ពុជា កំពុងអភិរក្សតំបន់៦៩កន្លែង ដែលមានផ្ទៃដីប្រមាណជា ៧,៣លានហិកតា រួមមាន ឧទ្យានជាតិ,ឧទ្យានជាតិសមុទ្រ, តំបន់ការពារទេសភាព, ដែនជម្រកសត្វព្រៃ,តំបន់ប្រើប្រាស់ច្រើនយ៉ាង,តំបន់បេតិកភណ្ឌធម្មជាតិ និងរបៀងជីវៈចម្រុះជាដើម៕
© រក្សាសិទ្ធិដោយ thmeythmey.com